ایف بی آ ر کا ٹریک اینڈ ٹریس نظام غیر فعال ہونے پر تحقیقاتی کمیٹی قائم

وزیر اعظم شہباز شریف نے ایف بی آر کے ٹریک اینڈ ٹریس سسٹم کے غیر فعال ہونے پر 5 رکنی تحقیقاتی کمیٹی قائم کر دی ہے۔ایف بی آر ذرائع کے مطابق کمیٹی سابق سیکرٹری خزانہ طارق باجوہ کی سربراہی میں قائم کی گئی ہے جس میں سی ای او پاکستان سنگل ونڈو اور سی ای او نیشنل آئی ٹی بورڈ کمیٹی کے ممبر ہیں جبکہ ایڈیشنل سیکرٹری وزارت قانون اور ممبر ٹیکنالوجی سی ڈی اے ہیں۔ کمیٹی کا حصہ ہوں گے۔ذرائع کے مطابق انکوائری کمیٹی ایف بی آر کی جانب سے ٹریک اینڈ ٹریس سسٹم کے نفاذ میں ناکامی کی وجوہات کا جائزہ لے گی۔ آئی ایم ایف نے شکایت کی تھی کہ ایف بی آر 2 سالوں میں چار سیکٹرز میں ٹریک اینڈ ٹریس سسٹم نافذ نہیں کر سکا۔آئی ایم ایف نے حکومت سے کہا ہے کہ بڑے پیمانے پر ٹیکس چوری روکنے کے لیے ٹریک اینڈ ٹریس سسٹم کو مکمل طور پر نافذ کیا جائے، ایف بی آر سگریٹ، سیمنٹ، چینی اور کھاد کے شعبوں میں گزشتہ 2 سال میں اس نظام کو نافذ نہیں کر سکا۔ ذرائع کا کہنا ہے کہ کمیٹی سسٹم کی ناکامی میں ایف بی آر افسران کے کردار کا بھی جائزہ لے گی، کمیٹی الیکٹرانک سسٹم کے بجائے سٹیمپ سسٹم اور ٹریک اینڈ ٹریس سسٹم کے لیے وینڈر کی کارکردگی کی بھی تحقیقات کرے گی۔