کھیل

اپنے ہوم گراؤنڈ پر بڑا ایونٹ جیتنے کا خواب پورا ہوگیا، سرفراز احمد

کراچی:  پی ایس ایل 4کی فاتح ٹیم کوئٹہ گلیڈی ایٹرزکے کپتان سرفراز احمد ٹرافی لیکرموہٹہ پیلس پہنچ گئے۔

تاریخی حیثیت کی حامل عمارت کے احاطے میں سرفراز احمد نے ٹرافی کے ساتھ تصاویر بھی بنوائیں، اس موقع پر سرفراز احمد کا کہنا تھا کہ فائنل جیتنے کی بہت خوشی ہے، خواب تھا کہ اپنے ہوم گراؤنڈ پر کوئی بڑا ایونٹ جیتوں، فائنل کا ماحول بھی زبردست تھا۔

کپتان کوئٹہ گلیڈی ایٹر نے کہا کہ ہماری ٹیم مینجمنٹ نے پورے سال بھرپور محنت کی جبکہ ہمارے قومی اورغیرملکی کھلاڑیوں نے بھی فتح پانے کے لیے مل کر جدوجہد کی جس کے نتیجہ میں ہم فتح سے ہمکنار ہوئے۔

واڈا سے تنازع پر بھارتی بورڈ نے گھٹنے ٹیک دیے

ممبئی: بھارتی کرکٹ بورڈ نے آخر اینٹی ڈوپنگ ایجنسی تنازع پر گھٹنے ٹیک دیے۔

انٹرنیشنل کرکٹ کونسل کے چیئرمین ششانک منوہر اور بی سی سی آئی کے اعلیٰ حکام و کمیٹی آف ایڈمنسٹریٹرز کے نمائندوں کے درمیان مختلف معاملات پر بات ہوئی جس میں مقامی ڈوپنگ ایجنسی کے ساتھ کام کرنے اور آئی سی سی ایونٹس کو ٹیکس سے مستثنیٰ قرار دینے کے معاملے پر بات ہوئی جس میں بی سی سی آئی اس بات پر راضی ہوگیا ہے کہ وہ اگلے 6 ماہ تک نیشنل اینٹی ڈوپنگ ایجنسی کے ساتھ کام کریں گے تاہم  اس کے ساتھ شرط رکھی ہے کہ کھلاڑیوں کے یورین سیمپل خود ان کا اپنا نمائندہ جمع کریگا کیونکہ وہ اس سلسلے میں نیشنل اینٹی ڈوپنگ ایجنسی کے آفیشلز پر بھروسہ نہیں کرسکتے جبکہ مقامی لیبارٹری سے صرف  10 فیصد سیمپلز کی چیکنگ کرائی جائے گی۔

یاد رہے کہ عالمی اینٹی ڈوپنگ ایجنسی واڈا نے انٹرنیشنل کونسل کو خبردار کیا تھا کہ اگر بھارتی بورڈ اپنی مقامی ایجنسی کے ساتھ کام نہیں کرتا تو وہ آئی سی سی کو اینٹی ڈوپنگ قوانین کا نافرمان قرار دے دیں گے۔

دوسری جانب بی سی سی آئی حکام کی جانب سے ششانک منوہرکویقین دہانی کرائی گئی کہ انتخابات کے بعد نئی حکومت سے ٹیکس استثنیٰ پر بات کی جائے گی جبکہ مستقبل کے ایونٹس میں ٹیکس کی رقم خود ادا کرنے کے معاملے پر بی سی سی آئی کے ایک آفیشل کا کہنا تھا کہ ہم نے انٹرنیشنل کرکٹ کونسل پر واضح کردیا ہے کہ ایسی صورت میں ہم یہاں پر منعقد ہونے والے ایونٹس میں فی میچ  3 لاکھ 50 ہزار ڈالر میزبانی فیس چارج کریں گے۔

