- الإعلانات -

رینجرز کو فٹ بال نہیں بننے دیں گے،چوہدری نثار

کراچی : وفاقی وزیرچوہدری نثارنے پریس کانفرنس سے خطاب کرتے ہوئے کہا کہ کراچی کا آپریشن مفت میں نہیں ہوا 31 جوان و افسران نے جان کا نذرانہ دیا اور 89 زخمی ہوئے ہیں اس لیے رینجرز کو فٹ بال نہیں بننے دیں گے۔

تفصیلات کے مطابق وفاقی وزیر داخلہ نے آج اسلام آباد میں ایک پرہجوم پریس کانفرنس سے خطاب کر تے ہوئے کہا کہ کراچی آپریشن سندھ حکومت کی مشاورت اور درخواست پر شروع کیا گیا تھا جسے پورے پاکستان کی حمایت حاصل ہے اس لیے رینجرز کے معاملے کو سیاسی نہیں بننا چاہیے، وفاقی حکومت نے تہیہ کر رکھا ہے کہ رینجرز کو سیاسی فٹ بال نہیں بننے دیں گے۔

وفاقی وزیر داخلہ چوہدری نثار کا کہنا ہے کہ آج وزیر اعظم کی صدارت میں ہونے والے اجلاس میں کئی اہم امورزیر بحث لائے گئے اور کئی اہم معاملات پر فیصلے کیے گئے ہیں جب کہ آئندہ ہفتے والے اہم اجلاس میں آرمی چیف بھی شرکت کریں گے قومی سلامتی سے متعلق اہم فیصلے کیے جائیں گے۔

انہوں نے شناختی کارڈ کی تصدیقی عمل کے لیے جاری نادرا کی ملک گیر مہم کی کارکردگی بتاتے ہوئے کہا کہ شناختی کارڈز کی تصدیق کے لیے ہیلپ لائن میں 37 ہزار کالز وصول ہوئی،4 غیر ملکی نادرا سے رابطہ کرکے اپنی پاکستانی شہریت سے دستبردار ہوئے جب کہ 2 ہزار سے زائد پاسپورٹ منسوخ کیے گئے اور 8 کروڑ سے زیادہ سمیں ختم کردی گئیں۔

وفاقی وزیر داخلہ نے جعلی شناختی کارڈ اور پاسپورٹ رکھنے والوں کو متنبہ کیا کہ جعلی شہریت رکھنا پرقومی سلامتی کے لئے خطرہ ہے جس پر 31 اگست کے بعد باقاعدہ مقدمات کا آغاز ہوجائے گا اور جرم ثابت ہونے کے بعد جعلی شہریت رکھنے پر31 سال سزا ہوگی