کھیل

ایشیا کپ، پاکستان اور ہندوستان کے درمیان میچ 27 فروری کو کھیلا جائے گا

ایشیا کپ ٹی ٹوئنٹی ٹورنامنٹ کے شیڈول کا اعلان کردیا گیا جس کے تحت روایتی حریف پاکستان اور ہندوستان کے درمیان میچ 27 فروری کو کھیلا جائے گا۔

ہندوستان اور پاکستان ایشیا کپ میں اب تک دس مرتبہ آمنا سامنا کرچکے ہیں جہاں پانچ میچز گرین شرٹس جبکہ پانچ میں ہندوستان کامیاب رہا۔

ٹورنامنٹ کے آخری ایڈیشن میں آل راؤنڈر شاہد آفریدی نے میچ کے آخری اوور میں پاکستانی ٹیم کو یادگار فتح سے ہمکنار کروایا تھا۔

یہ ٹورنامنٹ 24 فروری سے چھ مارچ تک پاکستان، ہندوستان، سری لنکا، بنگلہ دیش اور ایک کوالیفائر ٹیم کے درمیان بنگلہ دیش میں کھیلا جائے گا۔

کوالیفائر ٹیم کے لیے افغانستان، ہانگ کانگ، اومان اور متحدہ عرب امارات کے درمیان مقابلہ ہوگا اور فاتح ٹیم ایشیا کپ میں پانچویں رکن کی حیثیت سے شرکت کرے گی۔

ٹورنامنٹ میں پاکستان اپنا پہلا میچ ہندوستان کے خلاف 27 فروری، دوسرا کوالیفائنگ ٹیم کےخلاف 29 فروری، تیسرا میچ بنگلہ دیش کے خلاف دو مارچ اور چوتھا میچ سری لنکا کے خلاف چار فروری کو کھیلے گا جبکہ ٹورنامنٹ کا فائنل چھ مارچ کو کھیلا جائے گا۔

خیال رہے کہ پاکستان سپر لیگ (پی ایس ایل) کا اختتام 23 فروری کو ہوگا جس کے فوری بعد یعنی 24 فروری سے اس ٹورنامنٹ کا آغاز ہوجائے گا۔

اس کے علاوہ عالمی ٹی ٹوئنٹی کا آغاز آٹھ مارچ سے ہوگا جو کہ ہندوستان میں کھیلا جائے گا۔

شعیب ملک ابھی تک فٹنس ٹیسٹ پاس کرنے میں ناکام

لاہور: قومی ٹیم کے تجربہ کار آل راؤنڈر شعیب ملک کی نیوزی لینڈ کے خلاف دوسرے ون ڈے میں بھی شرکت مشکوک ہوگئی ہے۔ ذرائع کے مطابق نیوز ی لینڈ کے خلاف پہلے و ن ڈے میچ سے قبل زخمی ہونے والے سابق کپتان شعیب ملک ابھی تک فٹنس ٹیسٹ پاس کرنے میں کامیاب نہیں ہوسکیں ہیں جس کے بعد ان کی نیوزی لینڈ کے خلاف جمعرات کو شیڈول دوسرے ایک روز میچ میں شرکت بھی مشکو ک ہوگئی ہے۔ آل راؤنڈر کے فٹ نہ ہونے کی صورت میں محمد رضوان یا اسد شفیق کو ٹیم میں شامل کیا جاسکتا ہے۔

