پی ٹی آئی رہنما زرتاج گل کا نام پاسپورٹ کنٹرول لسٹ سے خارج

زرتاج گل کا نام پاسپورٹ کنٹرول لسٹ(پی سی ایل)سے نکال دیا گیا۔اسلام آباد ہائی کورٹ کے جسٹس طارق محمود جہانگیری نے پی ٹی آئی رہنما اور رکن قومی اسمبلی زرتاج گل کا نام پی سی ایل سے نکالنے کی درخواست پر سماعت کی۔محکمہ امیگریشن اینڈ پاسپورٹ نے رپورٹ عدالت میں جمع کرادی۔رپورٹ میں کہا گیا کہ زرتاج گل کے بیرون ملک جانے اور نیا پاسپورٹ حاصل کرنے پر کوئی پابندی نہیں ہے۔ عدالت سے استدعا ہے کہ اس درخواست کو نمٹا دیا جائے۔بعد ازاں اسلام آباد ہائی کورٹ نے پاکستان تحریک انصاف(پی ٹی آئی)کی رہنما زرتاج گل کا نام پاسپورٹ کنٹرول لسٹ (پی سی ایل)سے نکالتے ہوئے درخواست خارج کردی۔یاد رہے کہ زرتاج گل کا نام وزارت داخلہ پنجاب کی درخواست پر ڈیرہ غازی خان کیس کے باعث پی سی ایل میں شامل کیا گیا تھا۔