علیمہ خان و عظمیٰ خان کیخلاف درج مقدمات کی تفصیلات کا کیس ، آئی جی پنجاب طلب

لاہور ہائیکورٹ میں پی ٹی آئی بانی کی بہنوں علیمہ خان اور عظمی خان کے خلاف درج مقدمات کی تفصیلات کے لیے درخواست پر سماعت ہوئی۔جسٹس علی ضیا باجوہ نے علیمہ خان کے بیٹے شیراز خان کی درخواست پر سماعت کی۔سماعت کے آغاز پر سرکاری وکیل نے کہا کہ ہمیں مقدمات کی تفصیلات فراہم کرنے کے لیے وقت دیا جائے۔عدالت نے کہا کہ مہلت نہیں دی جا سکتی، آئی جی پنجاب عدالت میں پیش ہو کر تفصیلات سے آگاہ کریں۔جس کے بعد عدالت نے آئی جی پنجاب کو طلب کرتے ہوئے سماعت 2 بجے تک ملتوی کر دی۔علیمہ خان کے بیٹے شیراز خان کی جانب سے دائر درخواست میں موقف اختیار کیا گیا ہے کہ علیمہ خان اور عظمی خان اسلام آباد میں درج مقدمے میں جسمانی ریمانڈ پر ہیں، خدشہ ہے کہ انہیں دوبارہ نامعلوم کیس میں گرفتار کیا جائے گا۔