محمد آصف پر ساڑھے 3ہزار روپوں کا ایک اور جرمانہ

حیدر آباد: پانچ سالہ پابندی کی سزا مکمل ہوئے زیادہ عرصہ ہوا نہیں کہ محمد آصف پر پہلے ہی ڈومیسٹک ٹورنامنٹ میں جرمانہ بھی عائد کر دیا گیا۔اسپاٹ فکسنگ کے جرم میں 5سال تک کرکٹ سے باہر رہنے والے فاسٹ بولر محمد آصف کی ڈومیسٹک کرکٹ میں واپسی نیشنل ون ڈے ٹورنامنٹ میں ہوئی لیکن پہلے ہی ایونٹ میں انہیں امپائر کے فیصلے پر اعتراض کرنے کی وجہ سے میچ فیس کا 50فیصد جرمانہ کر دیا گیا۔نیاز اسٹیڈیم حیدر آباد میں واپڈا کی نمائندگی کرتے ہوئے کے آر ایل کے بیٹسمین کےخلاف آصف نے اپیل کی ،جسے امپائر نے رد کر دیا،لیکن آصف کے جارحانہ رویہ کی شکایت ریفری سے کی،جس نے لیول ٹو کے تحت کارروائی کرتے ہوئے آصف پر ساڑھے 3ہزار روپے جرمانہ کر دیا۔ذرائع کے مطابق سہیل تنویر پر بھی امپائر کے فیصلے پر اعتراض کی وجہ سے جرمانہ کیا گیا ہے۔دوسری جانب چیف سلیکٹر ہارون رشید کہتے ہیں کہ سلمان بٹ اور آصف کا پابندی اٹھنے کے بعد پہلا ٹورنامنٹ ہے،ان کی کارکردگی پر نظر ہے،لیکن صرف اس ایک ٹورنامنٹ کی کارکردگی پر انہیں قومی ٹیم میں جگہ نہیں مل سکتی۔ ۔

نیوزی لینڈ کرکٹ حکام نےمحمد عامر پر ہونے والے طنزیہ حملوں کا نوٹس لے لیا

ویلنگٹن:  نیوزی لینڈ کرکٹ حکام نے محمد عامر کے خلاف ہونے والی ہوٹنگ کا نوٹس لیتے ہوئے تحقیقات کا اعلان کیا ہے۔ نیوزی لینڈ میڈیا کے مطابق کیوی کرکٹ بورڈ کے سی ای او ڈیوڈ وائٹ نے دوسرے ٹی ٹونٹی کے دوران 23 سالہ پاکستانی فاسٹ باولر محمد عامر پر ہونے والے طنزیہ حملوں کو کرکٹ سپورٹ کے منافی قراردیا۔ انہوں نے کہا گراؤنڈ انتظامیہ کی جانب سے عامر کے اوور کے دوران پیسوں کے موضوع پرمبنی گانا چلانا قابل مذمت ہے جب کہ شائقین کا فاسٹ بالر پرجملے کسنا بھی درست نہیں ہے۔ تمام واقعات سے افسوس ہوا جن کی تحقیقات ضرور کروائیں گے۔

ثانیہ مرزااورآئین ڈوڈنگ نے اعصام الحق اور یاروسلیو شیڈوواکو شکست دے دی

میلبورن: آسٹریلین اوپن مکسڈ ڈبلز کے دوسرے مرحلے میں پاکستان کے اعصام الحق اور قازقستان کی یاروسلیو شیڈووا پر مشتمل جوڑی کوبھارت کی ثانیہ مرزااور کروشیا کے آئین ڈوڈنگ کی جوڑی نے شکست دیدی.اعصام الحق اور یاروسلیو شیڈووا 5۔7 اوار 2۔6 سے شکست کا سامنا کرنا پڑا۔اعصام الحق مینز ڈبلز کے پہلے مرحلے میں ہی باہر ہوگئے تھے۔ثانیہ مرزا کی ایک ہی دن میں یہ دوسری کامیابی تھی، اس سے قبل ویمنز ڈبلز میں مارٹینا ہنگیز کے ساتھ انھوں نے امریکا کی کوکو وینڈیویگھے اور جرمنی کی اینا لینا گروینفیلڈ کو 6۔2، 4۔6 اور 6۔1 سے شکست دے کر سیمی فائنل میں جگہ بنا لی۔

میں ابھی بھی پاکستان ٹیم میں واپسی کا مستحق ہوں”یاسر حمید “

یاسر حمید نے 2003 میں بنگلہ دیش کے خلاف ٹیسٹ کرکٹ میں ڈیبو کیا اور اپنے پہلے میچ کی دونوں اننگز میں سنچریاں بنا ئیں جبکہ 2007 میں اپنا آخری ایک روزہ میچ کھیلے لیکن قومی ٹیم میں طویل عرصے بعد واپسی کے لیے امیدیں ابھی بھی ختم نہیں کیں۔

