- الإعلانات -

پورے ملک پر اپنا کنٹرول بحال کرو نگا”بشارالاسد”

عالمی طاقتوں کے شام میں جنگی اقدامات اور کارروائیاں روکنے پر اتفاقِ رائے کے ایک دن بعد شامی صدر بشارالاسد نے کہا ہے کہ وہ پورے ملک پر اپنا کنٹرول بحال کریں گے۔

جمعے کو فرانسیسی خبر رساں ادارے اے ایف پی کو دیے گئے ایک انٹرویو میں انھوں نے کہا کہ شام میں باغیوں کو شکست دینے میں کچھ وقت لگے گا کیونکہ انھیں بیرونی مدد حاصل ہے۔

صدر اسد نے کہا کہ وہ شام میں امن بحال کرنے کے لیے عالمی سطح پر کی جانے والی کوششوں کے باوجود وہ دہشت گردوں کے خلاف جنگ جاری رکھیں گے۔

تاہم یہ جنگ بندی جہادی گروہوں دولتِ اسلامیہ اور النصرہ فرنٹ کے لیے نہیں ہے۔

اقوام متحدہ نے اس امید کا اظہار کیا ہے کہ آئندہ 24گھنٹوں میں محصور علاقوں میں امداد پہنچانے میں کامیابی ہوگی۔

دمشق میں بات کرتے ہوئے شامی صدر نے کہا کہ سرکاری افواج بغیر کسی ہچکچاہٹ کے تمام شام کو واپس لینے کی کوشش کریں گی لیکن علاقائی طاقتوں کی مداخلت کی وجہ سے اس مسئلے کا حل زیادہ وقت لے گا اور اس میں بھاری نقصان اٹھانا پڑے گا۔