رانا ثناء اللہ کی پی ٹی آئی سے رابطے کی تصدیق

وزیرِ اعظم شہباز شریف کے مشیر برائے سیاسی امور رانا ثنا اللہ نے کہا ہے کہ فائنل کال سے پہلے تحریکِ انصاف سے رابطہ کیا گیا تھا، البتہ بانی پی ٹی آئی کی رہائی کی بات نہیں ہوئی تھی۔رانا ثنا اللہ نے کہا کہ مسلم لیگ ن نے ہمیشہ مذاکرات کی حمایت کی ہے، جب ہم اپوزیشن میں تھے تب بھی ہم نے چارٹر آف اکانومی پیشکش کیا تھا۔انہوں نے کہا کہ تحریکِ انصاف نے مذاکرات کے لیے کمیٹی بنائی ہے لیکن بات چیت کا پیغام نہیں دیا، تحریکِ انصاف کا ہمارے لیے ابھی یہی پیغام ہے کہ ہم آپ سے کیوں مذاکرات کریں؟ن لیگی رہنما نے کہا کہ اگر تحریکِ انصاف نے مذاکرات کا پیغام بھیجا تو ہماری طرف سے انکار نہیں کیا جائے گا۔ رانا ثنا اللہ نے کہا کہ مدارس کی رجسٹریشن کا معاملہ بیٹھ کر سلجھایا جا سکتا ہے، اس معاملے میں کوئی ڈیڈ لاک والی بات نظر نہیں آرہی۔انہوں نے کہا کہ سوسائٹی ایکٹ یا وزارتِ تعلیم سے رجسٹرڈ ہونے سے کوئی فرق نہیں پڑتا۔