37 سالہ یاسر حمید کے سابق کھلاڑیوں کے لیے منعقد کی جانے والی ماسٹرز چمپیئنز لیگ کے ساتھ معاہدے سے قومی ٹیم میں واپسی ناممکن دکھائی دے رہی ہے۔

ڈان کو دیئے گئے ایک انٹرویو میں نیوزی لینڈ کے خلاف پہلے ون ڈے میچ میں پاکستانی اوپنرز کپتان اظہرعلی اوراحمد شہزاد کے برے طرح ناکام ہونے کی جانب توجہ دلاتے ہوئے انھوں نے کہا کہ” میں نے 56 ایک روزہ میچوں میں 2 ہزار رنز بنائے ہیں، اگر مجھے پاکستان کی جانب سے سو میچز کھیلنے کا موقع دیا جاتا تو ممکن تھا کہ میں 4ہزار رنز یا 2سو میچوں میں 8 ہزار بنا لیتا۔

انٹرویو میں انھوں نے کہا کہ”میں ایک روزہ کرکٹ میں اچھا تھا کیونکہ میں ہمیشہ اس سے لطف اندوز ہوا، میراخیال ہے کہ میں ابھی بھی پاکستان ٹیم میں واپسی کا مستحق ہوں”۔

یاسرحمید نے 2003 میں بنگلہ دیش کے خلاف ٹیسٹ کرکٹ میں یادگار کارکردگی دکھانے کے بعد ایک روزہ کرکٹ میں بھی ڈیبو کیا، ستمبر سے دسمبر 2003 کے عرصے میں انھوں نے 116، 15،40،82،56،16،72،30،28،52،53،63،61 اور127 کی اننگز کھیلیں جن میں 4 بنگلہ دیش، 5 جنوبی افریقہ اور نیوزی لینڈ کے خلاف 5 میچ شامل ہیں۔

14 میچوں میں 811 رنز ایک روزہ کرکٹ میں ان کی بہترین کارکردگی کو ظاہر کررہے ہیں اور یہ بین الاقوامی کرکٹ میں ان کا پہلا بہترین سیزن ہے۔

ٹیم کے انتخاب میں عدم تسلسل اور کئی غیر ذمہ دارانہ شارٹ کے باعث وہ قومی ٹیم میں نظرانداز ہوتے رہے.

گزشتہ دہائی میں پاکستان کرکٹ میں بڑی عمر کے کھلاڑیوں کی آمد کا سلسلہ بڑھا ہے اور 39 سالہ بلے باز رفعت اللہ کی ٹی ٹوئنٹی کرکٹ میں ڈیبو اس کی تازہ مثال ہے لیکن شاید یاسر حمید کے لیے37 سال کی عمر میں واپسی کرنا مشکل ثابت ہو۔

پاکستان کرکٹ بورڑ(پی سی بی) نے ایم سی ایل سے معاہدہ کرنے والے تمام کھلاڑیوں کو پابند کیا تھا کہ وہ پہلے بین الاقوامی اور ڈومیسٹک دونوں کرکٹ سے کنارہ کشی کا اعلان کریں۔

یاسر حمید کا کہنا تھا کہ” بورڈ نے ہمیں ڈومیسٹک سے بھی کنارہ کش ہونے کا کہا تھا لیکن ایم سی ایل کے کھلاڑیوں کی جانب سے شدید احتجاج کے بعد پی سی بی نے اپنا فیصلہ بدل دیا”۔

اسی لیے وہ ڈومیسٹک کرکٹ میں کھیل کر واپسی کے لیے پر امید ہیں۔

یاسر کا کہنا تھا کہ “صرف وقت بتائے گا کہ یہ ممکن ہے یا نہیں”۔

اے پی ایس پشاور کے 150 طلبا کو پاکستان سپر لیگ کے میچز د کھانے دبئی لے جائیں گے”شاہد آفریدی”

