پاکستان کی اسٹریٹ چائلڈ فٹبال ٹیم نے 2026 کے ورلڈ کپ کے لیے اپنی تیاریوں کا باقاعدہ آغاز کر دیا ہے۔
یہ عالمی ایونٹ مئی 2026 میں میکسیکو سٹی میں منعقد ہوگا، جہاں پاکستان کی ٹیم دنیا بھر سے آنے والی 30 ٹیموں کے خلاف بین الاقوامی سطح پر مقابلہ کرے گی۔
پاکستان کی معروف اسٹریٹ چائلڈ فٹبال ٹیم، جس کی سرپرستی مسلم ہینڈز کر رہی ہے، اسٹریٹ چائلڈ فٹبال ورلڈ کپ 2026 کے لیے اپنی حتمی تیاریوں میں مصروف ہے۔
یہ ٹورنامنٹ صرف فٹبال تک محدود نہیں بلکہ اسٹریٹ سے وابستہ بچوں کے حقوق، تحفظ اور شناخت کے لیے ایک عالمی تحریک کی حیثیت رکھتا ہے۔
2022 میں قطر میں ہونے والے ورلڈ کپ میں سلور میڈل جیتنے اور دیگر بین الاقوامی مقابلوں میں نمایاں کارکردگی کے بعد پاکستان ٹیم 2026 کے ایڈیشن میں ایک مضبوط امیدوار کے طور پر سامنے آ رہی ہے۔
مسلم ہینڈز کے پلیٹ فارم سے یہ ٹیم نہ صرف کھیل کے میدان میں بلکہ عالمی سطح پر بھی اپنا کردار ادا کرے گی۔ ٹیم کے ارکان اقوامِ متحدہ کی جنرل اسمبلی میں شرکت کریں گے، جہاں وہ بنیادی حقوق جیسے قانونی شناخت (برتھ سرٹیفکیٹ)، تشدد سے تحفظ اور تعلیم تک رسائی کے لیے آواز بلند کریں گے۔
میکسیکو سٹی میں ہونے والا 2026 کا ایونٹ اب تک کا سب سے جامع ٹورنامنٹ ہوگا، جس میں لڑکوں اور لڑکیوں دونوں کے مقابلے شامل ہوں گے۔ “گرین شرٹس” پاکستان میں امید کی ایک روشن علامت بن چکے ہیں، جو یہ ثابت کرتے ہیں کہ ٹیلنٹ کسی بھی سماجی حد کا پابند نہیں ہوتا۔
ٹیم اس وقت میکسیکو سٹی کی بلند سطحی فضائی صورتحال سے ہم آہنگ ہونے کے لیے سخت تربیتی کیمپس سے گزر رہی ہے۔
ترجمان اور میدان گروپ لیڈر ریحان طاہر نے میڈیا سے گفتگو کرتے ہوئے کہا کہ ٹیم مکمل تیاری اور عزم کے ساتھ عالمی ایونٹ میں شرکت کے لیے تیار ہے اور پاکستان کا مثبت تشخص دنیا کے سامنے اجاگر کرے گی