کرم میں قیام امن کا مشن، بنکرز کی مسماری کا سلسلہ آج دوبارہ شروع ہوگا

ضلع کرم میں قیام امن کا مشن، بنکرز کی مسماری کا سلسلہ آج سے دوبارہ شروع ہوگا۔سرکاری ذرائع کے مطابق رواں ماہ ضروری اشیا پر مشتمل گاڑیوں کے 5 قافلے بھیجے جائیں گے، سکیورٹی کلیئرنس ملنے پر آج بھی امدادی اشیا کا قافلہ روانہ ہونے کا امکان ہے۔ذرائع کا کہنا ہے کہ ضلع کرم میں قیام امن کیلئے بنکرز کی مسماری کا سلسلہ آج دوبارہ شروع ہو رہا ہے، جس کے تحت 4 سے 6 بنکرز مسمار کئے جائیں گے۔سرکاری ذرائع کے مطابق کرم امن معاہدے کے دستخط کنندگان کا جرگہ بھی بلایا جائے گا، معاہدے پر عملدرآمد کے سلسلے میں دستخط کنندگان کی ذمہ داریوں کو اجاگر کیا جائے گا، کرم میں دیہات کی سطح پر قائم کمیٹیوں کو فعال کیا جائے گا، دہشتگردوں اور عسکریت پسندوں کے خلاف بلا تفریق کارروائی عمل میں لائی جائے گی۔ذرائع کا کہنا ہے کہ ایف آئی آرز میں نامزد ملزمان کی گرفتاری ہوگی، علاقے میں پولیس کی اضافی نفری تعینات کی جائے گی۔