بھارتی ٹیکنالوجی کمپنی اسکائی روٹ نے پہلے نجی راکٹ ’وکرم ایس‘ کو تیار کرکے کامیاب تجربہ کرلیا ہے۔
بھارتی میڈیا کے مطابق ٹیکنالوجی کمپنی اسکائی روٹ نے ’وکرم ایس‘ کو ڈیزائن کیا ہے جب کہ راکٹ کا نام اسپیس پروگرام کے بانی وکرم سربائی کے نام پر رکھا گیا ہے۔
رپورٹ کے مطابق ’وکرم ایس‘ کو سری ہریکوٹا سے 11 بج کر 30 منٹ پر لانچ کیا گیا تھا جس کے بعد بھارت خلا میں پرائیوٹ راکٹس بھیجنے والے ممالک کی فہرست میں شامل ہوگیا۔
بھارتی نیشنل اسپیس پروموشن اور اتھارائزیشن سینٹر کے چیئرمین پاون گوئنگا کے مطابق یہ راکٹ تقریباً 90 کلو میٹر بلند ہوا جب کہ اس کی رینج 121 کلو میٹر تھی۔
انہوں نے کہا کہ ’یہ اسکائی روٹ ایرو اسپیس کی جانب سے آغاز ہے، مشن پرارمبھ کی کامیابی کا اعلان کرنے پر بہت خوش ہوں‘۔
واضح رہے کہ خلا میں راکٹ لانچ کرنے کے بعد اسکائی روٹ ایرو اسپیس پہلی بھارتی نجی کمپنی بن گئی ہے جس کی بنیاد حیدر آباد میں رکھی گئی تھی۔
مبصرین کا خیال ہے کہ اس کامیاب تجربے کے بعد اسکائی روٹ نامی کمپنی کو مزید تجربات کرنے میں آسانی ہوگی جب کہ اس تجربے کو بھارت میں خلائی تحقیق میں نجی شعبے کے کردار کے لیے اہم سنگ میل قرار دیا جارہا ہے۔
