نوشکی میں ایف سی قافلے پرحملہ خود کش ،3 نوجوان،2شہری شہید ہوئے: آئی ایس پی آر

بلوچستان میں نوشکی دالبندین شاہراہ پر سکیورٹی فورسز کے قافلے پرکالعدم بلوچستان لبریشن آرمی (بی ایل اے) کے خودکش حملے میں 3 ایف سی اہلکاروں سمیت 5 افراد شہید اور متعدد زخمی ہوگئے۔پاک فوج کے شعبہ تعلقات عامہ (آئی ایس پی آر) کے مطابق ضلع نوشکی میں سکیورٹی فورسز کے قافلے پر خود کش حملہ ہوا اور گاڑی میں سوار خودکش بمبار نے سکیورٹی فورسز کے قافلے کے قریب خود کو دھماکے سے اڑایا۔ترجمان پاک فوج نے بتایاکہ دہشت گردوں کے حملے میں سکیورٹی فورسز کے 3 جوان اور 2 شہری شہید ہوگئے جبکہ 3 جوان اور 2 معصوم شہری زخمی ہوئے، شہدا میں حوالدار منظور علی، حوالدار علی بلاول، نائیک عبدالرحیم، سویلین ڈرائیور جلال الدین اور محمد نعیم شامل ہیں۔آئی ایس پی آر کے مطابق کلیئرنس آپریشن کے دوران فائرنگ کے تبادلے میں 3 دہشت گرد ہلاک ہوگئے جبکہ علاقے میں کلیئرنس آپریشن جاری رہے گا اور بزدلانہ عمل کے مرتکب افراد کو انصاف کے کٹہرے میں لایا جائے گا۔ترجمان پاک فوج نے مزید بتایاکہ سکیورٹی فورسز بلوچستان کے امن و استحکام کو نقصان پہنچانے کی کوششوں کو ناکام بنانیکے لیے پرعزم ہیں، بہادرسپاہیوں اور شہریوں کی ایسی قربانیاں ہماریعزم کو مزید مضبوط کرتی ہیں۔دوسری جانب ایم ایس میر گل خان نصیر ٹیچنگ ہسپتال نوشکی کا کہنا ہے کہ ہسپتال میں ایمرجنسی نافذ کر دی گئی ہے۔