کھیل

شرجیل خان نے بحالی پروگرام میں شرکت کے لیے پی سی بی کو خط لکھ دیا

لاہور: اسپاٹ فکسنگ کے الزام میں سزا یافتہ شرجیل خان نے بحالی پروگرام میں شرکت کے لیے پی سی بی کو خط لکھ دیا ہے۔

پِی ایس سیزن 2 کے آغاز میں سامنے آنے والے اسپاٹ فکسنگ کیس میں سزا یافتہ شرجیل خان پر پابندی کی مدت 10 اگست کو ختم ہو رہی ہے، اوپنر پر ڈھائی سال معطل سمیت 5 سال کی پابندی عائد کی گئی تھی، بہتر رویہ کی وجہ سے معطل سزا کا اطلاق نہیں ہوا، کسی بھی سطح پر کرکٹ میں دوبارہ واپسی کے لیے شرجیل خان کو پی سی بی کے بحالی پروگرام میں شرکت کرنا ہوگی، شرجیل خان نے اس کے لیے پی سی بی کو خط لکھ دیا ہے۔

شرجیل خان کو بحالی پروگرام میں اپنی غلطی کا برملا اعتراف کرنے کے ساتھ پی سی بی اینٹی کرپشن یونٹ کے تحت پروگراموں میں نوجوان کرکٹرز کو فکسنگ سے بچاؤ کے لیے لیکچر بھی دینا ہوں گے۔

یاد رہے کہ اسی سپاٹ فکسنگ کیس میں شرجیل خان کے ساتھ خالد لطیف، شاہ زیب حسن اور محمد عرفان بھی سزا پا چکے، اسی کیس میں سہولت کاری کے ملزم ناصر جمشید پر بھی 10سال کی پابندی عائد کی گئی تھی۔

سری لنکا کرکٹ بورڈ کا 4 رکنی اعلیٰ سطح کا وفد کراچی پہنچ گیا

کراچی: سری لنکن کرکٹ بورڈ کا 4 رکنی اعلیٰ سطح کا وفد 4 روزہ دورہ پاکستان پر کراچی پہنچ گیا ہے۔

سری لنکن کرکٹ بورڈ کا 4 رکنی وفد سیکریٹری موہن ڈیسلوا کی قیادت میں 4 روزہ دورہ پاکستان پر کراچی پہنچ گیا ہے، چیف سیکوریٹی ایڈوائز ایئر مارشل روشن گوناتیلکے اور انٹرنیشنل کرکٹ کے نگران چندی ماماپاتونا سمیت اسٹنٹ منیجر اینٹی کرپشن و سکیوریٹی مودیا سیلا گے پالیتھا بھی وفد کا حصہ ہیں۔

پاکستان اور سری لنکا کے درمیان سیریز کے دونوں میچز عالمی ٹیسٹ چیمپئین شپ کا حصہ ہیں، ٹیسٹ میچ  اکتوبر میں کراچی اور لاہور میں کرانے کی تجویز ہے، سری لنکن وفد بدھ کی صبح سی پی او کا دورہ کرے گا، اس موقع پر وفد کوسیکوریٹی اداروں کی جانب سے تفصیلی بریفنگ دی جائے گی۔

بعد ازاں وفد نیشنل اسٹیڈیم بھی جائے گا جہاں وفد کو حفاظتی انتظامات سے آگاہ کیا جائے گا، وفد اسٹیڈیم کے مختلف حصوں کا دورہ بھی کرے گا جس کے بعد  وفد جمعرات کو لاہور روانہ ہو جائے گا، وفد دورہ پاکستان کی رپورٹ مرتب کرے گا جس کی روشنی میں سری لنکن کرکٹ ٹیم کے دورہ پاکستان کا فیصلہ ہوگا۔

حسن علی کی بھارتی کرکٹرز کو اپنی شادی میں شرکت کی دعوت

قومی کرکٹر حسن علی نے بھارتی کرکٹ ٹیم کو اپنی شادی میں شرکت کی دعوت دے دی۔

قومی ٹیم کے فاسٹ بولر کا کہنا ہے کہ بھارتی ٹیم پلیئرز ہمارے کرکٹ فیلو ہیں، میں تمام بھارتی کرکٹ ٹیم کو شادی میں مدعو کرنا چاہوں گا، انہیں بڑی خوشی ہوگی اگر بلیو شرٹس ان کی شادی میں شریک ہوں گے۔ انہوں نے کہا کہ اگر پاکستانی ٹیم میں کسی کو سربالا بنانا پڑے تو شاداب خان ان کی اولین ترجیح ہوگی، وہ 22 سال کا چھوٹا سا بچہ ہے اور میرا بہترین دوست ہے، وہ میرا ساتھ سربالا بنے اور بے شک سلامی کی تمام رقم خود ہی رکھ لے۔

