پیکا قانون پر میڈیا تنظیموں سے مشاورت کی جائے،خواجہ سعد رفیق

مسلم لیگ ن کے رہنما اور سابق وفاقی وزیر خواجہ سعد رفیق نے کہا ہے کہ پیکا قانون پر میڈیا تنظیموں سے مشاورت کی جائے۔سابق وفاقی وزیر خواجہ سعد رفیق نے بھی حال ہی میں منظور ہونے والے پیکا قانون پر آواز بلند کی ہے۔مسلم لیگ ن کے رہنما خواجہ سعد رفیق نے سوشل میڈیا جاری بیان میں کہا ہے کہ پیکا قانون پر نمائندہ میڈیا تنظیموں سے مشاورت کی جائے اور ٹریبونلز کے فیصلوں کے خلاف اپیل کا حق ہائیکورٹس کو دیا جائے۔خواجہ سعد رفیق کا مزید کہنا تھا یاد رہے قوانین کی چھڑی ہمیشہ وقت بدلنے کے ساتھ اسے بنانے والوں کے خلاف استعمال ہوتی ہے۔واضح رہے کہ متنازع پیکا ترمیمی قانون کے خلاف صحافیوں کا ملک بھر میں احتجاج جاری ہے۔پاکستان فیڈرل یونین آف جرنلسٹ (پی ایف یو جے)کی کال پر گزشتہ روز ملتان، بورے والا، جہانیاں اور جنوبی وزیرستان میں احتجاج کیا گیا جبکہ ملک کے دیگر شہروں میں بھی صحافیوں کی جانب سے احتجاجی مظاہرے کیے گئے اور پیکا بل کو واپس لینے کا مطالبہ کیا گیا۔