- الإعلانات -

طیارہ حادثہ: اسامہ بن لادن کی بہن اور ماں سمیت تین افراد ہلاک

برطانیہ سے موصول ہونے والی اطلاعات کے مطابق اسامہ بن لادن کی ہمشیرہ اور سوتیلی ماں طیارے کے ایک حادثے میں جاں بحق ہو گئیں ہیں۔اس حادثے میں اسامہ بن لادن کے بہنوئی اور طیارے کا اُردنی پائلٹ بھی ہلاک ہو گیا ہے۔ برطانیہ کے علاقے ہیمپشائر میں حادثے کا شکار ہونے والے نجی طیارے کے بارے میں سعودی سفارتخانے کا کہنا ہے کہ اس میں اسامہ بن لادن کے خاندان کے افراد سوار تھے۔ جمعے کو بلیک بش ہوائی اڈے پر پیش آنے والے اس حادثے میں پائلٹ اور طیارے میں سوار تینوں مسافر ہلاک ہوگئے تھے۔ سعودی سفارت خانے کی جانب سے جاری کیے گئے ایک بیان میں کہا گیا ہے کہ برطانیہ میں سعودی سفیر شہزادہ محمد بن نواف ال سعود نے ہلاک ہونے والے افراد کے خاندان سے تعزیت کی ہے۔سعودی سفارت خانے سے جاری بیان کے مطابق شہزادہ محمد بن نواف ال سعود نے اس حادثے کے نتیجے بن لادن خاندان کو جو بہت بڑا نقصان ہوا ہے اور سفیر محترم نے اس حادثے پر خاندان اور ان کے عزیز واقارب سے تعزیت کی ہے۔ سفارت خانے نے مزید کہا ہے کہ سعودی حکام اس حادثے کی تحقیقات کرنے والے برطانوی اہلکاروں سے رابطے میں ہیں۔ سعودی سفارتی ذرائع نے بتایا ہے کہ وہ برطانوی حکام کے ساتھ مل کر کام کر رہے ہیں اور ان کی کوشش ہے کہ مرنے والوں کی میتوں کو جلد از جلد تدفین کے لیے سعودی عرب پہنچایا جائے۔ سعودی سفارت خانے نے ہلاک ہونے والے مسافروں کے نام ظاہر نہیں کیے ہیں۔ اطلات کے مطابق اٹلی سے برطانیہ آنے والا یہ طیارہ القاعدہ کے سابق سربراہ اسامہ بن لادن کے خاندان کی ملکیت تھا۔ خیال رہے کہ جمعے کو بلیک بش ہوائی اڈے پر لینڈنگ کے وقت یہ طیارہ بے قابو ہو کر رن وے کے جنگلے کو توڑتا ہوائی اڈے کے قریب واقع کاروں کے ایک شو روم میں کھڑی گاڑیوں سے ٹکرا کر تباہ ہو گیا تھا۔