قومی

’دورہ امریکا کا بنیادی مقصد کشمیر میں بھارتی مظالم سے دنیا کو آگاہ کرنا ہے‘

نیو یارک: وزیر خارجہ شاہ محمود قریشی کا کہنا ہے کہ دورہ امریکا کا بنیادی مقصد کشمیریوں میں جاری بھارتی مظالم سے دنیا کو آگاہ کرنا ہے۔

نیو یارک میں میڈیا سے گفتگو کرتے ہوئے ان کا کہنا تھا کہ وزیراعظم عمران خان کے سات روزہ دورہ امریکا کا مقصد مقبوضہ کشمیر میں بھارتی مظالم سے دنیا کو آگاہ کرنا ہے، ابھی کچھ دیر کے بعد وزیر اعظم عمران خان ایک کشمیری وفد سے ملاقات کریں گے اور ان کے تاثرات لیں گے اور ان سے مشاورت کی بنیاد پر ہم اپنی انگیجمنٹس جاری رکھیں گے۔

وزیر خارجہ کا کہنا تھا کہ وزیر اعظم اقوام متحدہ جنرل اسمبلی کے اجلاس کے دوران مختلف ممالک کے سربراہان سے ملاقاتیں کریں گے، اس کے علاوہ تھنک ٹینکس کے ساتھ بھی ان کی ملاقاتیں ہوں گی، یہاں کے دو معروف تھینک ٹینکس ایشیا سوسائٹی اور کونسل فار فارن ریلیشنز سے بھی وزیراعظم ملیں گے اور تبادلہ خیال کریں گے۔

شاہ محمود قریشی کا پریس کانفرنس کے دوران مزید کہنا تھا کہ ترکی، ملائیشیا اور پاکستان ملکر ایک سہ ملکی اجلاس اسلامو فوبیا کے بڑھتے ہوئے رجحان کے حوالے سے کر رہے ہیں۔

پریس کانفرنس کے دوران ان کا مزید کہنا تھا کہ احساس پروگرام کے حوالے سے وزیراعظم بات کرنا چاہ رہے ہیں کیونکہ دیرپا ترقی کے اہداف حاصل کرنے کے لیے احساس پروگرام بہت اہم ہے۔

وزیر خارجہ کا کہنا تھا کہ احساس پروگرام کے ساتھ ساتھ موسمیاتی تبدیلی کے حوالے سے بھی وزیراعظم عمران خان اظہار خیال کریں گے۔

شاہ محمود قریشی کا کہنا تھا کہ فنانشل ورلڈ کے اہم لوگوں سے بھی ملاقات کریں گے اور منی لانڈرنگ کے حوالے سے اپنا نقطہ نظر بتائیں گے کہ کس طرح بڑے ممالک کو منی لاڈرنگ کے ذریعے پیسے کی ترسیل ہوتی ہے اور تیسری دنیا کے ممالک غربت کا شکار ہوتے ہیں۔

پریس کانفرنس کے دوران ان کا کہنا تھا کہ دورۂ امریکا پر آئے وزیراعظم عمران خان امریکی صدر ڈونلڈ ٹرمپ کیساتھ بھی ملاقات متوقع ہے۔

وزیر خارجہ کا کہنا تھا کہ سعودی عرب کے فرمانروا شاہ سلمان اور ولی عہد محمد بن سلمان کے ساتھ وزیراعظم کی اہم ملاقاتیں ہوئیں اور مشرق وسطیٰ کی بدلتی ہوئی صورتحال پر تبادلہ خیال کیا گیا جہاں پاکستان نے ان سے یکجہتی کا مظاہرہ کیا ہے وہاں ان سے یہ بھی کہا ہے کہ ایسا فیصلہ عجلت میں نہیں کرنا چاہیے جس سے خطے کا امن متاثر ہو۔

وزیراعظم کا کشمیر مشن، صدر ٹرمپ سے کل ملاقات، تھنک ٹینک سےخطاب شیڈول

نیویارک: کشمیریوں کی آواز دنیا تک پہنچانے کا مشن شروع، وزیراعظم نے نیویارک میں کشمیر سٹڈی گروپ کے بانی فاروق کاٹھواری سے ملاقات کی، مودی حکومت کا اصل چہرہ دنیا کےسامنے بے نقاب کرنے کی ہدایت کر دی، صدر ٹرمپ سے ملاقات کل ہو گی، امریکی تھنک ٹینک سے بھی خطاب کا پروگرام ہے۔

