پاکستان میں برطانوی ہائی کمشنر کی نواز شریف سے ملاقات، مختلف امور پر تبادلہ خیال

پاکستان مسلم لیگ ن کے قائد میاں نواز شریف سے پاکستان میں برطانیہ کی ہائی کمشنر جین میریٹ نے ملاقات کرکے برطانیہ کے ساتھ پاکستان کے تاریخی تعلقات سمیت تجارت اور سرمایہ کاری کے فروغ پر تبادلہ خیال کیا۔ملاقات کے موقع پر نواز شریف کا کہنا تھا کہ برطانیہ یورپ میں پاکستان کا سب سے بڑا تجارتی شراکت دار ہے۔سابق وزیراعظم نے حالیہ برسوں کے دوران برطانیہ کی جانب سے پاکستان کیلئے اوورسیز ڈویلپمنٹ اسسٹینس میں کمی پر تشویش کا اظہار کرتے ہوئے امید ظاہر کی کہ برطانوی ہائی کمشنر کی کوششوں سے اعانت پروگرام میں توسیع ہوگی۔نوازشریف نے برطانوی حکومت پر زور دیا کہ غزہ میں فوری جنگ بندی یقینی بنانے کیلئے اپنا مثبت اور بامعنیٰ کردار ادا کرے۔اس موقع پر پاکستان میں برطانوی ہائی کمشنر جین میریٹ کا کہنا تھا کہ ان کی ہمیشہ سے خواہش تھی کہ وہ پاکستان کی بھرپور ثقافت اور تاریخ کا بذات خود مشاہدہ کریں۔