پی ایس ایل فائنل کی اختتامی تقریب میں فنکاروں کی شاندار پرفارمنس

 کراچی: پی ایس ایل فور کی رنگا رنگ اختتامی تقریب نیشنل اسٹیڈیم کراچی میں ہوئی جس میں فنکاروں نے شاندار پرفارمنس کا مظاہرہ کیا۔ 

پاکستان سپر لیگ فائنل کی رنگا رنگ اختتامی تقریب نیشنل اسٹیڈیم کراچی میں ہوئی، اختتامی تقریب سے قبل سانحہ نیوزی لینڈ میں شہید افراد سے اظہار یکجہتی کے لیے گراؤنڈ میں ایک منٹ کی خاموشی بھی اختیار کی گئی۔ اختتامی تقریب میں گلوکار ابرار الحق، آئمہ بیگ اور فواد خان سمیت جنون بینڈ نے پرفارمنس کا شاندار مظاہرہ کیا جس پر گراؤنڈ میں موجود شائقین بھی جھوم اٹھے۔

صدرمملکت عارف علوی، آرمی چیف جنرل قمر جاوید باجوہ، ترجمان پاک فوج میجر جنرل آصف غفور، وزیر مملکت برائے داخلہ شہریار آفریدی، گورنر سندھ عمران اسماعیل، ڈی جی رینجرز، وزیر ریلوے سمیت ارکان صوبائی اسمبلی بھی پی ایس ایل کا فائنل میچ دیکھنے کے لیے نیشنل اسٹیڈیم میں موجود ہیں۔

تقریب سے خطاب کرتے ہوئے چیئر مین پی سی بی احسان مان کا کہنا تھا کہ کراچی میں پی ایس ایل کا فائنل کرانا فخر ہے، کرکٹ کا گیم ہی لوگوں کے چہروں پر خوشی لاتا ہے، وزیر اعظم عمران خان سمیت وزیر اعلیٰ سندھ مراد علی شاہ، سیکورٹی فورسز اور عوام کا شکریہ ادا کرتا ہوں جن کی مدد سے پی ایس ایل کا فائنل یہاں ہو رہا ہے۔

اس موقع پر وزیراعلیٰ سندھ مراد علی شاہ کا کہنا تھا کہ 2 سال پہلے وعدہ کیا تھا پی ایس ایل یہاں لائیں گے، اس سال سارے میچز یہاں ہو رہے، کراچی والے جیت گئے، جو بھی ٹیم جیتے، جیت کرکٹ اور پاکستان کی ہوگی۔

پی ایس ایل کے چوتھے ایڈیشن کا فائنل آج نیشنل اسٹیڈیم کراچی میں کھیلا جائے گا، میچ رات 8بجے شروع ہوگا۔ کوئٹہ گلیڈی ایٹرز ٹائٹل کی پیاس بجھانے کیلیے بے تاب ہے، کپتان سرفراز احمد کو ایونٹ کے ٹاپ اسکورر شین واٹسن کی خدمات میسر ہونگی، عمر اکمل، احمد شہزاد، رلی روسو اور احسان علی بھی حریفوں کے چھکے چھڑانے کی کوشش کریں گے۔

آل راؤنڈرز ڈیوائن براوو، اور محمد نواز، تجربہ کار پیسر سہیل تنویر اور باصلاحیت محمد حسنین دھاک بٹھانے کیلیے تیار ہیں، انجرڈ اسپنر فواد احمد کی شرکت یقینی نہیں ہے، حالیہ ایونٹ کے تینوں باہمی مقابلوں میں حریف پر فتوحات سے کوئٹہ گلیڈی ایٹرز کا اعتماد بلندیوں پر ہے۔

دوسری جانب پشاورزلمی کی ٹیم بھی 2017 کی تاریخ دہراتے ہوئے دوسری بار چیمپئن بننے کا عزم لیے میدان میں اتریگی، ٹاپ آرڈر میں جارح مزاج کامران اکمل اور ان فارم امام الحق موجود ہیں،میچ ونرز کیرون پولارڈ اور ڈیرن سیمی بھی دستیاب ہیں، چوتھے ایڈیشن کے کامیاب ترین بولر حسن علی، برق رفتار وہاب ریاض، سلو بال کے ماہر ٹائمل ملز اور پیسر کرس جورڈن حریف ٹیم کی بیٹنگ کا حوصلہ آزمائیں گے۔