وزیراعظم ستائیس ستمبر کو اقوام متحدہ کی جنرل اسمبلی سے خطاب کریں گے، کئی ممالک کے سربراہان سے ملاقاتیں شیڈول، عالمی میڈیا کے نمائندوں سے ملاقات کے علاوہ پاکستان، ترکی اور ملائشیا کی سہ فریقی سمٹ سے خطاب بھی کریں گے۔

نیویارک میں وزیراعظم سے کشمیر اسٹڈی گروپ کے بانی فاروق کاٹھواری نے ملاقات کی۔ عمران خان نے فاروق کاٹھواری کو مقبوضہ کشمیر میں بھارت کے غیر قانونی تسلط اور انسانی حقوق کی پامالی کو مزید اجاگر کرنے کی تلقین کی، فاروق کاٹھواری امریکی صدارتی کمیشن براے ایشیائی امریکیوں کے کمیشن کے ممبر رہ چکے ہیں۔

عمران خان (کل) پیر کو امریکی صدر سے ملاقات کریں گے، ترجمان دفترخارجہ کے مطابق، وزیراعظم کی ٹرمپ سمیت کئی ممالک کے سربراہان سے بھی ملاقاتیں شیڈول ہیں۔ 27 ستمبر کو اقوام متحدہ کی جنرل اسمبلی سے خطاب میں کشمیر کا مقدمہ پیش کریں گے۔

وزیر خارجہ شاہ محمود قریشی نے کہا ہے کہ وزیراعظم عمران خان کےدورہ امریکا کا مقصد مقبوضہ کشمیر میں جاری بھارتی مظالم سے دنیا کو آگاہ کرنا ہے۔

مدینہ میں کشمیری شہری کی وزیر خارجہ شاہ محمود کیساتھ ملاقات کی ویڈیو وائرل

ریاض: (ویب ڈیسک) وزیر خارجہ شاہ محمود قریشی اور ایک کشمیری نوجوان کی ویڈیو سوشل میڈیا پر وائرل ہو رہی ہے جس میں دیکھا جا سکتا ہے کہ کشمیری شہری وزیر خارجہ کو آگاہ کر رہا ہے کہ 48 روز گزر گئے ہیں کہ مقبوضہ وادی میں والدین سے رابطہ نہیں ہو سکا۔

وزیر خارجہ نے اپنی سوشل میڈیا کی ویب ٹویٹر پر ایک ویڈیو شیئر کی جس میں دیکھا جا سکتا ہے کہ ایک کشمیری نوجوان شاہ محمود قریشی سے ملاقات کر رہا ہے اور اپنے آبائی علاقے کی صورتحال سے انہیں (وزیر خارجہ) کو آگاہ کر رہا ہے۔

شاہ محمود قریشی نے ٹویٹر پر ٹویٹ کرتے ہوئے کہا کہ گزشتہ روز میں سعودی عرب کے شہر مدینہ میں تھا، جہاں میری ملاقات ایک نوجوان سے ہوئی، جس کا تعلق کشمیر سے تھا، نوجوان نے بتایا کہ 48 دن ہو گئے ہیں میرا والدین سے رابطہ نہیں ہو سکا، میرا تعلق پلوامہ سے ہے اور وہاں کے حالات بہت زیادہ خراب ہیں اور آئے روز شہریوں پر تشدد کیا جاتا ہے۔

وزیر خارجہ کا اس موقع پر کہنا تھا کہ میں نے نوجوان سے وعدہ کیا کہ پاکستان کشمیریوں کا کیس ہر سطح پر سفارتی محاذ پر لڑے گا۔

شہید میجر عدیل شاہد اور سپاہی فراز حسین کو سپرد خاک کر دیا گیا

کراچی: پاک فوج کے شعبہ تعلقات عامہ کے مطابق مہمند ایجنسی میں شہید ہونے والے میجر عدیل شاہد کی نماز جنازہ کراچی جبکہ سپاہی فراز حسین کی نماز جنازہ کوٹلی آزاد کشمیر میں ادا کی گئی جبکہ دونوں شہداء کو فوجی اعزازات کیساتھ آبائی قبرستان میں سپرد خاک کر دیا گیا۔

ڈی جی آئی ایس پی آر میجر جنرل آصف غفورکا کہنا تھا کہ میجر عدیل شاہد گزشتہ روز پاک افغان سرحد پر ضلع مہمند میں بارودی سرنگ دھماکے میں شہید ہوئے تھے۔