حسن علی کا کہنا تھا کہ اس کے علاوہ قومی ٹیم میں سے کسی اور کو گھوڑے پر بٹھانا پڑا تو فہیم اشرف ان کی ترجیح ہوں گے، ان کے دستیاب نہ ہونے پر ان کی ترجیح فخرزمان یا بابراعظم ہوں گے۔

یاد رہے کہ حسن علی کی شادی 20 اگست کو دبئی میں ہو رہی ہے، ان کی ہونے والی شریک حیات کا نام سامعہ ہے جو کہ غیر ملکی ایئرلائن میں فلائٹ انجینئر ہیں۔ شعیب ملک کے بعد حسن علی دوسرے پاکستانی کرکٹر ہیں جو بھارتی داماد بننے جارہے ہیں۔

مزید2سال کیلیے ٹیم حوالے کرو پھر کمال دیکھو؛ آرتھر کی پیشکش

کراچی: کوچ مکی آرتھر نے پی سی بی کو پیشکش کی ہے کہ مزید2 سال کیلیے ٹیم حوالے کرو اور پھر کمال دیکھو۔

مکی آرتھر نے اس دوران کسی پاکستانی کو بطور نائب ساتھ رکھنے کا بھی کہا ہے تاکہ اسے گروم کر سکیں، دوسری جانب قومی کرکٹرز آرتھر سے خوش نہیں اور باہمی اعتماد کا فقدان نظر آتا ہے، ادھر بورڈ حکام سے خاصے قریب ایک سابق کرکٹر نے کوچنگ کیلیے سابق سری لنکن اسٹار مہیلا جے وردنے کا نام پیش کر دیا، البتہ ان کا آئی پی ایل سے بڑا معاہدہ ہے اور پاکستان انھیں اتنی بڑی رقم نہیں دے سکتا۔

تفصیلات کے مطابق مکی آرتھر نے پی سی بی سے کہا ہے کہ انھیں مزید2 سال کیلیے ذمہ داریاں سونپ دی جائیں، اس دوران وہ ٹیم کو بہتر بنا دیں گے، انھوں نے یہ بھی تجویز دی کہ کسی پاکستانی کو ان کا نائب بنایا جائے تاکہ وہ ساتھ رہ کر سیکھتے رہے اور پھر جب وہ جائیں تو کوچنگ سنبھال لے۔

دوسری جانب قومی کرکٹرز آرتھر سے خوش نہیں اور باہمی اعتماد کا فقدان نظر آتا ہے،ان کے مطابق مشکل وقت میں کوچ نظریں پھیر لیتے ہیں اور کام نہیں آتے، کرکٹ بورڈکوچ کے تقرر میں سینئر کرکٹرز سے مشاورت کا بھی سوچ رہا ہے،ایسے میں مکی آرتھر کو زیادہ حمایت ملنا دکھائی نہیں دیتا، اگر ذرائع کی اس بات کو سچ مان لیا جائے کہ کوچ نے نئے کپتان کے تقرر کی تجویز دے دی تو یہ سرفراز احمد کیلیے بہت بڑا دھچکا ہے جنھوں نے ہمیشہ آرتھر کی بات کو مانا اور محاذ آرائی سے گریز کرتے رہے۔

دوسری جانب پاکستان کرکٹ کے معاملات میں ان دنوں خاصے متحرک ایک سابق کرکٹر نے بورڈ کو تجویز دی کہ وہ کسی ایسے کوچ کا تقرر کرے جسے تینوں طرز کی کرکٹ کھیلنے کا تجربہ حاصل ہو،جدید کرکٹ کے تقاضوں کو سمجھنے کی وجہ سے وہ ٹیم کے بہت کام آئے گا،اس حوالے سے سابق سری لنکن اسٹار مہیلا جے وردنے کا نام پیش کردیا گیا،البتہ ان کا آئی پی ایل فرنچائز ممبئی انڈینز سے بہت بڑا معاہدہ ہے، پی سی بی انھیں اتنی بڑی رقم دینے کی پوزیشن میں نہیں لگتا۔