پشاور:  پاکستان ٹی ٹوئنٹی ٹیم کے کپتان شاہد آفریدی نے پشاور کے باصلاحیت کھلاڑیوں کی حوصلہ افزائی کے عزم کا اظہار کرتے ہوئے کہا ہے کہ آرمی پبلک اسکول پشاور (اے پی ایس) کے 150 طلبا کو پاکستان سپر لیگ (پی ایس ایل) کے میچز د کھانے دبئی لے جائیں گے۔شاہد آفریدی نے دورہ نیوزی لینڈ سے واپسی کے بعد اے پی ایس پشاور کا دورہ کیا اورباصلاحیت کھلاڑیوں کی حوصلہ افزائی کے لیے مختلف اسکولوں کے طلبا میں پشاور زلمی کی کٹ، جوتے، بلے اور گیندیں تقسیم کیں۔میڈیا سے گفتگو میں آفریدی کا کہنا تھا کہ پی ایس ایل کے دوران اے پی ایس کے 150 بچوں کو دبئی لے جائیں گے جہاں وہ میچز سے محظوظ ہوں گے۔ان کا کہنا تھا کہ ہمارے پاس بے پناہ ٹیلنٹ ہے لیکن سہولتیں نہیں ہیں۔ٹی ٹوئنٹی کپتان نے کہا کہ پی ایس ایل کے انعقاد کے بعد وہ باصلاحیت کھلاڑیوں کی حوصلہ افزائی کے لیے ایک ہزار طلبا میں آفیشل کٹ تقسیم کریں گے۔قومی ٹیم کی شکستوں کے حوالے سے بات کرتے ہوئے ان کا کہنا تھا کہ کھلاڑیوں کی فٹنس اور حد سے زیادہ خود اعتمادی قومی ٹیم کی شکست کی وجوہات ہیں۔پاکستان کرکٹ ٹیم کو متحدہ عرب امارات میں گزشتہ سال نومبر میں انگلینڈ کے ہاتھوں ون ڈے اور ٹی ٹوئنٹی سیریز میں شکست کے بعد نیوزی لینڈ کے خلاف ٹی ٹوئنٹی سیریز میں بھی ناکامی کا منہ دیکھنا پڑا تھا جبکہ ایک روزہ سیریز کے پہلے میچ میں کیوی ٹیم نے 70 کے بھاری مراجن سے کامیابی حاصل کی تھی.انھوں نے اعتراف کیا کہ ان کی کارکردگی ٹھیک نہیں ہے لیکن ٹیم میں مجموعی طورپر بہتر ہے۔آفریدی نے نیوزی لینڈ کے خلاف ٹی ٹوئنٹی سیریز کے تین میچوں میں مجموعی طورپر 38 رنز بنائے جبکہ 3 وکٹیں حاصل کی تھیں اور پاکستان ٹیم کو سیریز میں 2۔1 سے شکست کا سامنا کرنا پڑا تھا.شاہد آفریدی نے فاٹا کے حالات کے حوالے سے بات کرتے ہوئے کہا کہ وہاں کے لوگوں کو اپنے تحفظ کے لیے فوج کی ضرورت نہیں، بارڈر کی حفاظت کے لیے وہ خود فوج ہیں، بارڈر میں قبائلی پاکستان کی طاقت ہیں

محمد عامر کے لیے دورہ نیوزی لینڈ میں مشکلات کم ہونے کا نام ہی نہیں لے رہی ہیں

ویلنگٹن :  محمد عامر کے لیے دورہ نیوزی لینڈ میں مشکلات کم ہونے کا نام ہی نہیں لے رہی ہیں اور ٹی ٹونٹی میں ان کیخلاف بینر لہرائے جانے کے بعد نیوزی لینڈ کے خلاف پہلے ون ڈے میں ایک کرکٹ شائق نے فاسٹ بالر کے سامنے ڈالر بھی لہرائے۔23سالہ فاسٹ بولر اس وقت تھر ڈ مین بونڈری پر فیلڈنگ کر رہے تھے جب ان کے پیچھے موجود ایک شخص نے ان کی جانب بار بار ڈالر لہرا کر آوازیں کسنا شروع کردیں ، فاسٹ بولر نے اس شخص کے اس رویے کی امپائر سے شکایت جس نے سکیورٹی حکام کو اس واقعے سے آگاہ کیا جس کے بعد سکیورٹی حکام نے مذکورہ شخص کو سخت تنبیہ کرنے کے بعد آئند ہ کے لیے وارننگ دے کر چھوڑ دیا۔

Google Analytics Alternative