پنجاب میں بھیک منگوانا ناقابل ضمانت جرم قرار دیے جانے کی تجویز

انسداد گداگری کے قانون میں ترامیم کا مسودہ پنجاب اسمبلی میں جمع کرا دیا گیا۔پنجاب میں بھیک منگوانا ناقابل ضمانت جرم قرار دیے جانے کی تجویز دی گئی ہے۔پنجاب اسمبلی کی اسپیشل کمیٹی برائے داخلہ انسداد گداگری قانون میں ترامیم کا جائزہ لے گی۔کسی ایک شخص سے بھیک منگوانے والے سرغنہ کو 3 سال قید، 3 لاکھ جرمانہ یا دونوں سزائیں دینے کی تجویز پیش کی گئی ہے۔جرمانے کی عدم ادائیگی پر مزید 6 ماہ قید کی سزا بھی تجویز کی گئی ہے۔ترامیم کے مسودے کے مطابق ایک بار سزا پانے والا شخص اگر جرم دہرائے تو آرڈیننس میں دی گئی سزا سے دوگنی سزا اور جرمانہ کیا جائے۔ پنجاب کابینہ انسداد گداگری کے قانون میں ترامیم کو پہلے ہی منظور کر چکی ہے۔