- الإعلانات -

بھارت جبر واستبداد سے کشمیریوں کے حوصلے پست نہیں کرسکتا،تحریک حریت

بھارت جبر واستبداد سے کشمیریوں کے حوصلے پست نہیں کرسکتا،تحریک حریت
سرینگر ۔ : مقبوضہ کشمیر میں تحریک حریت جموں وکشمیر نے کہا ہے کہ بھارت جبر واستبداد پر مبنی اپنی پالیسیوں کے ذریعے کشمیریوں کی تحریک آزادی کو کسی صورت دبا نہیں سکتا۔ کشمیر میڈیاسروس کے مطابق تحریک حریت نے بانڈی پورہ قصبے میں بھارت مخالف مظاہرہ کا انعقاد کیا جس کی قیادت تنظیم کے رہنما بشیر احمد قریشی نے کی اور اس میں سینکڑوں لوگوں نے شرکت کی۔ بشیراحمد نے اس موقع پر اپنی تقریر میں کہا کہ بھارت جبر و استبداد سے کشمیریوں کی خواہشات کو کسی صورت کچل نہیں سکتا۔ انہو ںنے کہا کہ تحریکی رہنماﺅں اور کارکنوں کی غیر قانونی گرفتاری سے انکے حوصلے کبھی بھی پست نہیں کیے جاسکتے۔ بشیر احمد نے کہا کہ بھارت نے جموںوکشمیر پر غیر قانونی طور پر قبضہ جما رکھا ہے اور کشمیری اپنے پیدائشی حق، حق خود ارادیت کے حصول کے لیے بیش بہا قربانیاں دے رہے ہیں۔ دریں اثنا کشمیر فریڈم فرنٹ کے رہنماﺅں محمد اکبر ڈار اور مولانا محمد شمس الدین نے پلوامہ کے علاقے تلگام میں ایک عوامی اجتماع سے خطاب کرتے ہوئے کہا کہ کشمیری اپنے ناقابل تنسیخ حق، حق خود ارادیت کے حصول کے لیے بے مثال قربانیاں دے رہے ہیں۔ انہوں نے بھارتی فوجیوں کے ہاتھوں حال ہی میں ترال میں شہد ہونے والے تین کشمیری نوجوانوںکو شاندار خراج عقیدت پیش کیا۔