فرانسیسی سائیکلسٹ پاکستانی ثقافت اور کھانوں کے دلدادہ ہوگئے

پاکستان کے دورے پر آئے ہوئے فرانسیسی باپ بیٹا سائیکلسٹ اولیور موزاڈ اورجولیس موزاڈ پاکستانی قدرتی حسن اور منفرد کھانوں کے قائل ہو گئے۔

فرانسیسی سائیکلسٹ اولیور موزاڈ اور بیٹا جولیس موزاڈ کا کہنا تھا کہ ہم ملائشیا اور نیپال سمیت دیگر ممالک سے ہو کر پاکستان آئے ہیں، سچ پوچھیں تو یہاں کی خوبصورتی نے بہت متاثر کیا، حکومت سیاحت کی طرف بھر پور توجہ دے توپاکستان ٹوررزم کے ذریعے سالانہ خطیر رقم کما سکتا ہے۔

ایک سوال پر غیر ملکی سائیکلسٹس کا کہنا تھا کہ یہ تاثر غلط ہے کہ پاکستان میں غیر ملکیوں کی جان ومال کو خطرہ ہے، ہمیں پاکستانیوں کی مہمان نوازی نے بھر پور متاثر کیا ہے، پاکستانی مہمان نواز ہیں اور مہمانوں کی قدر کرنا جانتے ہیں، یہاں رہ کر ہم نے بعض کھانے پہلی بار کھائے ہیں، یہ کھانے واقعی مزیدار ہیں۔

اولیور موزاڈ اورجولیس موزاڈ کا کہنا تھا کہ پہلی بار پاکستان آئے ہیں، مستقبل میں بار بار یہاں آنا چاہیں گے۔ یہ بات قابل ذکر ہے کہ فرانسیسی سائیکلسٹس ان دنوںپاکستان کے دورے پر ہیں، گزشتہ روز دونوں کھلاڑیوں نے پاکستان کے 15 سائیکلسٹ کے ساتھ لاہور میں شیڈول ریلی میں بھی حصہ لیا، اب اولیور موزاڈ اورجولیس موزاڈ اسلام آباد میں موجود ہیں اور 15 روزہ دورے پر ناران سے خنجراب پاس تک کا سفر سائیکل پر طے کریں گے۔

کرس گیل پاکستانی اسپنر شاداب خان کے لیے ڈراؤنا خواب بن گئے

کینیڈا میں جاری گلوبل ٹی20 ٹورنامنٹ میں جارح مزاج ویسٹ انڈین بلے باز کرس گیل پاکستانی لیگ اسپنر شاداب خان کے لیے ڈراؤنا خواب بن گئے اور ان کے ایک اوور میں 32رنز بنا دیے۔

ایک رات قبل 122 رنز کی اننگز کھیلنے والے گیل نے اپنی عمدہ فارم کا سلسلہ جاری رکھا اور جمعہ کو شاندار اننگز کھیل کر ایڈمنٹن رائلز کو فتح سے ہمکنار کرا دیا۔

وینکوور نائٹس نے ایڈمنٹن کو فتح کے لیے 166رنز کا ہدف دیا جس کے تعاقب میں محمد حفیظ کی گیند پر ایڈمنٹن کی ٹیم پہلے ہی اوور میں وکٹ گنوا بیٹھی۔

تاہم اس کے بعد دوسرے اوپنر کرس گیل اور ان کے ساتھی چیڈوک والٹن نے جارحانہ بیٹنگ کرتے ہوئے عمدہ شراکت قائم کی۔

شاداب نے میچ کا 13واں اوور کرایا جس میں گیل نے ان کی خوب خبر لیتے ہوئے 32رنز بٹورے۔

جارح مزاج اوپننگ بلے باز نے پاکستانی اسپنر کے اوور کی پہلی دو گیندوں پر چھکے لگانے کے بعد اگلی دو گیندوں پر چوکے جڑ دیے اور پھر اوور کی آخری دو گیندوں پر چھکے لگا کر میچ کو شاداب کے لیے ڈراؤنا خواب بنا دیا۔

