- الإعلانات -

امریکی اراکین کانگریس کا نریندر مودی کے نام ایک خط

واشنگٹن: امریکی اراکین کانگریس نے بھارتی وزیراعظم نریندر مودی کے نام ایک خط میں بھارت میں اقلیتوں کے خلاف بڑھتے ہوئے تشدد اور عدم برداشت پر گہری تشویش کا اظہار کیا ہے۔

امریکی اراکین نے وزیر اعظم مودی پر زوردیاہے کہ وہ مذہبی بنیادوں پر اقلیتوں کے خلاف تشدد کو روکنے کیلئے عملی اقدامات کریں۔ اس خط پر آٹھ سینیٹرز اور 26 ارکان کانگریس نے دستخط کئے ہیں۔ خط میں بھارت میں ہندوﺅں کی طرف سے عیسائیوں، مسلمانوں اور سکھوں کے خلاف ناروا سلوک پر گہری تشویش کا اظہار کیا گیا۔

خط میں اراکین کانگریس نے بھارتی وزیراعظم کی توجہ 17 جون 2014ءکو صوبہ چھتیس گڑھ کے ضلع باستر کی 50 دیہی کونسلوں کی طرف سے منظور کردہ قرارداد کی طرف مبذول کرائی  جس میں ان اقلیتی فرقوں کے خلاف ہر قسم کے پروپیگنڈے، عبادات اور تقریروں پر پابندی عائد کی گئی تھی۔

مذہبی آزادی اور فرقہ وارانہ ہم آہنگی کے حوالے سے نریندر مودی کے بیانات کا حوالہ دیتے ہوئے اراکین کانگریس نے ان بیانات کو عملی جامہ پہنانے کی ضرورت پر زور دیا۔