- الإعلانات -

سری لنکا کی آسٹریلیا کو ٹیسٹ سیریز میں شکست

گال: سری لنکا نے آسٹریلیا کو سیریز کے دوسرے ٹیسٹ میچ کے تیسرے روز 229 رنز سے شکست دے کر 3 میچوں کی سیریز وارن-مرلی دھرن ٹرافی میں 2-0 کی فیصلہ کن برتری حاصل کر لی۔

گال میں کھیلے گئے میچ کے تیسرے روز جب کھیل کا آغاز ہوا تو آسٹریلیا کا اسکور 3 وکٹوں کے نقصان پر 25 رنز تھا جبکہ انھیں جیت کے لیے 388 رنز درکار تھے۔

سری لنکا کے دلروان پریرانے شاندار باؤلنگ کا مظاہرہ کرتے ہوئے میزبان ٹیم کو مختصر مجموعے میں سمیٹ دیا۔

ڈیوڈ وارنر واحد بلے باز تھے جنھوں نے سب سے زیادہ 41 رنز بنائے ان کے علاوہ دیگر بلے باز مکمل طور پر ناکام رہے۔

کپتان اسٹیون اسمتھ اور ڈیوڈ وارنر کی شراکت میں 51 رنز کا اضافہ ہوا، وارنر کے آؤٹ ہونے کے بعد اسمتھ نے کرس ووگس کے ساتھ 19 بنائے تھے لیکن پریرا نے انھیں 30 کے انفرادی اسکور پر پویلین بھیج دیا۔

ووگس 28، مچل اسٹارک 24 اور پیٹرنیول 24 رنز بنا کر آؤٹ ہوئے۔

آسٹریلیا کی پوری ٹیم 183 رنز بنا کر پویلین لوٹ گئی اور میچ 229 رنز سے ہار گئی یوں سری لنکا نے سیریز میں فیصلہ کن برتری حاصل کرلی۔

قبل ازیں سری لنکا نے پہلی اننگز میں 281 رنز بنائے تھے جس کے بعد آسٹریلیا کی ٹیم 106 رنز بنا سکی جبکہ دوسری اننگز میں سری لنکا نے 413 رنز کی برتری حاصل کی۔

گال ٹیسٹ کے دوسرے روز 21 وکٹیں گری تھیں اور تیسرے روز سری لنکا نے بقیہ 7 وکٹیں بھی حاصل کر کے میچ کا نتیجہ اپنے حق میں کر دیا۔

سری لنکا کی جانب سے دوسری اننگز میں پریرا نے 6 اور ہیراتھ نے 2 وکٹیں حاصل کیں۔

پریرا میچ 10 وکٹیں اور نصف سنچری بنانے والے پہلے سری لنکن کھلاڑی ہیں اسی شاندار آل راؤنڈ کارکردگی پر انھیں میچ کا بہترین کھلاڑی قرار دیا گیا۔

سری لنکا نے پالی کیلے میں کھیلے گئے پہلے میچ میں آسٹریلیا کو 106 رنز سے شکست دے کر سیریز میں 0-1 برتری حاصل کی تھی۔

سیریز کا تیسرا اور آخری ٹیسٹ میچ 13 اگست کو کولمبو میں شروع ہوگا۔