- الإعلانات -

پی ایس ایل ایک کامیاب ٹورنامنٹ ہوگا”ویوین رچرڈز”

اسلام آباد: ویسٹ انڈیز کے سابق عظیم بلے باز ویوین رچرڈز نے کہا ہے کہ ایشیائی خطے میں بے پناہ ٹیلنٹ موجود ہے اور پاکستان سپر لیگ (پی ایس ایل) کے کامیاب نہ ہونے کی کوئی وجہ ہی نہیں ہے۔خلیج ٹائمز کو دئیے گئے انٹرویو میں سابق بلے باز کا کہنا تھا کہ میں دنیا کی سرفہرست ٹی ٹوئنٹی ٹورنامنٹس (انڈین پریمئر لیگ، بگ بیش اور کیریبیئن پریمئر لیگ) سے منسلک رہا ہوں اور پی ایس ایل بھی اسی عمل کا تسلسل ہے۔ویوین رچرڈز کے مطابق کھلاڑی جارحانہ انداز میں کھیلنا چاہتے ہیں جس کےلیے پی ایس ایل سے بہتر جگہ کوئی اور نہیں ہو سکتی۔انہوںنے کہاکہ میں پاکستان کے خلاف کھیلتے ہوئے ان کے جارحانہ رویے سے ہمیشہ محظوظ ہوتا تھا۔انھوں نے کہا کہ گو کہ ویسٹ انڈیزنے پاکستان کے خلاف کامیابیاں حاصل کی تاہم میرے دور میں یہ واحد ٹیم تھی جس نے ہمارے لیے مسائل کھڑے کیے اور ان کے خلاف کھیلنا ہمشہ چیلنج ہوتا تھا۔اپنی جارحانہ بلے بازی کیلئے مشہور سابق اسٹار کے مطابق پاکستانی نوجوانوں کے لیے اپنی صلاحیتیں پی ایس ایل میں ثابت کرنے کا بہترین موقع ہے، متحدہ عرب امارات کا خوشگوار موسم ٹیموں کو ٹی ٹوئنٹی کرکٹ کے ذریعے اپنے مداحوں کو لطف اندوز کرنے کا موقع فراہم کر رہا ہے۔کوئٹہ گلیڈیئٹرز کے معاون کے مطابق یہاں لاتعداد بہترین کھلاڑی موجود ہیں جو نوجوان اور تازہ دم ہیں،کوئٹہ کی ٹیم کو جہاں میری ضرورت ہوگی وہاں میں اس ٹیم کو کامیاب بنانے کے لیے اپنی توانائی صرف کروں گا۔انہوںنے کہاکہ آج کے کھلاڑی لمبے سفر کرنے والے لڑکے ہیں اور پوری دنیا میں کھیلنے کا تجربہ رکھتے ہیں۔رچرڈز نے کہا کہ میں کوئٹہ کی ٹیم جہاں کیون پیٹرسن اور لیوک رائٹ جیسے کھلاڑی ہیں اس کا حصہ بننے پر اپنے آپ کو خوش قسمت سمجھ رہا ہوں، ٹیم کےساتھ میرا پہلا سیشن شاندار تھا اور ہم امید کرتے ہیں کہ ٹورنامنٹ میں بھی اچھا کریں گے۔