- الإعلانات -

جنک فوڈ انسانی صحت کیلئے مفید نہیں :ماہرین

ماضی میں اس کے نقصانات کے پیش نظر لاس اینجلس میں جنک فوڈ کی تیاری اور فروخت پر پابندی لگا دی گئی تھی

نیویارک  یہ بر گر ، سینڈ وچ کس کے ، امیر کے یا غریب کے یا پھر دونوں کے؟ کچھ لوگ سمجھتے ہیں کہ جنک فوڈ امیروں کی مرغوب غذا ہے ۔ ہلکی اور زود ہضم ہے اسی لئے ان کو پسند ہے۔ غذائی ماہرین جنک فوڈ کو صحت بخش نہیں سمجھتے مگر اس کے باوجود جنک فوڈ پر کوئی کنٹرول نہیں ۔ اس کے کھانے والے بڑھتے ہی جا رہے ہیں ۔ دل ، شوگر اور موٹاپے کا سبب یہ جنک فوڈ ہی تو ہیں ۔

پچھلے دنوں بیرون ملک ایک اور ریسرچ ہوئی جس کا موضوع تھا   جنک فوڈ کس کا امیر کا یا غریب کا؟   تحقیق سے پتہ چلا کہ یہ سب کا ہے ۔ متوسط طبقہ کے لوگ اس میں سب سے زیادہ دلچسپی لیتے ہیں ۔ صدر ٹرمپ بھی جنک فوڈ کے شوقین ہیں ، وہ جنک فوڈ بنانے والے اداروں کو اشتہارات بھی دیتے رہے ہیں ۔ وارن بوفے کا شمار دنیا کے پانچ امرا ء میں ہوتا ہے وہ کہتے ہیں :  میں 6 سال کا تھا جب سے جنک فوڈ کھا رہا ہوں    ۔ وہ چپس اور مشروبات کے اس قدر شوقین ہیں کہ ان کے بغیر دن ہی نہیں گزرتا ۔ غذائی ماہرین جنک فوڈ میں شامل نمکیات اور چکنائی کونقصان دہ سمجھتے ہیں ۔

غذائی ماہرین کے مطابق جلدی تیار ہونے اور آسانی سے کھا لینے کے باعث جنک فوڈ مقبول ہیں ۔ امریکہ میں 1957ء سے 1964ء کے درمیان پیدا ہونے والی نسل نے جنک فوڈ سے ہی توانائی حاصل کی ۔ اس کا پتہ ایسے چلا کہ 1979، 2008 اور 2012 میں ان نوجوانوں سے جنک فوڈ کے بارے میں سوالات کیے گئے ۔ مثال کے طور پر   گزشتہ 3 ہفتوں میں انہوں نے کتنی مرتبہ فاسٹ فوڈ کھایا    یا فاسٹ فوڈ بنانے و الے 5 بڑے ہوٹلوں میں گئے ۔ 79 فیصد نے کہا کہ وہ 3 ہفتوں میں کم از کم ایک دفعہ ہوٹل ضرور جاتے ہیں ۔ 10 فیصد امیر ترین افراد میں سے 75 فیصد اور 10 فیصد غریب ترین افراد میں سے 85 فیصد فاسٹ فوڈ کے شوقین نکلے ۔

جنک فوڈ کے نقصانات کو دیکھتے ہوئے لاس اینجلس میں اس پر پابندی لگا دی گئی تھی مگر اس پر عمل نہ ہو سکا ۔ لوگ فاسٹ فوڈ کے لیے قریبی علاقوں میں چلے جاتے ، چنانچہ یہ پابندی اٹھا لی گئی ۔ یہی وجہ ہے کہ جنک فوڈ استعمال کرنے والے موٹاپے کا شکار ہو گئے ۔ اپنے بے ڈھنگے جسم کے باوجود جنک فوڈ ان کی کمزوری بنا رہا ۔ جنک فوڈ سستا بھی نہیں ہے ۔ ایک عام ریسٹورنٹ میں آدمی پیٹ بھر کے 4 ڈالر میں بھی کھانا کھا لیتا ہے لیکن جنک فوڈ بسا اوقات 15 ڈالر میں آتا ہے ۔ 8 ہزار ڈالر کمانے والے غربت کی لکیر سے نیچے سمجھے جاتے ہیں ۔ 16 ہزار ڈالر کی آمدنی کا مطلب 44 ڈالر یومیہ ہے اور 44 ڈالر میں امریکہ میں زندگی گزارنا آسان نہیں ۔ لیکن حقیقت میں جنک فوڈ لوگوں کی زندگی کا حصہ بن چکا ہے ۔