کراچی میں چارجڈ پارکنگ کیخلاف کارروائی شروع

سندھ حکومت نے ٹاونز انتظامیہ کو مطلع کیے بغیر ہی کراچی میں چارجڈ پارکنگ کیخلاف کارروائی شروع کردی۔ صدر ٹاون کے چیئرمین کا بتانا ہے کہ پارکنگ فیس کیلئے باقاعدہ ٹھیکہ دیا جاتا ہے، صوبائی حکومت اور متعلقہ محکمے کی جانب سے ٹاونز کو نہ کوئی اطلاع دی گئی، نہ نوٹیفکیشن ہوا، اچانک گرفتاریوں سے پارکنگ کا ٹھیکہ دینے اور لینے والے دونوں پریشان ہیں۔ایک طرف کمشنر کراچی نے شہر میں ٹریفک مسائل کی بڑی وجہ غیر منظم پارکنگ کو قرار دیا تو دوسری طرف صوبائی وزیر اطلاعات شرجیل میمن نے اعلان کیا کہ شہر کی تمام چارجڈ پارکنگس ختم کردی گئی ہیں۔شرجیل میمن کے اعلان کا نتیجہ یہ نکلا کہ بدھ کو چارجڈ پارکنگ کیخلاف کریک ڈاون ہوا اور صدر ٹاون میں پارکنگ فیس وصول کرنے والے کئی کارندوں کو گرفتار کرلیا گیا۔ اچانک کارروائی سے ناخوش چیئرمین صدر ٹاون منصور شیخ کا کہنا ہے کہ حکومت نے ٹاونز چیئرمینز کو اس حوالے سے نہ کوئی اطلاع دی، نہ ہی کوئی نوٹیفکیشن ہوا۔منصور شیخ نے مزید کہا کہ چارجڈ پارکنگس ختم کرنے سے ٹریفک کے مسائل کم ہونے کے بجائے مزید بڑھ جائیں گے۔