- الإعلانات -

بابر کے بعد شاہین اور عماد کا بھی ٹی20 بلاسٹ میں معاہدہ

قومی ٹیم کے کپتان بابر اعظم کے بعد اب فاسٹ باؤلر شاہین شاہ آفریدی اور آل راؤنڈر عماد وسیم کا بھی انگلینڈ کی لیگ ٹی20 بلاسٹ سے معاہدہ ہوگیا۔

شاہین شاہ آفریدی لیگ میں ہیمپشائر جبکہ عماد وسیم ناٹنگھم شائر کی نمائندگی کریں گے۔

ٹی20 بلاسٹ کے شیڈول کے اعلان کے بعد سے ہیمپشائر قومی ٹیم کے فاسٹ باؤلر شاہین شاہ آفریدی سے ان کے ایجنٹ کے ذریعے مستقل رابطے میں تھی۔

تاہم اب فاسٹ باؤلر نے بقیہ 7 میچز کے لیے اپنی دستیابی ظاہر کردی ہے اور اگر ٹیم ناک آؤٹ میچز کے لیے کوالیفائی کرتی ہے تو شاہین وہاں بھی نمائندگی کریں گے۔

ہیمپشائر کی ٹیم سفری پابندیوں کی وجہ سے کائل ایبٹ اور فیڈل ایڈورڈز کی خدمات سے محروم ہے جبکہ لیام ڈاسن انجری کے سبب ایونٹ سے باہر ہو چکے ہیں اور ایسے میں پاکستانی فاسٹ باؤلر کی دستیابی ان کے لیے نیک شگون ہے۔

عماد وسیم کا ناٹنگھم شائر سے معاہدہ ہوا ہے— فوٹو: رائٹرز
ہیمپشائر نے ایونٹ میں پہلا میچ پیر کو جیتا تھا اور شاہین شاہ آفریدی بدھ کو سرے کے خلاف میچ میں کاؤنٹی کے لیے اپنا ڈیبیو کریں گے۔

تاہم شاہین شاہ آفریدی کے برعکس عماد وسیم کا ناٹنگھم شائر سے باضابطہ معاہدہ یا رابطہ نہیں ہوا تھا لیکن انہوں نے گزشتہ سال 7 میچوں میں کاؤنٹی ٹیم کی نمائندگی کی تھی۔

گزشتہ سال عماد وسیم نے سات میچوں میں کاؤنٹی کی نمائندگی کرتے ہوئے 10 وکٹیں لی تھیں جس میں کوارٹر فائنل میں حاصل کی گئی اے بی ڈی ویلیئرز کی اہم وکٹ بھی شامل ہے۔

انہوں کل انگلینڈ کے خلاف ٹی20 میچ کے بعد 24 گھنٹے کے اندر اندر آج لنکاشائر کے خلاف میچ میں ناٹنگھم شائر کی نمائندگی کی۔

ان دونوں کھلاڑیوں سے قبل کپتان بابر اعظم نے بھی 7 میچوں کے لیے سمرسیٹ سے معاہدہ کیا تھا۔