- الإعلانات -

فیس بک کا ”بریک اپ پروٹیکشن“ فیچر متعارف کرانے کا اعلان

نیویارک: کہا جاتا ہے کہ ماضی کی یادیں تعلق توڑ لینے کے بعد زیادہ تکلیف دہ بن جاتی ہیں اور اگر بار بار سامنے آجائیں تو درد دل بن جاتی ہیں اسی لیے فیس بک یادوں سے اپنے صارفین کو دور رکھنے اور ان لمحات میں سکون دینے کے لیے ایسا فیچر متعارف کرارہا ہے جن سے کوئی بھی اپنے سابق شوہر، بیوی یا دوست کی پوسٹ اور تصاویر کو ہائیڈ کر سکتا ہے جب کہ اسے اس کی خبر تک نہیں ہوگی۔ فیس بک کا اس نئے ”بریک اپ پروٹیکشن“ فیچر کا اعلان کرتے ہوئے کہنا تھا کہ جو لوگ اپنے شوہر یا پارٹنر سے علیحدگی اختیار کرلیتے ہیں لیکن ان کی پرانی پوسٹ اور تصاویر مسلسل ان کے سامنے آکر انہیں جذباتی طور پر ٹھیس پہنچاتی ہیں ان کے لیے یہ فیچر متعارف کرایا جا رہا ہے جس کے ان کرتے ہی وہ ان تمام سے نجات حاصل کرلیں گے۔ فیس بک کے مطابق یہ آپشن ان لوگوں کے لیے ڈیزائن کیا گیا ہے جو اپنے سابقہ تعلقات یعنی سابقہ بیوی، شوہر، گرل فرینڈ یا بوائے فرینڈ کی جانب سے جارحانہ رویئے سے بچنے کے لیے ان کو بلاک کیے بغیر ان سے نجات حاصل کرنا چاہتے ہیں اور یہ بھی چاہتے ہیں کہ انہیں اس کی خبر بھی نہ ہو۔ یہ فیچر اپنے تعلقات کا اسٹیٹس تبدیل کرنے کے بعد صارف کو یہ سہولت بھی فراہم کرتا ہے کہ وہ اپنے سابق پارٹنرکے بھیجے گئے گزشتہ تمام پوسٹ سے ان کا نام ہٹا سکے۔ فیس بک کے پراڈکٹ مینجر کے مطابق فیس بک چاہتا ہے کہ وہ مشکل لمحات سے گزرنے والے اپنے صارفین کے لیے ایسے وسائل فراہم کرے جس سے انہیں ان حالات کا سامنا کرنے کی ہمت مل سکےاور وہ مزید درد ناک لمحوں سے بچ سکیں اس لیے ان کی کوشش ہے کہ وہ اپنے صارفین کو زیادہ سے زیادہ خوشیاں دیں اور یہ فیچر اسی سلسلے کا حصہ ہے۔