پی ایس ایل 4؛ رمیز راجا کے سوشل میڈیا پر چرچے

پی ایس ایل 4 کا جنون پورے عروج پر ہے شائقین کرکٹ جہاں اپنی پسندیدہ ٹیموں کو سپورٹ کررہے ہیں وہیں سوشل میڈیا پر پی ایس ایل 4 کے حوالے سے مختلف پوسٹس بھی شیئر کرائی جارہی ہیں تاہم سوشل میڈیا پر پی ایس ایل کے ساتھ سابق کرکٹر اور کمینٹیٹر رمیز راجا بھی چھائے ہوئے ہیں۔

رمیز راجا کی پی ایس ایل 4 کے دوران پی ایس ایل پریزینٹر اور سابق مس آسٹریلیا ایرن ہالینڈ کے ساتھ خوبصورت  کیمسٹری کے چرچے پورے سوشل میڈٖیا پر چھائے ہوئے ہیں۔ صارفین دونوں کی نزدیکیوں پر دلچسپ تبصرے کررہے ہیں۔ ایک صارف نے دونوں کی تصویر شیئر کرتے ہوئے لکھا ’’ہائے ہائے مزے‘‘۔

ایک صارف نے رمیز راجا کی پی ایس ایل4 اورپی ایس ایل3 کی تصاویر شیئر کیں جن میں وہ اداکارہ نیلم منیر اور ایرن ہالینڈ کے ساتھ نظر آرہے ہیں اس تصویر پر مزاحیہ تبصرہ کرتے ہوئے لکھاگیا ’’ابھی تک تو پی ایس ایل رمیز راجاجیت رہا ہے۔‘‘

رمیز راجا کی ایرن ہالینڈ اور زینب عباس کے ساتھ ایک تصویر سوشل میڈیا پر گردش کررہی ہے جس پر مختلف مزاحیہ کمنٹس کیے جارے ہیں کسی صارف نے تصویر پر تبصرہ کرتے ہوئے لکھا’’پرنس بسکٹ چاکلیٹ کے ساتھ‘‘

ایک اور صارف نے اس تصویر کو شامی کباب برگر سے تشبیہ دی۔

ایک سوشل میڈیا اکاؤنٹس سے رمیز راجا کی چند تصاویر شیئر کی گئیں جن پر یہ کیپشن درج تھاجب سب لوگ پاک بھارت جنگ میں مصروف تھے  رمیز راجا اپنا گیم کھیل رہے تھے۔

اس کے علاوہ رمیز راجا اورایرن ہالینڈ کی ایک ویڈیو بھی سوشل میڈیا پر گردش کررہی ہے جس پر کچھ صارفین نے رمیز راجا اورایرن کے درمیان دوستی کو تنقید کا نشانہ بناتے ہوئے لکھا ہے ’’کوئی توروک لو رمیز بھائی کو، کیسی لگی رمیز بھائی کی پرفارمنس؟‘‘

نیشنل اسٹیڈیم کراچی میں پی ایس ایل 2019 کی اختتامی تقریب

کراچی کے نیشنل اسٹیڈیم میں پاکستان سپر لیگ (پی ایس ایل) 2019 کی اختتامی تقریب منعقد ہوئی جہاں ابتدائی طور پر چیئرمین پاکستان کرکٹ بورڈ (پی سی بی) احسان مانی نے خطاب کرتے ہوئے حکومت اور سیکیورٹی اداروں کا شکریہ ادا کیا۔

پی ایس ایل 2019 کے فائنل سے قبل تقریب کے باقاعدہ آغاز سے قبل نیوزی لینڈ میں شہید ہونے والے نمازیوں سے اظہارِ یکجہتی کیا اور اسٹیڈیم میں ایک منٹ کی خاموشی اختیار کی گئی۔