اگلے اوور میں بین کٹنگ نے 9 چھکوں کی مدد سے 94 رنز بنانے والے گیل کو آؤٹ کر کے لگاتار دوسرے میچ میں سنچری بنانے کے اعزاز سے محروم کردیا۔

تاہم گیل کی شاندار اننگز کی بدولت ایڈمنٹن نے میچ میں باآسانی 6 وکٹوں سے کامیابی حاصل کر لی۔

یہ میچ شاداب کے لیے زیادہ اچھا ثابت نہ ہوا جہاں انہوں نے اپنے چار اوورز کے کوٹے میں 66رنز دیے اور پھر بیٹنگ میں بھی وہ بغیر کوئی رن بنائے پویلین لوٹ گئے۔

پاکستان کرکٹ میں سدھار لانے کیلیے نسخوں کی تلاش شروع

لاہور: پاکستان کرکٹ میں سدھار لانے کیلیے نسخوں کی تلاش شروع کر دی گئی۔

اپنے قیام کے 8ماہ تک غیر فعال نظر آنے والی پی سی بی کی کرکٹ کمیٹی کو پہلی بڑی ذمہ داری مل ہی گئی، ورلڈکپ کی ناکام مہم کے بعد تبدیلیوں کی لہر چلنا یقینی ہے، کمیٹی کو مستقبل کے حوالے سے اہم سفارشات تیار کرکے چیئرمین پی سی بی احسان مانی کے سپرد کرنا ہیں، چیف سلیکٹر انضمام الحق نوشتہ دیوار پڑھتے ہوئے عہدہ چھوڑ چکے،ان کے جانشن کا انتخاب ہونا ہے،موزوں امیداروں کے ناموں پر غور ہوگا۔

ہیڈ کوچ مکی آرتھر اور معاون اسٹاف کے مستقبل کا بھی فیصلہ ہونا باقی ہے،بیٹنگ کوچ گرانٹ فلاور نے تو پہلے ہی ورلڈکپ کو اپنی آخری ذمہ داری قرار دے دیا تھا، مکی آرتھر کو آئندہ سال شیڈول ورلڈ ٹی ٹوئنٹی تک برقرار رکھا جا سکتا ہے۔

سرفراز احمد سے ٹیسٹ ٹیم کی قیادت واپس لے کر صرف ون ڈے اور ٹی ٹوئنٹی فارمیٹ تک محدود کرنے کی تجویز بھی زیرغور ہے،ٹیسٹ اور محدود اوور کی کرکٹ کیلیے الگ الگ کوچز رکھنے کی اطلاعات گردش میں ہیں۔

پی سی بی کے ایم ڈی وسیم خان کرکٹ کمیٹی کے بھی سربراہ ہیں،ان کی زیر صدارت جمعے کی شام 5بجے قذافی اسٹیڈیم لاہورمیں ہونے والے اجلاس میں سابق کپتان مصباح الحق، قومی ویمنز ٹیم کی سابق کپتان عروج ممتاز، ڈائریکٹر انٹرنیشنل کرکٹ ذاکر خان، ڈائریکٹر ڈومیسٹک کرکٹ ہارون رشید اور ڈائریکٹر کرکٹ اکیڈمیز مدثر نذر شریک ہوں گے۔

کینیڈا میں موجود وسیم اکرم ویڈیو لنک کے ذریعے شامل ہوں گے،سابق چیف سلیکٹر انضمام الحق، تاحال ہیڈ کوچ مکی آرتھر اور کپتان سرفراز احمد الگ الگ کمیٹی کے سامنے پیش ہوتے ہوئے ٹیم کی کارکردگی اور آئندہ کے امکانات پر بات کریں گے،کارکردگی کا پوسٹ مارٹم کرنے کے بعد کمیٹی سفارشات مرتب کرکے چیئرمین پی سی بی احسان مانی کو بھجوائے گی،ان کی روشنی میں پاکستان کرکٹ کے مستقبل کی راہوں کا تعین ہوگا۔

پی سی بی کے مطابق اجلاس میں نہ صرف قومی مینز بلکہ ویمنز، انڈر16اور انڈر19ٹیموں کی گزشتہ 3سال کی کارکردگی کا جائزہ لیتے ہوئے سفارشات مرتب کرکے چیئرمین بورڈ احسان مانی کے حوالے کردی جائیں گے۔

