- الإعلانات -

صحت دشمنوں کو کوئی رعایت نہیں دیں گے: شہباز شریف

پنجاب کے وزیر اعلیٰ شہباز شریف نے ہدایت کی ہے کہ عوام کی صحت سے کھیلنے والوں کے خلاف کارروائی بنا کسی دباؤ کے جاری رکھی جائے۔ پنجاب فوڈ اتھارٹی کی جانب سے لاہور میں کی جانے والی کارروائیوں کو سراہتے ہوئے شہباز شریف نے تمام ڈسٹرکٹس کے ڈی سی اوز کو ہدایت کی ہے کہ وہ بھی اپنے اضلاع میں اس بات کو یقینی بنائیں کہ کوئی بھی ریسٹورنٹ غیر معیاری اشیائے خور و نوش فروخت نہ کر سکے۔ پنجاب فوڈ ایکٹ کے تحت قائم کی جانے والی پنجاب فوڈ اتھارٹی نے اب تک پانچ سو ریسٹورنٹس اور کھانے پینے کی فیکٹریوں کا دورہ کیا ہے۔ اس دوران غیر معیاری اشیائے خور و نوش کی تیاری اور ان کی فروخت میں ملوث سماج دشمنوں کے خلاف بھاری جرمانے، دکانیں و فیکٹریاں سیل کرنے اور مقدمات کے اندراج کرانے کے ساتھ ساتھ متعدد دکانوں اور ریسٹو رنٹس کو اپنا معیار بہتر بنانے کے لیے نوٹس جاری کیے گئے ہیں۔ شہباز شریف نے اس موقع پر یہ اعلان بھی کیا ہے کہ پنجاب کے تمام ریسٹورنٹس کو ان کے کھانے کے معیار کے مطابق گریڈنگ دی جائے گی۔ اس کے لیے ان کی صفائی، سیکیورٹی اور پانی کے معیار کو بھی سامنے رکھا جائے گا۔ وزیر اعلیٰ نے اس مہم میں ڈائریکٹر عائشہ ممتاز کے کردار کو خصوصی طور پر سراہا کہ انہوں نے اپنی کارروائیوں میں کسی کو رو رعایت کا مستحق نہیں سمجھا