نیشنل اسٹیڈیم کراچی تماشائیوں سے کھچاکھچ بھرا ہوا تھا اور 28 ہزار سے زائد افراد میچ دیکھنے کے لیے اسٹیڈیم پہنچے تھے۔

اس کے بعد تقریب کا باقاعدہ آغاز چیئرمین پاکستان کرکٹ بورڈ (پی سی بی) احسان مانی کے خطاب سے ہوا جنہوں نے کہا کہ آج پشاور زلمی اور کوئٹہ گلیڈی ایٹرز کے درمیان فائنل ہے جو ٹیم جیتے گی وہ ٹرافی لے جائے گی، لیکن اصل ایوارڈ کے حق دار کراچی والے ہیں۔

چیئرمین پی سی بی نے کہا کہ میں کراچی والوں کو کرکٹ کو سپورٹ کرنے پر تمام شائقین کرکٹ کا شکریہ ادا کرتاہوں۔

احسان مانی نے کہا کہ کراچی میں پی ایس ایل منعقد کروانے پر تمام اداروں نے پی سی بی کے ساتھ بھرپور تعاون کیا اور میں تمام اداروں کا شکریہ ادا کرتا ہوں۔

ان کا کہنا تھا کہ فائنل میں موجود دونوں بہترین ٹیمیں ہیں دونوں ہی میچ جیتنے کی کوشش کریں گی۔

اس موقع پر گفتگو کرتے ہوئے وزیرِاعلیٰ سندھ مراد علی شاہ کا کہنا تھا کہ ہم نے 2 سال قبل اسی میدان میں کہا تھا کہ ہم پی ایس ایل کراچی لے آئیں گے، آج حکومت اور کراچی والوں نے یہ کردکھایا ہوں۔

وزیراعلیٰ سندھ کا کہنا تھا کہ آج جو بھی ٹیم میچ جیتے گی اس سے جیت کرکٹ کی اور کراچی والوں کی ہوگی۔

ان کا یہ بھی کہنا تھا کہ سندھ حکومت کی کوشش ہوگی کہ انٹرنینشل کرکٹ پاکستان آئے اور نیشنل اسٹیڈیم کراچی سے اس کی شروعات ہو۔

وزیرِاعلیٰ سندھ کا کہنا تھا کہ پی ایس ایل کراچی میں منعقد کروانے پر تمام ادارے مبارکباد کے مستحق ہیں۔

مراد علی شاہ نے نیوزی لینڈ کے شہر کرائس چرچ میں شہید ہونے والے نمازیوں کے لیے دعائے مغفرت کی اور ان کے لواحقین ستے تعزیت بھی کی۔

پاک فوج کے سربراہ جنرل قمر جاوید باجودہ، پاک فوج کے شعبہ تعلقاتِ عامہ (آئی ایس پی آر) کے ڈائریکٹر جنرل (ڈی جی) میجر جنرل آصف غفور اور ڈائریکٹر جنرل (ڈی جی) رینجرز سندھ میجر جنرل محمد سعید بھی پی ایس ایل فائنل دیکھنے کے لیے اسٹیڈیم پہنچے۔

اعلیٰ شخصیات کے خطاب کے بعد ایونٹ میں سب سے پہلے معروف گلوکار ابرار الحق اسٹیج پر جلوہ گر ہوئے اور انہوں نے اپنی پرفارمنس سے شائقین کو محظوظ کیا۔

بعد ازاں لیجنڈری نازیہ حسن کو خراجِ تحسین پیش کیا گیا، اور ان کے مختلف گانوں پر پرفارمنس پیش کی گئی۔

ان کے بعد فواد خان نے پاکستان سپر لیگ کے رواں برس کے ٹائٹل سانگ پر پرفارمنس پیش کرکے شائقین کو محظوظ کیا۔

فواد خان کی پرفارمنس کے بعد پی ایس ایل فائنل کے مہمانِ خصوصی میں شامل سابق ہسپانوی فٹبالر کارلوس پیئول بھی اسٹیج پر تشریف لائے۔

