بین الاقوامی

امریکا کے مزید جاسوس طیارے مار گرانے کی صلاحیت رکھتے ہیں، ایران

تہران: ایرانی بحریہ کے سربراہ نے دعویٰ کیا ہے کہ مزید امریکی جاسوس طیارے اور ڈرون مار گرانے کی صلاحیت رکھتے ہیں اور امریکا یہ بات اچھی طرح جانتا بھی ہے۔

بین الاقوامی خبر رساں ادارے کے مطابق سربراہ ایرانی بحریہ ریئر ایڈمرل حسین خانزادی نے خبردار کیا کہ ضرورت پڑنے پر ایران امریکا کے مزید جاسوس طیارے اور ڈرون مار گرائے گا۔ ایران دوبارہ بھی ایسا ردعمل دے سکتا ہے اور دشمن یہ بات جانتا ہے۔

ایران نے چار روز قبل آبنائے ہرمز میں امریکا کا بغیر پائلٹ والا ڈرون مار گرایا تھا جس کی مالیت 10 کروڑ ڈالر تھی، ایران کا کہنا تھا کہ ڈرون ایرانی سرحد میں داخل ہوا تھا تاہم امریکا نے ایرانی دعوے کو مسترد کرتے ہوئے موقف اختیار کیا تھا کہ ڈرون عالمی گزر گاہ پر محو پرواز تھا اور یہ کسی ملک کی سرحد نہیں تھی۔

ایران کے پاسداران انقلاب کی جانب سے امریکی ڈرون مار گرائے جانے پر صدر ٹرمپ نے اپنی مسلح افواج کو تہران پر فوجی کارروائی کا حکم دیا تھا تاہم ایران کی جانب سے آبنائے ہرمز میں ایک اور امریکی جاسوی طیارے کو تنبیہ کے بعد جانے کی اجازت دینے کو سراہتے ہوئے فوجی کارروائی کا حکم واپس لے لیا تھا۔

بھارت مسلمانوں کے لیے تشدد اورخوف پھیلانے والا ملک ثابت، امریکی رپورٹ

نیو یارک: امریکا نے مذہبی آزادیوں سے متعلق رپورٹ جاری کردی جس میں بھارت مسلمانوں کے لیے تشدد اورخوف پھیلانے والا ملک ثابت ہوا ہے۔

امریکا نے مذہبی آزادیوں سے متعلق رپورٹ جاری کی ہے جس میں بھارت میں مذہبی عدم برداشت کا گہرائی سے تجزیہ کیا گیا ہے۔ رپورٹ میں انکشاف کیا گیا کہ ہندو قوم پرست گروہوں نے بھارت کو دیگر قومیتوں کیلئے تشدد اور خوف وہراس پھیلانے والا ملک ثابت کیا۔ بھارت میں کئی ریاستوں نے گاؤکشی کے خلاف قانون بنائے، گائے ذبح کرنے کا الزام لگا کر مسلمانوں پر تشدد کیا جب کہ بی جے پی مذہبی اقلیتوں کے ساتھ امتیازی سلوک کر رہی ہے۔

رپورٹ کے مطابق ہندوقوم پرست گروپوں نے بھارت میں غیر ہندوؤں اور نچلی ذات کے ہندوؤں کے خلاف تشدد، دھمکیوں اور ہراسانی سے کام لیا، حکومتی اور غیر حکومتی دونوں عناصر اس میں ملوث رہے، تقریباً ایک تہائی ریاستی حکومتوں نے غیر ہندوؤں کے خلاف مذہبی تبدیلی کے مخالف اور گائے کے ذبیحہ کے قوانین پر عمل کیا، کئی نسلوں سے دودھ، چمڑے اور گوشت کے کاروبار میں ملوث مسلمان اور دلت تاجروں کے خلاف بلوائیوں نے حملے کئے جب کہ عیسائیوں کو زبردستی مذہب کی تبدیلی پر مجبور کیا گیا۔

رپورٹ کے مطابق گائے کے تحفظ کے نام پر 2017 میں 10 سے زائد افراد کو ماردیا گیا، غیر ہندوؤں کو “گھر واپسی” کے نام سے تقریبات میں زبردستی ہندو بنایا گیا، غیرملکی امداد سے چلنے والی این جی اوز کو بھی مذہبی اقلیتوں کے خلاف استعمال کیا گیا، مذہبی آزادی کی بدترین صورتحال دس ریاستوں میں بہت زیادہ دیکھنے کو ملی۔

