چینی صنعتوں کو سرمایہ کاری کی دعوت دیتے ہیں: وزیرِ اعظم

وزیرِ اعظم شہباز شریف کا کہنا ہے کہ چینی صنعتوں کو پاکستان میں سرمایہ کاری کی دعوت دیتے ہیں۔یہ بات انہوں نے چینی کمپنی کے وفد سے ملاقات میں کہی ہے۔اس موقع پر وزیرِ اعظم شہباز شریف نے کہا کہ پاکستان اور چین ہر مشکل میں ایک دوسرے کے ساتھ کھڑے رہے ہیں۔
انہوں نے کہا کہ پاکستان چین کے ساتھ اقتصادی تعلقات کو نئی بلندیوں پر لے جانا چاہتا ہے، حکومت خصوصی اقتصادی زونز کے قیام کے لیے ہر ممکن سہولتیں فراہم کرے گی۔
اس موقع پر وزیرِ اعظم کو بریفنگ میں بتایا گیا کہ پاکستان کے شپ بریکنگ اور شپ ری سائیکلنگ کے شعبوں میں بے پناہ استعداد موجود ہے۔بریفنگ میں وزیرِ اعظم شہباز شریف کو یہ بھی بتایا گیا کہ چینی کمپنی پاکستان میں گرین شپ بریکنگ یارڈ تعمیر کرے گی۔وزیرِاعظم شہباز شریف کو بریفنگ میں بتایا گیا کہ چینی کمپنی ماہی گیری، فش پراسیسنگ اور کھجوروں کی پراسیسنگ سے فائدہ اٹھانا چاہتی ہے۔