اس موقع پر انہوں نے کہا کہ پاکستان کے لوگ بہت محبت کرنے والے ہیں، یہاں سے بہت پیار مل رہا ہے اور میں ان کی مہمان نوازی کا شکر گزار ہوں۔

ایشیا کے معروف میوزیکل بینڈ جنون نے بھی پی ایس ایل کی اختتامی تقریب میں اپنی پرفارمنس سے محظوظ کیا۔

اس کے علاوہ انہوں نے میوزیکل بینڈ وائٹل سائنز کے مشہور ملی نغمے دل دل پاکستان پر بھی پرفارمنس دی۔

خیال رہے کہ اس ملی نغمے کے اصل گلوکار وائٹل سائنز کے جنید جمشید تھے جو 7 دسمبر 2016 کو حویلیاں طیارہ حادثے میں 41 مسافروں اور طیارے کے عملے کے 5 اراکین سمیت جاں بحق ہوگئے تھے۔

نیشنل اسٹیڈیم میں سیکیورٹی و دیگر انتظامات

فائنل کے لیے اسٹیڈیم کے اندر اور باہر سیکیورٹی کے سخت انتظامات کیے جبکہ سندھ رینجرز، سندھ پولیس اور دیگر قانون نافذ کرنے والے اداروں کے 20 ہزار سے زائد اہلکار سیکیورٹی پر مامور رہے۔

سندھ پولیس اور سندھ رینجرز نے اسٹیڈیم اور اس کے داخلی اور خارجی راستوں سمیت اطراف کی سیکیورٹی سنبھال لی جبکہ اسٹیڈیم کی فضائی نگرانی بھی کی جا رہی ہے۔

شائقین کے مختلف مقامات پر پارکنگ کی جگہوں کا انتظام کیا گیا جبکہ پارکنگ سے حکومت کی جانب سے شٹل سروس نے شائقین کو اسٹیڈیم تک پہنچایا

سرفراز جیت کیلئے پراُمید، سیمی بھی پی ایس ایل ٹرافی اٹھانے کو تیار

پاکستان سپر لیگ (پی ایس ایل) کے چوتھے سیزن کے فائنل میں بس ایک روز ہی باقی ہے اور فائل کھیلنے والی دونوں ٹیموں، کوئٹہ گلیڈی ایٹرز اور پشاور زلمی کے کپتان جیت کے لیے پراُمید ہیں اور پی ایس ایل کی ٹرافی اٹھانے کو تیار ہیں۔

پشاور زلمی کے کپتان اور پاکستان میں کافی شہرت رکھنے والے کھلاڑی ڈیرن سیمی نے شائقین کرکٹ سے اپیل کی ہے کہ وہ فائنل میں زلمی کی شرٹ پہن کر آئیں اور نیشنل اسٹیڈیم کو پیلا کردیں۔

پی ایس ایل کے چوتھے ایڈیشن کا فائنل کھیلنے والی پشاور زلمی اور کوئٹہ گلیڈی ایٹرز کے کپتان نے فائنل میچ سے قبل نیشنل اسٹیڈیم میں پریس کانفرنس کی۔

اس موقع پر پشاور زلمی کے کپتان ڈیرن سیمی نے کہا کہ پاکستان میں کرکٹ کا ماحول بہت اچھا ہے اور یہاں پر کھیلنے میں بہت مزہ آیا۔

پشاور زلمی کے کپتان ڈیرن سیمی نے صحافیوں کے سوالات کے جواب دیے — فوٹو: پی ایس ایل ٹوئٹر
پشاور زلمی کے کپتان ڈیرن سیمی نے صحافیوں کے سوالات کے جواب دیے — فوٹو: پی ایس ایل ٹوئٹر

انہوں نے کہا کہ پی ایس ایل کا پانچواں پاکستان میں ہوگا یا نہیں اس بارے میں فیصلہ نہیں کرسکتا، تاہم پی ایس ایل کھیل کر میں انجوائے کرتا ہوں اور آگے بھی کرتا رہوں گا۔

