انگلش ٹیم کی اعزاز میں عشائیہ،وزیراعظم کی کامیابی پر انگلینڈ کو مبارکباد

اسلام آباد:وزیر اعظم شہباز شریف نے17سال بعد دورہ پاکستان پر آئی انگلینڈ کرکٹ ٹیم کے اعزاز میں عشائیہ دیا۔ہمارے نمائندے کے مطابق وزیراعظم شہباز شریف کی جانب سے انگلش ٹیم کے اعزاز میں وزیراعظم ہاؤس میں عشائیے کا اہتمام کیا گیا اس موقع پر پاکستانی ٹیم کے کھلاڑی اور آفیشلز بھی موجود تھے۔وزیراعظم نے انگلینڈ ٹیم کے اعزاز میں دیئے گئے عشائیے سے خطاب کرتے ہوئے کہا کہ ایک تاریخی موقع ہے کہ سترہ سال بعد انگلینڈ کی ٹیم پاکستان آئی ہے،بدقسمتی سے آخری دورہ2005میں ہوا تھا جب پاکستان کو شدید انتہاء پسندی اور دہشتگرد حملوں کا سا منا تھا۔انہوں نے راولپنڈی ٹیسٹ میچ میں پاکستان کو ہرانے پر انگلینڈ کرکٹ ٹیم کو مبارکباد دی۔وزیراعظم نے اس موقع پر اوول کے ہیرو فضل محمود اور لٹل ماسٹر کے نام سے معروف حنیف محمد سمیت پاکستانی کرکٹ لیجنڈز کو خراج تحسین پیش کیا۔