- الإعلانات -

واٹس ایپ نے صارفین کی بڑی مشکل آسان کردی

سان فرانسسکو: پیغام رسانی کے لیے استعمال ہونے والی معروف موبائل ایپلی کیشن واٹس ایپ نے صارفین کی بڑی مشکل آسان کردی۔

تفصیلات کے مطابق واٹس ایپ صارفین کو اکثر فون کی اسٹوریج اسپیس بھرجانے کا مسئلہ درپیش رہتا ہے جو اس ایپلی کیشن میں دوستوں کی جانب سے بھیجی جانے والی ویڈیوز اور تصاویر کا نتیجہ ہوتا ہے۔

اب واٹس ایپ کے اینڈرائیڈ بیٹا ورژن 2.20.201.9 میں پہلی بار ایسا فیچر متعارف کروایا گیا ہے جو صارفین کے لیے اپنی اسٹوریج کا مسئلہ آسان بنادے گا۔

اس اپ ڈیٹ میں متعدد نئے فیچر ایک فیچر کے تحت ہوں گے جیسے اسٹوریج بار کا اضافہ ہوگا جو واٹس ایپ ویڈیوز اور تصاویر کے اسٹوریج اسپیس کی تفصیلات سے آگاہ کرے گی۔

اسی طرح صارف کو یہ علم ہوگا کہ اسے کتنی بڑی دستاویزات، تصاویر اور ویڈیوز واٹس ایپ کے ذریعے موصول ہوئی ہیں۔

واٹس ایپ کی اپ ڈیٹس پر نظر رکھنے والے سائٹ ویب بیٹا انفو کے مطابق یہ فیچر فی الحال مخصوص بیٹا صارفین کو دستیاب ہے اور بہت جلد تمام صارفین کے لیے متعارف کروایا جاسکتا ہے۔

اس فیچر کی تصدیق واٹس ایپ نے گزشتہ ہفتے کی تھی تاہم سائٹ کے مطابق اس فیچر سے صارفین کو ایپ کی اسٹوریج کسٹمائزر کرنے میں مدد ملے گی اور وہ ہر قسم کی میڈیا فائلز بشمول فارورڈڈ فائلز کا ڈیٹا دیکھ سکیں گے۔

یہ نیا فیچر واٹس ایپ سیٹنگز میں ڈیٹا اینڈ اسٹوریج یوزایج سیکشن میں چھپا ہوگا اور وہاں وہ کلین اپ آپشن سے فون کی میموری خالی کرسکیں گے۔

یعنی صارف دیکھ سکے گا کہ کسی فائل کا حجم کتنا ہے اور اس کے لیے بڑی فائلز کو ڈیلیٹ کرنے کا فیصلہ آسان ہوگا جبکہ ڈیلیٹنگ میڈیا فرام واٹس ایپ کے آپشن سے تمام فائلز کو فون سے ڈیلیٹ کرنا ممکن ہوگا۔

یہ فیچر تمام چیٹس اور گروپ کی فہرستیں بھی ان کے اسٹوریج کے مطابق بنائے گا اور صارف کے لیے گروپس یا انفرادی چیٹس کو سرچ کرنا بھی آسان ہوگا۔

واٹس ایپ نے اس فیچر کی تصدیق تو کی ہے تاہم یہ نہیں بتایا کہ یہ کب تک تمام صارفین کو دستیاب ہوسکتا ہے۔