- الإعلانات -

کرکٹ ٹیم مینجمنٹ میں ایک بار پھر انتخاب عالم منیجر مقرر.

لاہور: پاکستان کرکٹ ٹیم کی مینجمنٹ میں ایک بار پھر سابق کپتان انتخاب عالم کی واپسی ہوئی ہے جنہیں نوید اکرم چیمہ کی جگہ دورہ زمبابوے کیلئے قومی ٹیم کا منیجر مقرر کردیا گیا ہے۔

ہر دور میں کسی نہ کسی طرح پاکستان کرکٹ بورڈ سے منسلک رہنے والے انتخاب عالم کو ایک بار پھر قومی ٹیم مینجمنٹ میں شامل کر لیا گیا ہے۔

یاد رہے کہ 1992 کے عالمی کپ اور 2009 کے ورلڈ ٹی ٹوئنٹی میں جب پاکستانی ٹیم چیمپیئن بنی تو قومی ٹیم کے منیجر انتخاب عالم ہی تھے۔

لیکن جب کبھی بھی انہیں منیجر کے عہدے سے ہٹایا گیا تو ساتھ میں بورڈ میں کسی اور اہم عہدے سے نواز دیا گیا۔

قومی ٹیم کے سابق منیجر نوید اکرم چیمہ کو فیڈرل پبلک سروس کمیشن کا چیئرمین مقرر کردیا گیا تھا اور انہوں نے اپنی نئی ذمے داریوں کے سبب قومی ٹیم منیجر کے عہدے سے استعفیٰ دے دیا تھا اور اس حوالے سے چیئرمین پی سی بی شہریار خان کو بھی آگاہ کردیا تھا۔

پی سی بی نے گزشتہ اخراجات میں کمی کیلئے ڈاؤن سائزنگ کا عمل شروع کرتے ہوئے ڈائریکٹر ڈومیسٹک اور ڈائریکٹر انٹرنیشنل کے عہدوں کو ختم کردیا تھا اور ان عہدوں پر بالترتیب مامور انتخاب عالم اور ذاکر خان کو بھی عہدوں سے فارغ کردیا گیا تھا۔

لیکن اس اعلان کے چند دن بعد ہی 73 سالہ انتخاب عالم کو ایک اور ذمے داری سونپتے پوئے قومی ٹیم کے منیجر کے عہدے پر فائض کردیا گیا ہے۔

ذرائع کے مطابق انتخاب عالم کو یہ ذمے داری فی الحال صرف دورہ زمبابوے کے لیے سونپی گئی ہے اور دورہ انگلینڈ کے لیے منیجر کا اعلان بعد میں کیا جائے گا۔

ادھر پاکستان اور زمبابوے کے درمیان کھیلی جانے والی کرکٹ سیریز کے لوگو کی رونمائی کے موقع پر مہمان خصوصی انتخاب عالم نے کہا کہ سیریز میں ڈسپلن کے خلاف ورزی پر کوئی سمجھوتہ نہیں کیا جائے گا، ڈسپلن ہو گا تو ہی ٹیم کامیاب ہو گئی۔

ان کا کہنا تھا کہ زمبابوبے ہمیشہ ہوم کنڈیشنز میں سخت حریف ہوتی ہے اور کامیابی کے لئے کھلاڑیوں کو سخت محنت کرنا ہو گی۔

مینجر قومی کرکٹ ٹیم کے مطابق پاکستانی ٹیم نے خوب محنت کی ہے اور دورہ زمبابوے انگلینڈ کے خلاف متحدہ عرب امارات میں ہوم کرکٹ سیریز کے لئے تیاری کا بہترین موقع ثابت ہوگی۔