قاہرہ: مصری ماہرین نے ایک مختصر سروے کے بعد کہا ہے کہ تیزی سے سفید ہوتے ہوئے بال دل کی شریانوں کی تنگی ظاہر کرسکتے ہیں جسے شریانی قلبی مرض کہا جاتا ہے۔

دل کی شریانوں میں رکاوٹ اور تنگی پاکستان سمیت دنیا بھر میں امراضِ قلب کی عام ترین وجہ بھی ہے جسے ’’کورونری ہرٹ ڈیزیز‘‘ کہا جاتا ہے۔ اس مطالعے میں مصری ماہرین نے 545 مردوں کو شامل کرکے ان میں دل کے مرض ہونے اور نہ ہونے کے بارے میں معلوم کیا اور ان کے سر پر سیاہ اور سفید بالوں کے تناسب کا اندازہ بھی لگایا۔

اس تحقیق میں مکمل سیاہ بالوں والے رضاکار کو ایک اور مکمل طور پر سفید بالوں والے افراد کو پانچ نمبر دیئے گئے۔ اس کے علاوہ ذیابیطس، تمباکو نوشی، بلڈ پریشر اور خاندان میں بیماری جیسے اہم عوامل بھی شامل کیے گئے۔ ماہرین نے نوٹ کیا کہ جن کے سر میں سفید بالوں کی زیادتی کی وجہ سے اسکور 3 تھا اور ان میں قلبی شریانیں متاثر ہونے کی شرح بھی زیادہ تھی۔ یہاں تک کہ جس کا سر جتنا زیادہ سفید تھا ان میں شریانوں کی تنگی کی شرح بھی زیادہ نوٹ کی گئی۔

ماہرین نے جب غور کیا تو معلوم ہوا کہ بلڈ پریشر اور کولیسٹرول کی سطح میں اضافے کی وجہ سے مردوں کے بال سفید ہوئے اور اس کی تیسری وجہ عمررسیدگی بھی تھی۔ مطلب کہ دو ایسے عوامل بھی بال سفید کرتے ہیں جو آگے چل کر دل کے امراض کی وجہ بن سکتے ہیں۔

سائنسدانوں نے کہا ہے کہ اس سے زیادہ پریشان ہونے کی ضرورت نہیں کیونکہ بال سفید ہونے کے دیگر کئی عوامل ہوتے ہیں جنہیں مطالعے میں شامل نہیں کیا گیا اور دوسری جانب اس میں شامل افراد کی تعداد بہت کم ہے یعنی یہ ایک چھوٹا سا سروے ہے۔ تاہم اب ماہرین دل کی حالت معلوم کرنے میں بالوں کی سفیدی کو بھی شامل کرنا چاہتے ہیں۔

جنیوا: اقوامِ متحدہ کے تحت عالمی ادارہ برائے صحت (ڈبلیو ایچ او) نے خبردار کیا ہے کہ دنیا میں اس وقت دو ارب افراد آلودہ پانی پینے پر مجبور ہیں اور اس پانی میں انسانی فضلہ بھی موجود ہے۔ اس بات کا انکشاف جمعرات کو ادارے کی جانب سے جاری کردہ رپورٹ میں کیا گیا ہے۔

ڈبلیو ایچ او میں شعبہ عوامی صحت کی سربراہ ماریہ نیرا کہتی ہیں کہ آلودہ پانی ہیضے، ٹائیفائیڈ، پولیو اور پیچش وغیرہ کی وجہ بن کر ہر سال کم سے کم 5 لاکھ افراد کو ہلاک کررہا ہے جبکہ ان میں ڈائریا سرِفہرست مرض ہے۔

اس رپورٹ میں مزید کہا گیا ہے کہ آلودہ پانی آنتوں کے امراض، کیڑوں اور دیگر بیماریوں کی اہم وجہ بھی ہے اور ممالک پر زور دیا ہے کہ وہ فوری طور پر پانی کی صاف فراہمی کے منصوبوں پر سرمایہ کاری کریں۔ تاہم رپورٹ میں اس امر کو خوش آئند قرار دیا گیا ہے کہ گزشتہ تین برسوں میں اکثر ممالک نے صاف پانی کی فراہم کے بجٹ میں 4.9  فیصد اضافہ کیا گیا ہے۔ تاہم اب بھی 80 فیصد ممالک اعتراف کررہے ہیں کہ وہ اب تک پانی کی ترسیل پر مناسب رقم خرچ نہیں کررہے ۔

رپورٹ میں افریقہ اور ایشیا کے غریب ممالک کے بارے میں کہا گیا ہے کہ وہاں صاف پانی اور نکاسی آب کی صورتحال بہت خراب ہے۔

کراچی: ماہرین صحت نے شدید گرمی میں پانی کا زیادہ سے زیادہ استعمال رکھنے، گوشت سے پرہیز، پھل سبزیاں اور ہلکی غذا کھانے کا مشورہ دیا ہے۔