پاک فوج کے شعبہ تعلقات عامہ (آئی ایس پی آر) کے مطابق میجر عدیل شاہد کی نماز جنازہ میں کور کمانڈر کراچی سمیت اعلیٰ فوجی افسران اور سیاسی رہنماؤں کی بڑی تعداد نے بھی شرکت کی جبکہ انہیں فوجی اعزازات کیساتھ سپرد خاک کیا گیا۔

دوسری طرف پاک افغان سرحد پر شہید ہونے والے پاک آرمی کے جوان فراز حسین شہید کی نماز جنازہ ہوائی جہاز گرائونڈ میں ادا کر دی گئی۔ نماز جنازہ میں اعلیٰ فوجی افسران، مختلف سیاسی ،مذہبی،وکلاء، تاجر جماعتوں کے رہنمائوں، عوام علاقہ سمیت ہرمکتبہ فکرسے تعلق رکھنے والے ہزاروں افراد نے شرکت کی۔

یاد رہے کہ گزشتہ روز دہشتگردوں نے ایک بار پھر پاک فوج کو نشانہ بنایا تھا۔ پاک افغان سرحد پر بارودی سرنگ کے دھماکے میں پاک فوج کے میجر اور ایک سپاہی شہید ہو گئے تھے۔

چلاس: تیز رفتار مسافر کوچ بے قابو، چٹان سے جا ٹکرائی، 22 افراد جاں بحق، 15 زخمی

چلاس: سکردو سے پنڈی جانے والی تیزرفتار مسافر کوچ کو چلاس کے قریب حادثہ پیش آ گیا، بےقابو ہو کر چٹان سے ٹکرا گئی، جس کے نتیجے میں 22 افراد جاں بحق اور 15 زخمی ہو گئے۔ ریسکیو عملے نے زخمیوں‌ کو ہسپتال منتقل کر دیا.

مسافر بس سکردو سے راولپنڈی کی جانب رواں دواں تھی کہ بابوسر ٹاپ کے قریب چٹان سے ٹکرا گئی، زخمیوں میں بچے اور خواتیں بھی شامل ہیں۔ بس مسافروں سے کھچا کھچ بھری ہوئی تھی، حادثے کے نتیجے میں 22 افراد جاں بحق اور 15 افراد زخمی ہو گئے۔ حادثہ بابوسر ٹاپ کے علاقے میں پیش آیا۔

ریسکیو عملے نے زخمیوں کو چلاس ہسپتال منتقل کیا جہاں ایمرجنسی نافذ کر دی گئی ہے۔ پولیس نے تفتیش کا آغاز کر دیا۔

کرفیو کے خاتمے تک پاکستان بھارت کیساتھ مذاکرات نہیں کرے گا: فردوس عاشق

سیالکوٹ: فردوس عاشق اعوان نے کہا ہے کہ مقبوضہ کشمیر میں انسانی حقوق کی بری طرح پامالی کی جا رہی ہے، کرفیو کے خاتمے تک پاکستان بھارت کیساتھ مذاکرات نہیں کرے گا، مقبوضہ کشمیر کے عوام کو جنرل اسمبلی کے اجلاس سے بہت سی امیدیں وابستہ ہے۔

وزیراعظم کی معاون خصوصی برائے اطلاعات و نشریات فردوس عاشق اعوان نے پریس کانفرنسس سے خطاب کرتے ہوئے کہا وزیراعظم کی ملاقاتوں کا محور مسئلہ کشمیر رہا، وزیراعظم نے سعودی قیادت کو کشمیریوں پر بھارتی مظالم سے آگاہ گیا، عمران خان کا دورہ امریکا بھی انتہائی اہمیت کا حامل ہے، مقبوضہ کشمیر میں انسانی حقوق کی پامالی جاری ہے، وزیراعظم نے سعودی آئل تنصیبات پر حملے کی مذمت کی، وزیراعظم مختلف ممالک کے سربراہوں سے ملاقات کریں گے، عمران خان امریکی صدر سے ملاقات بھی کریں گے۔

فردوس عاشق اعوان کا کہنا تھا مودی کو گجرات کا قصائی کہا جاتا ہے، امریکی صدر کو انسانیت کے قاتل مودی سے اجتناب کرنا چاہیے، جب تک بھارت مقبوضہ کشمیر سے محاصرہ ختم نہیں کرتا مذاکرات نہیں ہوسکتے، مودی نے عمران خان کے واشنگٹن جلسے کی نقل کرنے کی کوشش کی، مودی کا امریکا میں جلسہ کامیاب نہیں ہوگا، عمران خان نے ہمیشہ بحیثیت کھلاڑی، سیاستدان ٹرینڈ سیٹ کیے، وزیراعظم جنرل اسمبلی میں عالمی ضمیر کو جھنجھوڑیں گے۔