کوہلی کی ٹوئٹ سے روہت شرما غائب، بھارتی کپتان کو نئے تنازع کا سامنا

بھارتی کرکٹ ٹیم کے کپتان ویرات کوہلی نے گزشتہ دنوں ٹیم میں کسی بھی قسم کے اختلافات کی سختی سے تردید کی تھی تاہم اب ان کی ایک ٹوئٹ سے نئے تنازع نے جنم لے لیا ہے۔

گزشتہ دنوں دورہ ویسٹ انڈیز کے لیے روانگی سے قبل پریس کانفرنس سے خطاب کرتے ہوئے ویرات کوہلی نے ٹیم میں اختلافات کی خبروں پر برہمی کا اظہار کرتے ہوئے پوچھا تھا کہ اس طرح کی خبریں کون پھیلا رہا ہے۔

واضح رہے کہ ورلڈ کپ کے سیمی فائنل میں بھارتی ٹیم کی شکست کے بعد بھارتی ٹیم خصوصاً کپتان ویرات کوہلی اور ان کے نائب روہت شرما کے درمیان اختلافات کی خبریں سامنے آئی تھیں۔

کوہلی نے خصوصی طور پر روہت سے اختلافات کی خبروں کو مسترد کرتے ہوئے اوپننگ بلے باز اور نائب کپتان کو ٹیم کا سب سے اہم رکن اور اپنا دوست قرار دیا تھا۔

تاہم اب بھارتی ٹیم کے کپتان کی تصویر کی حامل ایک ٹوئٹ پر نیا تنازع کھڑا ہو گیا ہے۔

بھارتی ٹیم ویسٹ انڈیز کے خلاف ہفتے سے شروع ہونے والی تین ٹی20 میچوں کی سیریز کے لیے امریکا پہنچ گئی ہے اور اس دوران کھلاڑیوں نے فلوریڈا میں پریکٹس سمیت لطف اندوز ہونے کی تصاویر سوشل میڈیا پر شیئر کیں۔

جمعہ کو بھارتی ٹیم کے کپتان ویرات کوہلی نے بھی اپنے ٹیم کے کھلاڑیوں کے ساتھ ایک تصویر انسٹا گرام پر شیئر کی جس کے کیپشن میں انہوں نے صرف ‘ٹیم’ کا لفظ استعمال کیا۔

اس تصویر میں کوہلی کے ساتھ ساتھ رویندرا جدیجا، نوودیپ سینی، خلیل احمد، شریاس آیر، کرونال پانڈیا، بھوونیشور کمار اور لوکیش راہُل شامل ہیں۔

بھارتی شائقین نے اس تصویر میں مایہ ناز اوپننگ بلے باز اور ٹیم کے نائب کپتان روہت شرما کی کمی شدت سے محسوس کی اور ان کی عدم موجودگی پر برہمی کا اظہار کیا۔

جہاں کچھ لوگوں نے اوپننگ بلے باز کی عدم موجودگی کے حوالے سے سوال کیا تو کچھ شائقین نے لکھا کہ بھارتی اسکواڈ روہت شرما کے بغیر اسکواڈ ہی نہیں۔

چند بھارتی شائقین نے لکھا کہ کوئی بھی اسکواڈ روہت شرما اور شیکھر دھاون کے بغیر نامکمل ہے جبکہ کچھ نے بھارتی ٹیم کے کپتان سے سوال کیا کہ ان کی تصویر میں ہر دفعہ روہت کیوں غائب ہوتے ہیں۔

چند لوگوں نے تو یہاں تک کہہ دیا کہ اس کا مطلب یہ ہے کہ یہ آپ کی ٹیم ہے اور بقیہ لوگ روہت شرما کے ساتھ ہیں۔

ویرات کوہلی اور روہت شرما کے درمیان اختلافات کی خبروں کو اس وقت تقویت ملی تھی جب روہت شرما نے کوہلی کی اہلیہ اور معروف بالی وڈ اسٹار انوشکا شرما کو انسٹا گرام پر ان فالو کردیا تھا۔

واضح رہے کہ کوہلی نے امریکا روانگی کے وقت بھی جو ٹوئٹ کی تھی اس میں بھی روہت شرما موجود نہیں تھے۔

Google Analytics Alternative