رپورٹ کے مطابق بی جی پی کا ہندو انتہا پسند گروپوں کے ساتھ الحاق ہے، بی جے پی کے کئی اراکین نے مذہبی اقلیتوں کے خلاف امتیازی زبان استعمال کی، اعدادوشمار کے مطابق گزشتہ 2 سال میں فرقہ ورانہ تشدد میں بہت تیزی سے اضافہ ہوا اورمودی حکومت فرقہ ورانہ تشدد کے شکار اقلیتوں کو تحفظ دینے میں ناکام رہی، مودی کی جماعت کے راہنماؤں کی بھڑکیلی تقریروں سے اقلیتوں کے خلاف تشدد کو ہوا ملی  جب کہ بھارتی ریاستی ادارے ان چیلنجوں سے نمٹنے میں بری طرح سے ناکام رہے۔

دوسری جانب امریکی رپورٹ میں مذہبی آزادیوں اورعدم برداشت کے معاملہ پر بھارت کو درجہ دوئم میں رکھا گیا، بین الاقوامی ریلیجئیس فریڈم ایکٹ کے تحت بھارت کو مخصوص تشویش والے ممالک کی صف میں رکھا گیا ہے۔

اردگان کی جماعت کو میئر استنبول کے دوبارہ انتخاب میں بھی شکست

استنبول: ترکی میں صدر رجب طیب اردگان کی جماعت اے کے پارٹی کو بلدیہ عظمیٰ استنبول کے ’ری الیکشن‘ میں بھی شکست کا سامنا کرنا پڑا ہے۔

بین الاقوامی خبر رساں ادارے کے مطابق 3 ماہ قبل حکمراں جماعت اے کے پارٹی کو استنبول کے بلدیاتی الیکشن میں 25 سال بعد شکست فاش کا سامنا کرنا پڑا تھا جسے صدر طیب اردگان نے تسلیم نا کرتے ہوئے دوبارہ الیکشن کرانے کا حکم دیا تھا تاہم ری الیکشن میں حکمراں جماعت مزید واضح فرق سے ہار گئی۔

ووٹوں کی گنتی مکمل ہوگئی ہے اور غیر حتمی نتائج کے تحت اتحادِ جمہوریت  کے امیدوار بن علی یلدرم کو 45 فیصد جبکہ اپوزیشن جماعت کے امیدوار اکرم امام اولو  کو 54 فیصد ووٹ ملے یعنی اپوزیشن نے تین ماہ قبل ملنے والے ووٹوں سے زیادہ ووٹ حاصل کیے اور حکمراں جماعت کو اپنے مضبوط گڑھ میں ہزیمت کا سامنا رہا۔

سرکاری سطح پر انتخابات کے حتمی نتائج کا اعلان نہیں ہوا تاہم کامیاب امیدوار امام اولو کے ہزاروں حامی سڑکوں پر نکل آئے اور جشن منایا، رجب طیب اردگان نے امام اولو کو کامیابی پر مبارک باد دی جبکہ شکست خوردہ امیدوار نے بھی پولنگ ختم ہونے کے 2 گھنٹے بعد ہی اپنے حریف کو مبارک باد پیش کی۔

سعودی ایئرپورٹ پر حوثی باغیوں کا ایک اور حملہ، ایک شخص جاں بحق

ریاض: سعودی عرب کے ابھا ایئرپورٹ پر حوثی باغیوں کے ایک اور حملے میں ایک شامی باشندہ جاں بحق اور 21 زخمی ہوگئے۔

سعودی خبر ایجنسی کے مطابق ملک کے جنوب مغربی علاقے کے شہر ابھا کے ایئرپورٹ پر حوثی باغیوں کی جانب سے رواں ماہ دوسرا حملہ کیا گیا ہے، اس حملے میں ایک شامی باشندہ جاں بحق ہوا جب کہ 21 افراد زخمی ہیں۔

زخمی ہونے والوں میں 13 سعودی شہری، 4 بھارتی، 2 مصری جب کہ 2 بنگلہ دیشی شہری شامل ہیں۔ زخمیوں کو قریبی اسپتال میں طبی امداد فراہم کی جارہی ہے جن میں سے 2 کی حالت نازک ہے۔

اتحادی افواج کے ترجمان کرنل ترکی المالکی نے بتایا کہ حوثی باغیوں کے حملے میں زخمی ہونے والوں میں 3 خواتین اور 2 بچے بھی شامل ہیں جب کہ ایئرپورٹ کے ایک ریسٹورینٹ اور 18 گاڑیوں کو نقصان پہنچا تاہم کرنل ترکی نے حملے کی نوعیت کے حوالے سے تفصیلات ظاہر نہیں کیں۔

