ججز تبادلوں کیخلاف اسلام آباد کی وکلا برادری کا آج ہڑتال کا اعلان

ججز کے تبادلوں کیخلاف اسلام آباد کے وکلا آج مکمل ہڑتال کریں گے۔اسلام آباد ہائیکورٹ میں ججز کی تقرریوں کیخلاف وکلا برادری کی جانب سے آج تمام عدالتوں کے بائیکاٹ کا اعلان کیا گیا ہے، وکلا آج اسلام آباد کی کسی بھی عدالت میں پیش نہیں ہوں گے۔گزشتہ روز اسلام آباد بار کونسل، اسلام آباد ہائی کورٹ بار ایسوسی ایشن اور ڈسٹرکٹ بار ایسوسی ایشن کے عہدیداروں نے مشترکہ پریس کانفرنس کرتے ہوئے کہا کہ ججز کے حالیہ تبادلے عدلیہ میں تقسیم اور بدنیتی پر مبنی ہیں، وکلا تنظیمیں اس عمل کی بھرپور مخالفت کریں گی۔وکلا ایسوسی ایشنز کے نمائندوں کا کہنا تھا کہ دوسرے صوبوں سے ججز کو اسلام آباد ہائیکورٹ میں کیوں لایا جارہا ہے؟ اسلام آباد ہائیکورٹ سے صوبوں میں کتنی تعیناتیاں ہوئی ہیں؟ اسلام آباد ہائیکورٹ کا گناہ یہ ہے کہ وہ عدلیہ کی آزادی چاہتی ہے۔وکلا کی جانب سے مزید کہا گیا کہ ہم کس جج یا شخصیت کیساتھ نہیں، ہم عدلیہ اور آئین کے ساتھ کھڑے ہیں، اسلام آباد ہائیکورٹ کے تین سینئر ججز میں سے کسی ایک کو چیف جسٹس بنانا ہوگا، وکلا باہر سے آنے والے جج کے خلاف بھرپور احتجاج اور مزاحمت کریں گے ۔واضح رہے کہ یکم فروری کو بلوچستان، سندھ اور لاہور ہائیکورٹ سے تین ججز کا اسلام آباد ہائیکورٹ تبادلہ کیا گیا تھا۔