- الإعلانات -

یورپ: فضائی سفر کے لیے نئے شرائط اور احتیاطی تدابیر

برسلز: یورپ نے فضائی سفر کے لیے شرائط اور احتیاطی تدابیر اپ ڈیٹ کر دی ہیں۔ تفصیلات کے مطابق یورپ کے بیماریوں سے بچاؤ اور ایوی ایشن اداروں نے مل کر ’ایوی ایشن ہیلتھ سیفٹی پروٹوکول‘ کا نیا ورژن جاری کیا ہے، جو صحت کے حوالے سے محفوظ فضائی سفر کے لیے چند اہم سفارشات پر مبنی ہے۔

متعدد یورپی ممالک نے حال ہی میں ڈیجیٹل کو وِڈ سرٹیفکیٹ کا اجرا کیا ہے، اور اب پروٹوکول کے نئے ورژن سے کرونا وبا پر قابو پانے کے لیے یورپی اقدامات کو مزید تقویت ملے گی۔ پروٹوکول کی یہ دستاویز بیماریوں سے بچاؤ اور کنٹرول کے یورپی سینٹر (ای سی ڈی سی) کی ویب سائٹ پر جاری کی گئی ہے، جس میں حسب سابق چہرے پر ماسک لگانے، حفظان صحت کے اقدامات اور جسمانی فاصلے جیسے اقدامات پر زور ڈالا گیا ہے۔

موجودہ سائنسی شواہد اور یورپی کونسل کی سفارش کے مطابق پروٹوکول میں تجویز پیش کی گئی ہے، کہ جو لوگ کو وِڈ نائنٹین کے خلاف مکمل طور پر ویکسینیشن لیتے ہیں، یا جو آخری 180 دنوں میں اس مرض سے صحت یاب ہو چکے ہیں، ان کو پی سی آر ٹیسٹ یا قرنطینہ سے مشروط نہیں کیا جانا چاہیے۔

پروٹوکول کے مطابق بہت زیادہ خطرے والے علاقوں کے سفر کے لیے منفی رزلٹ کی ضرورت پر غور کیا جا سکتا ہے، رابطوں کی نشان دہی کرنے میں آسانی کے لیے مسافر لوکیٹر فارموں کا استعمال اب بھی بہت اہم سمجھا جاتا ہے۔

اس پروٹوکول کا مقصد رکن ممالک میں قومی حکام اور ہوا بازی کے اسٹیک ہولڈرز کو مدد فراہم کرنا ہے، اور یہ تازہ ترین سائنسی شواہد، وبائی امراض کی صورت حال اور پالیسی کی پیش رفتوں پر مبنی ہے۔