- الإعلانات -

انگلینڈ اور آئر لینڈ کیخلاف پاکستانی ون ڈے اسکواڈ کا اعلان

کراچی: پاکستان نے رواں ماہ آئرلینڈ اور انگلینڈ کے خلاف ہونے والی ون ڈے سیریز کے لیے قومی ٹیم کا اعلان کردیا جس میں عمرگل کی طویل عرصے بعد واپسی ہوئی ہے۔

32 سالہ فاسٹ باؤلر عمرگل طویل عرصے بعد ٹیم میں جگہ بنانے میں کامیاب ہوئے ہیں اور سلیکٹرز نے انھیں بہترفیلڈنگ کی صلاحیت اور بہتر فٹنس کی وجہ سے محمدعرفان پر ترجیح دی ہے۔

عمرگل نے 22 اپریل 2015 کو بنگلہ دیش کے خلاف ڈھاکا میں آخری دفعہ ون ڈے میچ کھیلا تھا جس میں قومی ٹیم کو8 وکٹوں سے شکست ہوئی تھی اور عمر گل کوئی وکٹ حاصل کرنے میں ناکام رہے تھے جبکہ 7 اوورز کے کوٹے میں 53 رنز بھی دیے تھے۔

انگلینڈ کے خلاف جاری ٹیسٹ سیریز کے تیسرے میچ میں اپنی بہترین صلاحیتوں سے کرکٹ کے ماہرین کو متاثرکرنے والے نوجوان بلے باز سمیع اسلم کو بھی ون ڈے ٹیم میں شامل کیا گیا ہے۔

ون ڈے ٹیم میں شرجیل خان کی دوسال بعد واپسی ہوئی ہے، ان کو پاکستان اے ٹیم کے دورہ انگلینڈ میں 63 کی اوسط سے رنز بنانے پر ٹیم کا حصہ بنایا گیا ہے۔

شرجیل خان نے اے ٹیم کی نمائندگی کرتے ہوئے سری لنکا اے اور انگلینڈ لائنز کے خلاف بالترتیب 90 اور 125 رنز کی اننگز کھیلی تھی۔

چف سلیکٹر انضمام الحق نے ٹیم کا اعلان کرتے ہوئے کہا کہ ‘ٹیم کے انتخاب کے لیے ٹیم انتظامیہ اور کپتان سے مشورہ کیا گیا اور اس معاملے میں ان سب کی رضامندی شامل ہے’۔

انضمام الحق کا کہنا تھا کہ ‘ٹیم کو انگلینڈ کی کنڈیشنز اور کچھ کھلاڑیوں کی ڈومیسٹک اور اے ٹیم کے دورے میں حالیہ کارکردگی کو مدنظر رکھتے ہوئے منتخب کیا گیا ہے’۔

چیف سلیکٹر نے کہا کہ ‘ٹیم تجربہ کار اور نوجوان کھلاڑیوں پر مشتمل بہترین دستہ ہے اور سلیکٹرز کو یقین ہے کہ ٹیم اچھا کرے گی’۔

پاکستان ٹیم آئرلینڈ کے خلاف دو ون ڈے میچز 18 اگست اور 20 اگست کو کھیلے گی جس کے بعد انگلینڈ کے خلاف 5 میچوں کی سیریز ہوگی۔

آئرلینڈ اور انگلینڈ کے خلاف ون ڈے سیریز کے لیے پاکستان ٹیم میں شامل کھلاڑی درج ذیل ہیں۔

اوپنرز: اظہرعلی (کپتان)، شرجیل خان، سمیع اسلم

مڈل آرڈر: محمد حفیظ، بابراعظم، شعیب ملک

وکٹ کیپر: سرفرازاحمد، محمد رضوان

فاسٹ باؤلرز: محمد عامر، وہاب ریاض، حسن علی، عمرگل

اسپنرز: یاسرشاہ، عماد وسیم، محمد نواز