- الإعلانات -

وزیراعظم کے سیکرٹریز کی تنخواہیں 4لاکھ سے زائد ہیں.

اسلام آباد: قومی اسمبلی کی قائمہ کمیٹی برائے پارلیمانی امور کے چیئرمین میاں عبدالمنان نے کہا کہ وزیراعظم‘ صدر‘ا سپیکر اسمبلی کی تنخواہیں ایک لاکھ 42 ہزار روپے ہیں جبکہ ان کے سیکرٹریز کی تنخواہیں 4لاکھ سے زائد ہیں‘ سیکرٹری قومی اسمبلی کی تنخواہ 3لاکھ سے زائد ہے‘ ممبران اسمبلی کو ملنے والی مراعات اونٹ کے منہ میں زیرہ ہے‘ میڈیا ملک کی موجودہ بگڑتی صورتحال کا ذمہ دار ہے۔ پیر کو پارلیمنٹ ہاؤس میں قومی اسمبلی کی قائمہ کمیٹی کا اجلاس منعقد ہوا۔ اجلاس میں کمیٹی نے وزارت خزانہ اور کابینہ ڈویژن خواتین ارکان اسمبلی کو جلد ترقیاتی فنڈز فراہم کرنے کے لئے خط لکھنے کی سفارش کی ہے۔ اجلاس میں کمیٹی رکن شاہدہ رحمانی نے کہا کہ مخصوص نشستوں پر منتخب ہونے والی خواتین کے ساتھ ترقیاتی فنڈ میں امتیازی سلوک روا رکھا جارہا ہے ہم نے ایوان میں خواتین کے فلاح و بہبود کیلئے آواز اٹھائی ہے لیکن پارلیمان میں ہی صنفی مساوات کی پامالی ہورہی ہے۔ انہوں نے کہا کہ مرد ارکان ، خواتین کے مخصوص نشستوں پرانتخاب پر اعتراض کرتے ہیں جبکہ 2005ء کے اسپیکر اسمبلی کی اس پر رولنگ موجود ہے کہ خواتین ارکان کو ترقیاتی فنڈز جاری کئے جائیں تاکہ وہ اپنے حلقے میں خواتین کی فلاح و بہبود کیلئے کام کریں۔