عمران خان کے ہیلی کاپٹر میں خرابی کے باعث ہنگامی لینڈنگ

پاکستان تحریک انصاف (پی ٹی آئی) کے چیئرمین عمران خان کے ہیلی کاپٹر نے ڈی آئی خان سے واپسی پر ہیلی میں فنی خرابی کے باعث ہنگامی لینڈنگ کی۔
تفصیلات کے مطابق پی ٹی آئی کے ذرائع کا کہنا ہے کہ پائلٹ نے فنی خرابی پر ہیلی کاپٹر اڈیالہ گاؤں کے قریب اتار لیا۔
پی ٹی آئی کے کارکن کا کہنا تھا کہ ہیلی کاپٹر کی ہنگامی لینڈنگ میں عمران خان اور ان کے ساتھی مکمل طور پر محفوظ تھے۔
ذرائع کا کہنا ہے کہ ہیلی کاپٹر میں فنی خرابی کیا ہوئی ہے، اس حوالے سے معلوم کیا جارہا ہے، عمران خان بذریعہ سڑک بنی گالہ کے لیے روانہ ہوگئے۔
اس دوران سابق وزیر اعظم کا استقبال مقامی بچوں اور نو جوانوں نے کیا اور ان سے گفتگو بھی کی ۔
نوجوانوں اور بچوں سے قومی کرکٹ ٹیم کے سابق کپتان عمران خان نے موجودہ کرکٹرز کے حوالے سے سوالات کیے۔
عمران خان نے پوچھا کہ کون سا کرکٹر آپ کو پسند ہے ؟ اس پر کسی نے شاہنوازدھانی کا نام لیا، اس دوران عمران خان نے رضوان کے بارے میں پوچھا تو نوجوانوں نے کہا کہ اچھا کرکٹر ہے پر بالیں بہت بِیٹ (ضائع) کرتا ہے، 45 پہ 50 اسکور کرتا ہے، کسی نےکہا وہ ٹیسٹ کے لیے اچھا ہے۔
عمران خان نے فاسٹ بولر شاہین آفریدی کے حوالے سے پوچھا تو ایک نوجوان نےکہا کہ وہ تو ہمارا پسندیدہ فاسٹ بولر ہے، اس موقع پر عمران خان نے حارث رؤف کی تعریف کی اور کہا کہ وہ بڑا زبردست بولر ہے جس پر نوجوانوں نے بھی ان کی تائیدکی۔
اس دوران عمران خان سے ایک نوجوان نے اپنے علاقے میں درخت کاٹنےکی بھی شکایت کی جس پر عمران خان نے نوٹس لیتے ہوئے کہا کہ وہ اس حوالے سے ضروری اقدامات کریں گے۔