معاون خصوصی برائے اطلاعات کا کہنا تھا وزیراعظم پاکستان کا مثبت تشخص دنیا کے سامنے اجاگر کریں گے، سلامتی کونسل کا رکن بننے کا بھارتی خواب کبھی پورا نہیں ہوگا۔

عالمی برادری کشمیریوں پر مظالم روکنے کیلئے عملی اقدامات کرے: وزیراعلیٰ پنجاب

لاہور: وزیراعلیٰ پنجاب نے کہا ہے کہ مودی کی انتہا پسندانہ سوچ سے خطے کو سنگین خطرات درپیش ہیں، عالمی برادری کشمیریوں پر مظالم روکنے کیلئے عملی اقدامات کرے، پاکستان آج پہلے سے کہیں زیادہ محفوظ اور پر امن ملک ہے۔

وزیراعلیٰ عثمان بزدار نے عالمی یوم امن پر اپنے پیغام میں کہا اللہ تعالیٰ نے امن و آتشی کے لئے کائنات تخلیق کی، افسوس کا مقام ہے کہ انسان اللہ تعالیٰ کے اس ابدی پیغام کو فراموش کرچکا ہے، آج دنیا بھر میں انتہاء پسندانہ سوچ کے باعث امن کو سنگین خطرات لاحق ہیں، مقبوضہ کشمیر، فلسطین اور دیگر علاقوں میں بسنے والے انسان امن کے متلاشی ہیں۔

سردار عثمان بزدار کا کہنا تھا بھارتی حکومت کی ہٹ دھرمی کے باعث تنازعہ کشمیر خطے کے امن کیلئے خطرہ بن چکا ہے، مودی سرکار نے مقبوضہ کشمیرمیں ظلم، بربریت اور سفاکیت کے ذریعے امن کو روند ڈالا ہے، بین الاقوامی برادری کو مقبوضہ کشمیر میں انسانی حقوق کی دھجیاں اڑانے سے روکنے کیلئے عملی اقدامات کرنے کی ضرورت ہے، نریندر مودی کی انتہاء پسندانہ سوچ نے خطے کو سنگین خطرات سے دوچار کر رکھا ہے۔

وزیراعلیٰ پنجاب نے مزید کہا کہ امن کی ضرورت اور اہمیت وہی جانتا ہے جو جنگوں سے گزرا ہو، غربت، نا انصافی، جہالت، محرومی، جارحیت اور توسیع پسندانہ عزائم امن کے قیام میں سب سے بڑی رکاوٹ ہیں، امن کا براہ راست تعلق ترقی اور خوشحالی سے جڑا ہوا ہے، پاکستان ایک امن پسند ملک ہے، پاکستان او راس کے عوام امن کی اہمیت کو خوب جانتے ہیں۔

وزارت قانون کا پروڈکشن آرڈر سے متعلق قانون میں ترمیم کا فیصلہ

اسلام آباد:  وزارت قانون نے کہا ہے کہ پروڈکشن آرڈر سے متعلق قانون میں ترمیم کا فیصلہ کر لیا گیا ہے، کرپشن کیسز میں ملوث ارکان پارلیمنٹ پروڈکشن آرڈرز کا فائدہ نہیں اٹھا سکیں گے۔

وزارت قانون حکام نے بتایا کہ قومی اسمبلی کے رولز آف پروسیجر اینڈ کنڈکٹ آف بزنس کے سیکشن 108 جبکہ سینیٹ کے متعلقہ رولز کے سیکشن 84 میں ترمیم کی جائے گی۔

ذرائع کے مطابق آئندہ چند ہفتوں میں پروڈکشن آرڈر سے متعلق رولز میں ترمیم کا کام مکمل کر لیا جائے گا اور مسودے کی منظوری متعلقہ ہاؤس سے سادہ اکثریت سے لی جائے گی۔ وزارت قانون کے مطابق کرپشن سے متعلق مقدمات میں ملوث رکن پارلیمنٹ کے پروڈکشن آرڈرز جاری نہیں ہوسکیں گے۔

Google Analytics Alternative