ارشد ندیم کی تاریخٰ کامیابی پر صدر ، وزیراعظم اور دیگر رہنمائوں کی مبارکباد

پاکستان کے ارشد ندیم نے گولڈ میڈل جیت کر قوم کا سر فخر سے بلند کر دیا ، ارشد ندیم کو تاریخی کامیابی پر صدر مملکت ، وزیراعظم اور دیگر رہنماں نے مبارکباد دی ہے ۔وزیرِ اعظم شہباز شریف نے ارشد ندیم کے پیرس اولمپکس میں طلائی تمغہ جیتنے پر پوری قوم کو مبارکباد دی ہے۔وزیراعظم نے اپنے تہنیتی پیغام میں کہا کہ اولمپک کی 118سالہ تاریخ میں منفرد ریکارڈ قائم کرنے پر ارشد ندیم آپ ڈھیروں مبارکباد کے مستحق ہیں، ارشد ندیم نے پوری پاکستانی قوم کو ایک بہت ہی خوبصورت تحفہ دیا، پوری قوم کو ارشد ندیم پر فخر ہے۔وزیرِ اعظم شہباز شریف کا کہنا تھا کہ ارشد ندیم نے محنت اور لگن سے یہ اعزاز اپنے نام کیا اور دنیا میں پاکستان کا نام روشن کیا، دہائیوں بعد ارشد ندیم کی شاندار کارکردگی کی بدولت اولمپکس میں سبز ہلالی پرچم کی شان بڑھی۔انہوں نے کہا کہ اس شاندار کامیابی کا سہرا ارشد ندیم اور اس کے اہلخانہ کی محنت کو جاتا ہے، گزشتہ ملاقات میں ارشد ندیم کو بلند حوصلہ اور پاکستان کا نام روشن کرنے کے جذبے سے بھرپور پایا تھا۔