واضح رہے ابھا ایئرپورٹ سعودی عرب کا ایک مصروف ہوائی اڈہ ہے جہاں روزانہ کی بنیاد پر ہزاروں لوگ آمد ورفت کے لیے موجود ہوتے ہیں اور رواں ماہ کی 12 تاریخ کو اسی ایئرپورٹ پر حوثی باغیوں کے میزائل حملے میں 26 افراد زخمی ہوگئے تھے۔

امریکی وزیر خارجہ کی سعودیہ آمد، شاہ سلمان سے ملاقات

واشنگٹن: امریکی وزیر خارجہ مائیک پومپیو ایران کے خلاف عالمی اتحاد کے قیام کے لیے بین الاقوامی دوروں کے سلسلے میں آج سعودی عرب پہنچ گئے جہاں ان کی شاہ سلمان اور ولی عہد محمد بن سلمان سے ملاقاتیں ہوئیں۔

بین الاقوامی خبر رساں ادارے کے مطابق مشرق وسطیٰ میں جاری کشیدگی کے تناظر میں امریکی وزیر خارجہ ایران کے خلاف عالمی اتحاد کے قیام کے لیے سعودی عرب پہنچ گئے جہاں انہوں نے سعودی فرمانروا شاہ سلمان اور ولی عہد محمد بن سلمان سے الگ الگ ملاقات میں باہمی دلچسپی کے امور پر تبادلہ خیال کیا۔

امریکی وزیر خارجہ مائیک پومپیو سعودی عرب کے دورے کے بعد متحدہ عرب امارات بھی جائیں گے جبکہ اُن کا اگلا پڑاؤ بھارت ہوگا، بعد ازاں وہ G-20 سمٹ میں شرکت کریں گے اور صدر ٹرمپ کے وفد میں شامل ہوجائیں گے۔

سعودی عرب روانگی سے قبل مائیک پومپیو نے میڈیا سے گفتگو کرتے ہوئے کہا تھا کہ وہ مشرق وسطیٰ کے دورے کے دوران ایران کے خلاف عالمی اتحاد قائم کرنے کی کوششیں کریں گے جس کے لیے وہ دیگر ممالک سے رابطے ہیں تا کہ اسٹریٹیجک بنیاد پر عالمی اتحاد ممکن ہو سکے۔

مائیک پومپیو جی ٹوئنٹی سمٹ کے دوران صدر ڈونلڈ ٹرمپ کو مشرق وسطیٰ اور بھارت کے دورے سے متعلق رپورٹ پیش کریں گے جس کے بعد امریکی صدر جاپان اور بعد ازاں جنوبی کوریا جائیں گے تاکہ ایران کیخلاف کسی بھی قسم کی کارروائی کے لیے اپنے حلیفوں کو اعتماد میں لے سکیں۔

واضح رہے کہ امریکی ڈرون گرائے جانے پر پہلے ردعمل میں امریکی صدر نے ایران کیخلاف فوجی کارروائی کا حکم دیا تھا تاہم یہ حکم واپس لے لیا تھا اور عسکری کارروائی کے بجائے ایرانی میزائل سسٹم پر سائبر حملے کیے گئے تھے۔

امریکی فورسز کا ایران کے میزائل سسٹم پر سائبر حملہ

واشنگٹن: امریکی سائبر فورس نے ایرانی فوج کے راکٹ اور میزائل لانچز سے جڑے کمپیوٹرز نظام پر حملے کر کے ناکارہ بنانے کی کوشش کی۔

بین الاقوامی خبر رساں ادارے کے مطابق امریکی سائبر فورسز نے ایرانی عسکری کمپیوٹر نظام کو نشانہ بنایا ہے، ان حملوں کا خصوصی ہدف پاسداران انقلاب تھا۔ حملوں میں ایسے کمپیوٹرز کو ناکارہ بنانے کی کوشش کی گئی ہے جو راکٹ اور میزائل لانچنگ کو ان ہی کمپیوٹر سے آپریٹ کیا جاتا تھا۔

امریکی حکام کا کہنا ہے کہ سائبر حملے ایران کی جانب سے امریکی ڈرون کو مار گرائے جانے کے ردعمل میں کیے گئے، صدر ٹرمپ کے ایران کے خلاف فوجی کارروائی کا حکم واپس لینے کے بعد سائبر حملے کے آپشن کا انتخاب کیا گیا۔

