- الإعلانات -

بورس جانسن بھارت میں کسانوں کے احتجاج سے لاعلم، پاک بھارت مسئلہ قرار دیدیا

لندن: برطانوی وزیراعظم بورس جانسن بھارت میں جاری کسانوں کے احتجاج سے ہی لاعلم نکلے اور پارلیمان میں انہوں نے اس کو پاک بھارت مسئلہ قرار دے دیا۔ برطانوی وزیراعظم بورس جانسن کو سوشل میڈیا پر اس وقت شدید تنقید کا سامنا کرنا پڑا جب وہ بھارت میں جاری کسانوں کے احتجاج کو پاکستان اور بھارت کے درمیان جاری تنازع سمجھ بیٹھے اور دونوں ممالک کو مسئلہ حل کرنے پر زور دیا۔

برطانوی پارلیمنٹ میں جب ان سے سوال کیا گیا کہ بھارت میں جاری کسانوں کے احتجاج پر برطانوی حکومت کا کیا موقف ہے اور کیا آپ بھارتی وزیراعظم سے مسئلہ کے جلد حل کے لیے کہیں گے، برطانوی وزیراعظم نے جواب میں کہا کہ ہمیں پاکستان اور بھارت کے درمیان جو کچھ جاری ہے اس پر شدید تحفظات ہیں تاہم اس مسئلہ کو دونوں ممالک نے مل کر حل کرنا ہے۔ برطانوی وزیراعظم بورس جانسن کی جانب بھارت میں کسانوں کے احتجاج کو پاکستان اور بھارت سے جوڑنے پر ٹوئٹر صارفین نے انہیں آڑے ہاتھوں لیا اور بورس جانسن کی لاعلمی پر شدید غصے کا اظہار کیا۔