ریاض: سعودی عرب نے ملک میں لاکھوں اونٹوں کو پاسپورٹ جاری کرنے کے منصوبے کا اعلان کیا ہے جس کا مقصد مملکت کے قیمتی اونٹوں کے ریوڑ کا بہتر انتظام کرنا ہے۔
اے ایف پی کے مطابق ماحولیات، پانی اور زراعت کی وزارت کا کہنا ہے کہ اس اقدام سے شعبے میں پیداواری صلاحیت اور کارکردگی میں اضافہ ہو گا اور اونٹوں کا ایک قابل اعتماد ڈیٹا بیس تیار ہو گا۔
وزارت کی جانب سے منگل کو سوشل میڈیا پر جاری کی گئی ایک پوسٹ میں پاسپورٹ کی تصویر بھی شامل ہے، جس کا رنگ سبز ہے، جس میں سعودی قومی نشان اور اونٹ کی سنہری تصویر ہے۔
2024 کے اعداد و شمار کے مطابق مملکت میں اونٹوں کی تعداد تقریباً 2.2 ملین ہے۔
اونٹ صدیوں سے عرب دنیا میں آمدورفت کا ایک اہم ذریعہ رہے ہیں جب کہ یہ جانور اپنے مالکان کے لیے وقار اور سماجی حیثیت کی علامت بھی سمجھے جاتے ہیں۔ اس روایت نے ایک منافع بخش افزائش نسل کی صنعت کو جنم دیا ہے۔
سعودی عرب میں سالانہ تہواروں کے دوران اونٹوں کی خوبصورتی کے مقابلے بھی منعقد کیے جاتے ہیں، جن کے شوقین افراد اپنے اونٹوں پر لاکھوں ڈالر خرچ کرتے ہیں۔ تاہم، کچھ بے ضمیر افراد بھی غیر قانونی طریقوں سے فائدہ حاصل کرنے کی کوشش کرتے ہیں۔