کوئٹہ گلیڈی ایٹرز کے کھلاڑی شین واٹسن کی کارکردگی سے متعلق پوچھے گئے سوال پر پشاور زلمی کے کپتان کا کہنا تھا کہ شین واٹس ہمارے لیے درد سر بنے ہوئے ہیں لیکن فائل کے لیے حکمت عملی بنالی ہے۔

ڈیرن سیمی کا کہنا تھا کہ حکمت عملی سب کے سامنے نہیں بتاسکتا، ہماری باؤلنگ بہت مضبوط ہے، ہم نے پی ایس ایل کے ہر میچ میں بھرپور مقابلہ کیا۔

انہوں نے کہا کہ کوئٹہ گلیڈی ایٹرز نے بھی پورے پی ایس ایل میں اچھا کھیل پیش کیا لیکن ہم اپنی حکمت عملی کے ساتھ میدان میں اتریں گے اور فائنل میں عمدہ کارکردگی کا مظاہرہ کریں گے۔

اس موقع پر کوئٹہ گلیڈی ایٹرز کے کپتان سرفراز احمد نے کہا کہ ہم تیسری مرتبہ فائنل کھیل رہے ہیں اور کوشش کریں گے کہ ہم جس طرح پورے ٹورنامنٹ میں کارکردگی دکھائی، فائنل میں بھی ایسا کھیل پیش کریں۔

انہوں نے کہا کہ پی ایس ایل کے میچز پاکستان میں ہونے پر لوگوں کا ولولہ قابل دید ہے اور اسی جوش کو دیکھتے ہوئے پی ایس ایل 5 پاکستان میں ہونا چاہیے۔

بطور کپتان فائنل جیتنا ہر کسی کی خواہش ہوتی ہے—فوٹو: پی ایس ایل ٹوئٹر
بطور کپتان فائنل جیتنا ہر کسی کی خواہش ہوتی ہے—فوٹو: پی ایس ایل ٹوئٹر

کوئٹہ گلیڈی ایٹرز کے کپتان نے مزید بتایا کہ بطور کپتان فائنل جیتنا ہر کسی کی خواہش ہوتی ہے، ہماری کوشش ہوگی کہ فائنل میں اچھی کرکٹ کھیلیں اور کامیابی حاصل کریں۔

ایک سوال کے جواب میں سرفراز احمد نے کہا کہ کراچی کے شائقین نے جس طرح ٹیموں کو سپورٹ کیا اور کراچی میں رہنے کی حیثیت سے ہماری خواہش ہوگی کہ ہم ٹیم کو میچ میں کامیابی دلوائیں۔

شین واٹسن کے حوالے سے انہوں نے کہا کہ انہوں نے پورے ٹورنامنٹ میں بہترین کارکردگی دکھائی اور وہ ہمارے اچھے کھلاڑیوں میں سے ایک ہیں۔

فائنل کی حکمت عملی سے متعلق سرفراز احمد نے کہا کہ ہم بھی پوری تیاری کے ساتھ اتریں گے، دونوں ٹیموں کی اپنی اپنی صلاحیت ہیں، کسی بھی ٹیم کا ٹاپ آرڈر بہت اہمیت کا حامل ہے۔

اس سے قبل دونوں ٹیموں کے کپتان نے پی ایس ایل سیزن کے چوتھے ایڈیشن کی ٹرافی کے ساتھ فوٹو شوٹ کروایا، اس موقع پر ڈیرن سیمی نے سرفراز احمد سے ازراہ مذاق کہا کہ سرفراز آج آپ پہلے ٹرافی اٹھالیں، میں کل اٹھالوں گا۔

اے بی ڈی ویلیئرزکی ورلڈکپ کپ کی فیورٹ ٹیموں میں پاکستان بھی شامل

جنوبی افریقہ کے سابق کپتان اے بی ڈی ویلیئرز نے ورلڈکپ کے لیے پاکستان کو اپنی فیورٹ ٹیموں میں شامل کرلیا۔

