خیبر پختونخوا: بارشوں و سیلاب میں جاں بحق افراد کے لواحقین کو 20 لاکھ، زخمیوں کو 5 لاکھ دینے کا فیصلہ

خیبر پختونخوا حکومت نے بارشوں اور سیلاب سے حادثات میں صوبے میں جاں بحق افراد کے لواحقین کو 20 لاکھ روپے فی کس اور زخمیوں کو 5 لاکھ روپے فی کس امداد دینے کا فیصلہ کر لیا۔
یہ فیصلہ پشاور میں سیلاب متاثرین کے حوالے سے ہونے والے خیبر پختونخوا کابینہ کے اجلاس میں کیا گیا۔کے پی کی کابینہ کے اجلاس میں فیصلہ کیا گیا کہ پی ڈی ایم اے متاثرہ خاندانوں کو ’فوڈ اسٹامپ‘ اسکیم کے تحت 15 ہزار روپے دے گی۔
کابینہ نے پی ڈی ایم اے کو ابتدائی طور پر 1 ارب روپے جاری کرنے کی منظوری دی۔کے پی کابینہ کی جانب سے پولیس کے شہداء کے لواحقین اور زخمی اہلکاروں کے لیے 18 کروڑ 3 لاکھ روپے کے خصوصی پیکیج کی منظوری دی گئی۔کابینہ نے ہیلی کاپٹر حادثے میں شہید عملے کے لیے خصوصی شہداء پیکیج کی منظوری بھی دی۔اجلاس میں صوبے بھر میں سیرت کانفرنسز کے لیے 6 کروڑ 23 لاکھ روپے گرانٹ، ہائی کورٹ کو ریلیز پالیسی سے استثنیٰ دینے اور ایس اے پی سسٹم تک مکمل رسائی کی منظوری دی گئی۔
خیبر پختونخوا کابینہ نے سابق ایم پی اے شوکت یوسف زئی کے علاج کے لیے 2 کروڑ روپے مالی معاونت کی منظوری دی۔کابینہ نے کے پی رائٹ ٹو پبلک سروس ایکٹ 2014 میں ترامیم کی منظوری دی جبکہ مختلف ترقیاتی اسکیموں و انفرااسٹرکچر کی بحالی کے لیے 20 ارب روپے ضمنی گرانٹ منظور کی۔