ماہرین صحت نے عوام كو شدید گرمی میں انتباہ كرتے ہوئے كہا ہے شدید گرمی اورتیز دھوپ كے ساتھ جسم كے درجہ حرارت میں بھی غیر معمولی اضافہ ہوجاتا ہے جس سے خون گرم ہونے لگتا ہے اورخون میں موجود پروٹین بھی پكنے لگتے ہیں، جسم میں پانی كی كمی سے خون گاڑھا ہونے لگتا ہے جس كی وجہ سے متاثرہ افراد میں بلڈ پریشر كم ہونا شروع ہوجاتا ہے، دماغ اور دل تك خون كی فراہمی بتدریج متاثرہونے لگتی ہے جس كی وجہ سے متاثرہ افرادكوما میں چلے جاتے ہیں جو ایك خطرناك صورتحال ہوتی ہے۔

ماین صحت نے بتایا كہ جسم كا درجہ حرارت بڑھنے پر اس کا كنٹرولنگ سسٹم متاثر ہونے لگتا ہے، ایسی صورت میں متاثرہ افراد كو فوری ٹھنڈی جگہ منتقل كرنا چاہیے اور ڈراپس، پانی یا مشروبات كو فوری استعمال كرانا چاہیے، جسم میں پانی كی كمی سے ہیٹ اسٹروك لاحق ہوجاتا ہے لہٰذا شدید گرمی یا لوچلنے كی صورت میں پانی كا مسلسل استعمال ركھیں،  بصورت دیگر ہیٹ اسٹروك ہونے كے واضح امكانات ہوجاتے ہیں۔

ماہرین صحت نے مزید كہا كہ پسینہ خارج ہونے كی صورت میں مسلسل پانی پیتے رہنا انتہائی مفید اور ضروری ہوتا ہے، شدید گرمی اورلو میں ایك بجے دوپہر سے 4 بجے سہ پہركے درمیان زیادہ سے زیادہ گھر، كمرے یا آفس كے اندر رہنے كی كوشش كریں كیونكہ لویا ہیٹ ویوز ہونے كی صورت میں جسم كا درجہ حرارت 42 ڈگری سینٹی گریڈ ہونے كا امكان ہوجاتا ہے جس میں جسم كا كنٹرولنگ سسٹم بھی متاثر ہونے لگتا ہے اور اس سے جسم كے پٹھے اكڑنے لگنے لگتے ہیں، جسم كا پانی كم ہو جانے سے متاثرہ افراد كو سر درد، چكر آنا اور متلی والی كیفیت ہونے لگتی ہے، جسم كے اہم حصوں میں خون كی رسائی معمول كے مطابق نہیں ہوتی، متاثرہ افراد كو قے بھی ہونے لگتی ہے، جسم نڈھال ہوجاتا ہے، ذیابیطس كا شكار افراد كو گرم موسم میں بہت زیادہ احتیاط كی ضرورت ہوتی ہے۔

ماہرین کا کہنا تھا کہ گرم موسم میں او آر ایس یا پانی كے مسلسل استعمال سے جسم كا درجہ حرارت 37 ڈگری برقراررہتا ہے، گرمی كی پیشگوئی اور ہیٹ ویوزكی اطلاعات كے بعد چھوٹے بچوں اور حاملہ خواتین كو بھی بہت زیادہ احتیاط كی ضرورت ہوتی ہے جب كہ امراض گردوں میں مبتلا مریضوں اور نظام تنفس كا شكار افراد كو ایسے موسم میں گھر میں رہنے كو ترجیحی دی جائے۔ انہوں نے کہا کہ شدید گرمی میں گھر كے مشروبات استعمال كرتے رہیں جب كہ ہلكی پھلی غذا اور سبزیوں كو روزكا معمول بنائیں، دہی كا استعمال بھی مفید ہے، گرم موسم میں یومیہ كم از كم 3 لیٹر پانی ضرور استعمال كریں، گردے كی بیماری والے افراد دن میں مسلسل پانی پیتے رہیں اور بلڈ پریشر پربھی نظر ركھیں كیونكہ جسم میں پانی كی كمی سے ہیٹ اسٹروك ہو سكتا ہے، شدید گرمی میں دن میں كئی بار نہانا بھی مفید ہوتا ہے، غذا میں گوشت كے استعمال سے پرہیزكریں، پھل اور سبزیاں انتہائی مفید ہوتی ہیں۔

بیلجیئم: بیلجیئم کے ماہرین نے ایک پروٹین کے متعلق انکشاف کیا کہ وہ الرجی سے وابستہ کئی امراض کی وجہ بن سکتا ہے۔

