- الإعلانات -

مورٹر بم کا دھماکاہ: نوشہرہ سے بڑی خبر آگی

صوبہ خیبرپختونخوا کے ضلع نوشہرہ کے علاقے اکبرپورہ میں دھماکے کے نتیجے میں 5 افراد جاں بحق جبکہ 2 زخمی ہوگئے۔

ڈسٹرکٹ پولیس افسر (ڈی پی او) نجم الحسن نے بتایا کہ دھماکا دریائے کابل کے ساتھ موجود مارکیٹ میں ہوا۔

ان کا کہنا تھا کہ کچھ لوگ دریائے کابل کے کنارے سے پتھروں سے کچھ اسکریپ کا سامان نکال رہے تھے، جس میں کچھ دھماکا خیز مواد بھی تھا جو اس وقت پھٹ گیا جب وہ اس کا وزن کر رہے تھے۔

انہوں نے بتایا کہ اس واقعے کے نتیجے میں 5 افراد موقع پر ہی جاں بحق ہوگئے جبکہ 2 زخمی ہوئے۔

ڈی پی او کے مطابق پولیس جائے وقوع سے شواہد اکٹھے کرکے مزید تحقیقات کر رہی ہے جبکہ زخمیوں کو ہسپتال منتقل کردیا گیا ہے۔

خیال رہے کہ اس سے قبل پاک افغان سرحد کے قریب لوئر کرم کے علاقے شاروکی میں امام بارگاہ میں ہوئے دھماکے میں ایک شخص زخمی ہوا تھا۔

مقامی پولیس عہدیدار یعقوب خان نے بتایا تھا کہ دھماکا خیز مواد مسجد میں نصب کیا گیا تھا۔

قبل ازیں فروری 2020 میں خیبرپختونخوا کے شہر ڈیرہ اسمٰعیل خان میں پولیس وین کے قریب امپرووائسڈ ایکسپلوزو ڈیوائس (آئی ای ڈی) کے دھماکے میں ایک اہلکار شہید جبکہ 2 زخمی ہوئے تھے۔

ڈسٹرکٹ پولیس افسر واحد محمود نے بتایا تھا کہ کلاچی کے علاقے میں پولیس موبائل کے قریب دھماکا ہوا تھا۔