ایرانی ایٹمی تنصیبات پر حملے کا حامی نہیں ، امریکی صدر جوبائیڈن

امریکی صدر جو بائیڈن نے کہا کہ وہ ایرانی جوہری تنصیبات پر حملے کی حمایت نہیں کرتے۔امریکی صدر جو بائیڈن نے صحافیوں سے گفتگو کرتے ہوئے یہ بھی کہا کہ ایران پر مزید پابندیاں عائد کی جائیں گی، وہ اس حوالے سے جلد اسرائیلی وزیراعظم بنجمن نیتن یاہو سے بات کریں گے۔یہ اس وقت سامنے آیا جب بدھ کے روز اسرائیلی حکام نے ایرانی اہداف کی ایک متوقع فہرست کا اشارہ دیا تھا جو منگل کو تہران کی طرف سے شروع کیے گئے حملے پر اسرائیلی ردعمل کا حصہ ہو سکتا ہے۔واضح رہے کہ اسرائیل نے فیصلہ کن اور دردناک جواب کی دھمکی دیتے ہوئے تصدیق کی تھی کہ تہران اپنے اس اقدام پر پچھتائے گا، ایرانی صدر مسعود پیزشکیان نے زور دے کر کہا کہ اگر اسرائیل نے ایک اور غلطی کی تو اس کا ملک کو نقصان اٹھانا پڑے گا۔ ردعمل دوگنا تباہ کن ہوگا۔