- الإعلانات -

برازیل، جرمنی ریواولمپکس میں مشکلات کا شکار

ریو ڈی جنیرو: اولمپک میزبان برازیل کی فٹ بال ٹیم گروپ اے میں عراق کے خلاف میچ میں برابری کے بعد ایک دفعہ پھر کسی بڑے ایونٹ سے باہر ہونے کے قریب پہنچ گئی۔

برازیل کو ریواولمپکس 2016 سے باہر ہونے سے بچنے کے لیے بدھ کو ڈنمارک کے خلاف ہونے والے میچ میں کامیابی حاصل کرنا ضروری ہے۔

نیمار کی قیادت میں برازیلی ٹیم گروپ اے میں اپنے پہلے میچ میں جنوبی افریقہ سے جیتنے میں ناکام ہوئی تھی اور میچ برابری پر ختم ہوگیا تھا جبکہ عراق کے خلاف دوسرے میچ میں سابق عالمی چمپیئن فیورٹ تھی تاہم کامیاب نہ ہوسکی۔

فٹ بال ورلڈ کپ 2014 میں بھی میزبان برازیل کو جرمنی کے ہاتھوں 1-7 کی عبرت ناک شکست کے ساتھ ٹورنامنٹ سے باہر ہونا پڑا تھا۔

خیال ظاہر کیا جارہا تھا کہ نیمار کی موجودگی میں 5 مرتبہ کی عالمی چمپیئن ٹیم ایک دفعہ پھر اولمپکس میں بہترین کارکردگی کا مظاہرہ کرے گی لیکن وہ ان امیدوں پر پورے نہیں اترسکے۔

پرتگال اور نائجیریا دو ٹیمیں ہیں جنھوں نے کوارٹرفائنل میں اپنی جگہ بنالی۔ پرتگال نے ہنڈوراس کو 1-2 اور نائجیریا نے سویڈن کو 0-1 سے شکست دی تھی۔

فٹ بال کے دیگر مقابلوں میں ارجنٹینا، ڈنمارک اور میکسیکو کی ٹیموں نے بھی اپنے اپنے میچوں میں کامیابی حاصل کی۔

عالمی چمپیئن جرمنی کو جنوبی کوریا سے جیت حاصل کرنے میں ناکامی کا منہ دیکھنا پڑا، سلواڈور میں کھیلے گئے میچ میں جرمنی نے 3 گول کئے اور جواب میں جنوبی کوریا نے بھی تین گول کئے یوں 3-3 سے یہ میچ برابر رہا۔

جرمنی اپنے گروپ میں میکسیکو اور جنوبی کوریا سے پوائنٹس کی بنیاد پر پیچھے ہے اور گروپ میں تیسرے نمبر پر موجود ہیں۔