انٹرنیشنل کرکٹ کونسل کی طرف سے ورلڈکپ کے حوالے سے سابق کپتان کی رائے جاری کی گئی ہے جس کے مطابق اے بی ڈی ویلیئرز کی فیورٹ ٹیموں میں بھارت، انگلینڈ اور آسٹریلیا کے ساتھ پاکستان شامل ہے، اپنی ہوم ٹیم جنوبی افریقہ کے بارے میں ان کا کہنا ہے کہ پروٹیز کے بھی کافی اچھے امکانات ہوسکتے ہیں لیکن میرے نزدیک وہ فیورٹ ٹیم نہیں کہی جاسکتی۔

ٹرافی جیتنے کے حوالے سے میزبان انگلینڈ اور بھارت کافی مضبوط امیدوار ہیں جب کہ آسٹریلوی ٹیم پانچ بار ورلڈ چیمپئن بن چکی ہے، پاکستان انگلش سرزمین پر دو برس پہلے چیمپئنزٹرافی اپنے نام کرچکا ہے، اس لیے میری نظر میں ان چاروں ٹیموں  میں سے ہی کوئی ٹیم چیمپئن بن سکتی ہے۔ اے بی ڈی ویلیئرز نے ویرات کوہلی کو دنیا کا بہترین ون  ڈے فارمیٹ کا پلیئر قرار دیتے ہوئے اس کا اپنے سے موازانہ بھی کیا، ان کا کہنا تھا کہ ویرات بھی میری طرح فائٹر ہے جو مشکل لمحات میں بھی ہار نہیں مانتا اور میری ہی طرح کوشش کرتا ہے کہ اچھی بیٹنگ کرکے اپنی ٹیم کی فتح ملے۔

پی ایس ایل فائنل میں کامیابی کیلیے پر امید ہیں، سرفراز احمد

 کراچی: قومی کرکٹ ٹیم کے کپتان سرفراز احمد کا کہنا ہے کہ تیسری مرتبہ فائنل کھیلنے جارہے ہیں اور اس بار کامیابی کے لیے پر امید ہیں۔ 

کراچی میں پریس کانفرنس کرتے ہوئے کوئٹہ گلیڈی ایٹرز کے کپتان سرفراز احمد کا کہنا تھا کہ  پورے ایونٹ میں ہماری ٹیم اچھا کھیلی، اب تیسری مرتبہ فائنل کھیلنے جارہے ہیں اور اس بار کامیابی کے لیے پر امید ہیں، شین واٹسن میچ جتوانے کی صلاحیت رکھتے ہیں، شین واٹس  اور عمر اکمل ہمارے مرکزی بیٹسمین ہوں گے، احسان علی اور احمد شہزاد سے بھی امیدیں ہیں، فواد احمد کو کھلانے کا رسک نہیں لیں گے۔

سرفراز احمد کا کہنا تھا کہ مدمقابل مضبوط ٹیم ہوگی لیکن  190 رنز اسکور کرنے والی ٹیم کو برتری مل سکتی ہے، دونوں ٹیمیں ایک دوسرے کی خامیوں اور خوبیوں سے آگاہ ہیں، باونڈری  چھوٹی ہونے سے رنز بنتے ہیں،  پاکستان میں سپورٹنگ وکٹ ہیں، باونڈری میں اضافہ کے بعد بولر اور بیسٹمین خوش ہیں جب کہ نئے ٹیلنٹ کو سامنے آنے کے لیے محنت کریں گے۔

قومی ٹیم کے کپتان نے کہا کہ کراوڈ بہت نیوٹرل ہے اگر کراچی میں کرکٹ ہوگی تو ملک میں  کرکٹ ہوگی، پاکستان میں کرکٹ مقابلوں کا معیار بہت بلند ہوگیا ہے، ٹکٹ مانگنے والوں کی فرمائش بڑھ گئیں،  میرے پاس ٹکٹ نہیں، نظر کرم کی جائے۔ ایک سوال کے جواب میں انہوں نے کہا کہ  آسٹریلیا کے خلاف ٹور میں ٹیم کو مس نہیں کروں گا،  گھر میں بیٹھ کر میچز دیکھوں گا۔

Google Analytics Alternative