نوجوانوں کیلئے بلا سود،کم مارک اپ پر وزیراعظم قرضہ سکیم بحال

کراچی:حکومت نے نوجوان کاروباری افراد کیلئے وزیراعظم کی بلا سود اور رعایتی قرضہ سکیم کے دوبارہ اجراء کا اعلان کردیا۔اسٹیٹ بینک آف پاکستان کی جانب سے گزشتہ روز جاری کیے جانے ورالے نوٹیکیشن کے مطابق اس سکیم کے تحت تین مختلف سلیب کے تحت75لاکھ روپے تک کے قرضے رعایتی شرح سود پر زیادہ سے زیادہ 9سال کی مدت کیلئے دیئے جائیں گے۔پروسیسنگ کی مدت45یوم سے تجاویز نہیں کرے گی۔ایک چوتھائی قرضے خواتین کیلئے مختص کیے گئے ہیں۔مسلم لیگ ن کی مخلوط حکومت نے اس سکیم کو”پرائم منسٹرز یوتھ بزنس اینڈ ایگریکلچر لون سکیم“ کا نیا نام دیا ہے جبکہ سابقہ دور حکومت میں اس سکیم کا نام پرائم منسٹرز کامیاب جوان یوتھ انٹرپرینیورشپ اسکیم“ رکھا گیا تھا۔اس اسکیم کو یکم جولائی2022ء کو عارضی طورپر معطل کردیا گیا تھا۔نوٹیفکیشن کے مطابق پاکستان کے وہ تمام شہری اس اسکیم سے فائدہ اٹھانے کے اہل ہیں جو قومی شناختی کارڈ رکھتے ہیں اور جن کے عمر21سے45سال کے درمیان ہے۔آئی ٹی ا ور ای کامرس سے متعلق کاروبار کے لئے عمر کی کم سے کم حد18برس ہوگی جبکہ کم سے کم مطلوبہ تعلیمی قابلیت میٹرک یا اس کے مساوی مقرر کی گئی ہے۔