ادھر سیکیورٹی معاملات پر نظر رکھنے والے ناقدین کا کہنا ہے کہ امریکی سائبر فورس کے حملے محض ڈرون گرائے جانے کا ردعمل نہیں بلکہ گزشتہ چند ماہ سے ایران کی جانب سے بھی امریکا پر کیے گئے سائبر حملوں کا جواب بھی ہیں۔

تجزیہ کاروں نے خدشہ ظاہر کیا ہے کہ دونوں ممالک کے درمیان بڑھتی کشیدگی خطے کے امن کے لیے نہایت خطرناک ہے، مشرق وسطیٰ میں تناؤ کو کم کرنے کے لیے دیگر عالمی قوتوں کو میدان میں آنا ہوگا۔

ایتھوپیا کے آرمی چیف کو گولی مار کر قتل کردیا گیا

ادیس ابابا: ایتھوپیا کے آرمی چیف کو حکومت کا تختہ الٹنے کی کوشش روکنے پر گولی مار کر قتل کردیا گیا۔

غیر ملکی خبررساں ادارے کے مطابق افریقی ملک ایتھوپیا میں بغاوت کی کوشش کی گئی ہے اور آرمی چیف کی جانب سے حکومت کا تختہ الٹنے کی کوشش روکنے پر انہیں گولی مار کر قتل کردیا گیا۔ فوجی سربراہ پر ان کے آفس میں حملہ کیا گیا جس کے نتیجے میں ان کے مشیر بھی ہلاک ہوگئے ہیں۔

حکومتی حکام کا کہنا ہے کہ ایتھوپیا کی 9 ریاستوں میں بغاوت کی ناکام کوشش کی گئی ہے اور حملے کے بعد ایتھوپیا کی فوج کے چیف آف اسٹاف سے متعلق کوئی اطلاع نہیں آئی جب کہ ایتھوپیا میں انٹرنیٹ سروس معطل کردی گئی ہے۔

سری لنکا میں بدھ انتہا پسند رہنما کی مسلمانوں کو سنگسار کرنے کی دھمکی

کولمبو: سری لنکا میں بدھ انتہا پسند رہنما نے مسلمان ڈاکٹر پر بدھسٹ خواتین کو ماں بننے کی صلاحیت سے محروم کرنے کا الزام عائد کرتے ہوئے ردعمل کے طور پر مسلمانوں کو سنگسار کرنے کی دھمکی دے دی۔

بین الاقوامی خبر رساں ادارے کے مطابق بدھ مت رہنما کی جانب سے بے سروپا الزام لگانے کے  بعد سے سری لنکا میں مسلمان شہریوں کو بدھ مت کے شدت پسند پیروکاروں کی جانب سے جانوں کا خطرہ لاحق ہو گیا ہے۔

بدھ مت رہنما ’وراکاگوڈا سری گناناراتھانا تھیرو‘ نے پیروکاروں کو مسلمانوں کو سنگسار کرنے اور تشدد پر اکساتے ہوئے الزام عائد کیا کہ ایک مسلمان ڈاکٹر نے 4 ہزار سے زائد بدھسٹ خواتین کو ماں بننے کی صلاحیت سے محروم کیا۔

بدھ مت رہنما نے پیروکاروں کو مسلمان کے ریستورانوں اور دکانوں کے بائیکاٹ کی ہدایت کرتے ہوئے مضحکہ خیز الزام عائد کیا کہ مسلم ریسٹورینٹس میں بدھ متوں کو ایسا کھانا کھلایا جاتا ہے جس کے کھانے سے بدھسٹ خواتین بچے پیدا کرنے کی صلاحیت سے محروم ہوجائیں گی۔

’وراکاگوڈا سری گناناراتھانا تھیرو‘ نے مسلمانوں کو سنگسار کرنے کی اپنی دھمکیوں کا دفاع کرتے ہوئے کہا کہ یہ میری زاتی رائے نہیں بلکہ مسلمان ڈاکٹر کے ہاتھوں متاثرہ بدھ مت خواتین کا مطالبہ ہے۔

واضح رہے کہ ایسٹر تہوار کے موقع پر چرچوں اور ہوٹلوں پر خود کش دھماکوں میں 250 افراد کی ہلاکت کے بعد سری لنکا میں مسلمانوں کے لیے زمین تنگ ہوگئی تھی اور مسلم آبادیوں پر سب سے زیادہ حملے شدت پسند بدھسٹ کی جانب سے کیے گئے۔

 

Google Analytics Alternative