- الإعلانات -

سعودی عرب میں روزگار کی فراہمی سے متعلق اہم خبر

ریاض : سعودی عرب نوجوانوں کو روزگار کی فراہمی سے متعلق اہم اقدامات کرنے غور کیا جارہا ہے، اس سلسلے میں اراکین مجلس شوریٰ نے نجی اداروں میں روزگار کے مواقع پیدا کرنے کی تجویز دی ہے۔

تفصیلات کے مطابق سعودی عرب میں مجلس شوریٰ کے ارکان نے مملکت کے نجی اداروں میں سعودائزیشن کی شرح بڑھانے اور کلیدی عہدے سعودیوں کے لیے مختص کرنے کی تجویز پر بحث کی ہے۔

اس حوالے سے سعودی ذرائع ابلاغ کا کہنا ہے کہ شوریٰ کا اجلاس بدھ کو ڈاکٹر عبداللہ البلوی کی صدارت میں ہوا، شوریٰ میں نوجوانوں، سماج اور خاندانی امور کی کمیٹی نے آن لائن اجلاس میں قانون محنت کی دفعہ 26 کی شق دو میں ترمیم کے مسودے پر بحث کی۔

نائب وزیر افرادی قوت و سماجی بہبود ڈاکٹر عبداللہ ابوثنین نے تجویز پیش کی کہ سعودائزیشن کی شرح بڑھا دی جائے، نجی اداروں میں سعودیوں کا تناسب بڑھایا جائے اور مقامی شہریوں کے لیے نجی اداروں میں روزگار کا مناسب ماحول پیدا کیا جائے۔

شوریٰ کی کمیٹی کے ارکان نے نائب وزیر سے اس تجویز کی تفصیلات دریافت کیں اور ان پر تفصیلی بحث کی، پروگرام کے مطابق مجلس شوریٰ کی کمیٹی اپنی سفارش اور تجویز کا ہر پہلو سے جائزہ لینے کے بعد فیصلہ دے گی۔