بیلجیئم کے شہر راہیوشٹراڈ میں واقع وی آئی بی یوگینٹ تحقیقی مرکز برائے سوزش کے سائنسدانوں کے مطابق ٹی ایس ایل پی پروٹین انسانی خلیات کی سطح پر موجود رہتا ہے۔ اسے تمام الرجیوں کی اہم ترین وجہ قرار دیا جاسکتا ہے جس کی تفصیل نیچر کمیونکیشن نامی ریسرچ جرنل میں شائع ہوئی ہے۔

ٹی ایس ایل پی کو اہم ترین پروٹین قراد دیتے ہوئے اسے ماسٹر پروٹین کہا گیا ہے۔ اسی ٹیم نے ایک نیا مالیکیول (سالمہ) بھی ڈیزائن کیا ہے جو ٹی ایس ایل پی کی غیرضروری سرگرمی کو روک سکتا ہے۔ اس سے الرجی کے امراض کے علاج کی نئی راہیں کھلیں گی۔ اسی لئے ماہرین اب مزید تحقیقات اور طبی صنعت سے تعاون حاصل کرنے کی کوشش کررہے ہیں۔

پاکستان سمیت پوری دنیا میں الرجی سے وابستہ کروڑوں مریض موجود ہیں  جن میں سے بعض امراض متاثرہ افراد کی زندگی اجیرن کردیتے ہیں۔  بعض دواؤں سے ان کی شدت کم کی جاسکتی ہے لیکن اب تک الرجی کا حتمی علاج دریافت نہیں ہوسکا ہے۔

وی آئی بی یوگینٹ مرکز کے پروفیسر ساوس ساوڈز نے دیگر سائنسی اداروں کے تعاون سے پروٹین پر تحقیق کرکے سالماتی ترکیب اور اس کا طریقہ واردات معلوم کیا ہے۔ مالیکیول کی سہ جہتی (تھری ڈی) ساخت جاننے کے بعد وہ جگہ معلوم کی گئی جس سے اس کی سرگرمی بند کی جاسکتی ہے۔

پروفیسر ساوس کے مطابق انسانی تاریخ میں پہلی مرتبہ ٹی ایس ایل پی کی تفصیل معلوم کی گئی ہے۔ سالماتی سطح پر اس کی تحقیق سے الرجی کے علاج کی نئی راہیں کھلیں گی۔

البرٹا: کینیڈین ماہرین کا کہنا ہے کہ اگر آپ اپنے بچوں کو صحت مند رکھنا چاہتے ہیں تو بہتر ہے کہ کوئی جانور پال لیں اور اگر وہ پالتو جانور کوئی کتا ہو تو اور بھی اچھا ہے۔

یونیورسٹی آف البرٹا میں بچوں کے امراض کے ماہرین نے تین سال کے دوران 746 نوزائیدہ بچوں، ان کے والدین اور گھر کے ماحول کا تفصیلی مطالعہ کیا جس میں خاص طور پر دو اقسام کے ’’مفید جرثوموں‘‘ کے علاوہ ان بچوں اور ان کے گھروں میں صحت کی عمومی کیفیات کا بھی جائزہ لیا گیا۔

مطالعے کے بعد ماہرین کو معلوم ہوا کہ جن گھروں میں بال دار کھال والا کم از کم ایک جانور (بطورِ خاص کتا) پلا ہوا تھا وہاں مفید جرثوموں کی تعداد زیادہ تھی جب کہ اہلِ خانہ کے بیمار پڑنے کا تناسب بھی ایسے گھروں کے مقابلے میں بہت کم تھا جہاں کوئی پالتو جانور موجود نہیں تھا۔ صحت پر پالتو جانوروں کے مفید اثرات چھوٹی عمر کے بچوں پر سب سے نمایاں دیکھے گئے جو ایک طرف مختلف بیماریوں سے زیادہ محفوظ رہے جب کہ دوسری طرف ان کا موٹاپا بھی کنٹرول میں رہا۔

ماہرین کا کہنا ہےکہ پالتو جانوروں میں موجود مفید جراثیم کے علاوہ ان کے ساتھ کھیلنے کودنے سے بھی بچوں کی صحت اس طرح بہتر رہتی ہے کہ وہ دن کا کچھ نہ کچھ حصہ بھاگ دوڑ اور جسمانی سرگرمی میں مصروف رہتے ہیں جس سے وہ موٹے نہیں ہوتے جب کہ پالتو جانوروں سے قربت بھی ان میں تنہائی کا احساس ختم کرتے ہوئے ذہنی طور پر انہیں صحت مند رکھتی ہے۔

اگرچہ ایسا ہی ایک مطالعہ 4 سال پہلے کیا گیا تھا لیکن اس میں صرف 24 بچے شریک کیے گئے تھے۔ اس تحقیق کے نتائج ریسرچ جرنل ’’مائیکروبایوم‘‘ میں شائع ہوئے ہیں۔