پہلے کیس کرو پھر عدالت سے بھاگو ، یہ ان کا وتیرہ بن چکا ، عطا تارڑ

وفاقی وزیرِ اطلاعات عطا تارڑ کا کہنا ہے کہ پہلے کیس کرو پھر عدالت سے بھاگو، یہ ان کا وتیرہ بن چکا ہے۔عطا اللہ تارڑ نے اپنے بیان میں کہا ہے کہ آج میرے وکلا الیکشن ٹربیونل میں پیش ہوئے۔انہوں نے بتایا کہ ہمارے وکلا کی مکمل تیاری تھی، تمام دستاویزات بھی موجود تھیں، مخالف پارٹی کے پاس کوئی شواہد یا ثبوت نہیں تھے۔وفاقی وزیرِ اطلاعات نے کہا کہ اگر ان کے پاس شواہد تھے تو ظہیر عباس کھوکھر نے تاریخ کیوں مانگی؟ انہوں نے میری کامیابی چیلنج کی تو اب سامنا کیوں نہیں کر پا رہے؟ان کا مزید کہنا ہے کہ بار بار تاریخیں مانگ کر یہ الیکشن ٹربیونل کا وقت ضائع کر رہے ہیں۔وفاقی وزیرِ اطلاعات عطا اللہ تارڑ نے یہ بھی کہا ہے کہ اگر ان کے پاس ثبوت نہیں ہیں تو عدالت کو بتائیں کہ ان سے غلطی ہوئی ہے۔