اوور سیز پاکستانیز کو بہترین سہولتوں کی فراہمی کے لئے سفارتخانوں کو ہدایات جاری کر دی گئیں،طارق فضل چوہدری

اسلام آباد :وفاقی وزیر برائے پارلیمانی امور ڈاکٹر طارق فضل چوہدری نے قومی اسمبلی میں پاسپورٹ کے نظام سے متعلق اہم سوالات کے جوابات دیتے ہوئے کہا کہ "سبز پاسپورٹ کو عزت گھر ٹھیک کرنے سے ملے گی، نہ کہ اسے خوبصورت یا کلر فل بنانے سے۔”
انہوں نے زور دے کر کہا کہ کچھ ناعاقبت اندیش عناصر دوسرے ممالک میں پاکستان کے خلاف مخالف قراردادیں منظور کروانے کی کوشش کرتے ہیں، جس سے پاسپورٹ کی عزت متاثر ہوتی ہے۔ ان کا کہنا تھا، "9 مئی کو پاسپورٹ کی جو عزت تھی، وہ 10 مئی 2025 کو سو گنا بڑھ گئی ہے۔”
وفاقی وزیر پارلیمانی امورنے پاسپورٹ سسٹم میں خامیوں کا اعتراف کرتے ہوئے کہا کہ "ماضی میں کچھ ایسے افراد کو بھی پاسپورٹ جاری ہوئے جو پاکستانی شہری نہیں تھے، خاص طور پر افغان شہریوں کو سب سے زیادہ پاسپورٹ دیے گئے۔”
انہوں نے بیرونِ ملک مقیم پاکستانیوں کو سہولتیں فراہم کرنے پر روشنی ڈالتے ہوئے کہا کہ "تمام سفارتخانوں کو ہدایات جاری کی گئی ہیں کہ اوورسیز پاکستانیوں کو بہترین سروس دی جائے۔”
سیاسی یکجہتی پر بات کرتے ہوئے ڈاکٹر طارق فضل چوہدری نے کہا کہ "پاکستان پیپلز پارٹی اور ایم کیو ایم ہمارے اتحادی ہیں۔” انہوں نے سیاست میں تنقید کی بجائے مشاورت پر زور دیتے ہوئے کہا کہ "ایوان میں مسائل پر آپس میں بیٹھ کر بات چیت کی جانی چاہیے۔”
ترقیاتی منصوبوں کے حوالے سے انہوں نے کہا کہ "موٹرویز کی تعمیر ہمیشہ مسلم لیگ (ن) کی اولین ترجیح رہی ہے اور ہم ملک بھر میں موٹرویز کے جال کو مزید وسیع کرنے پر کام کر رہے ہیں۔”
انہوں نے بلوچستان کے عوام کو دیے گئے ریلیف کا ذکر کرتے ہوئے کہا کہ "ہم نے بلوچستان کو بجلی کی قیمتوں میں 100 ارب روپے تک کا ریلیف دیا ہے۔” ان کا مزید کہنا تھا کہ "حکومت تمام صوبوں کی ترقی اور خوشحالی کے لیے پرعزم ہے۔”وفاقی وزیر نے زور دے کر کہا کہ "ملک میں کسی بھی صوبے یا فرد کے ساتھ امتیازی سلوک نہیں ہو رہا، بلکہ ہم سب کو ساتھ لے کر چلنے کی پالیسی پر عمل پیرا ہیں۔”