راولپنڈی – پاکستان اور روس نے میری ٹائم سیکیورٹی اور بحری ٹیکنالوجی میں باہمی تعاون کو مضبوط بنانے پر اتفاق کیا ہے۔
اس سلسلے میں بدھ کو اسلام آباد میں نیول چیف ایڈمرل نوید اشرف اور روسی فیڈریشن کے نائب وزیر دفاع کرنل جنرل الیگزینڈر وی فومین کے درمیان ہونے والی ملاقات میں مفاہمت طے پائی۔ ملاقات کے دوران باہمی دلچسپی کے پیشہ ورانہ امور، علاقائی میری ٹائم سیکیورٹی صورتحال اور دوطرفہ بحری تعاون پر تبادلہ خیال کیا گیا۔ انہوں نے دوطرفہ تربیت، بحری جنگی جہازوں کے دوروں اور دونوں بحری افواج کے درمیان مشترکہ بحری مشقوں سمیت تعاون کے مختلف پہلوؤں پر بھی تبادلہ خیال کیا۔ ایڈمرل نوید اشرف نے کہا کہ پاکستان روسی فیڈریشن کے ساتھ اپنے تعلقات کو قدر کی نگاہ سے دیکھتا ہے اور طویل المدتی کثیر جہتی شراکت داری کا خواہاں ہے۔ روسی فیڈریشن کے نائب وزیر دفاع نے خطے میں میری ٹائم سیکیورٹی کے لیے پاک بحریہ کی مسلسل کوششوں اور اعلیٰ عزم کا اعتراف کیا۔